الماتى اپورتى ەۋروپا نارىعىنا شىعادى

جاقىندا گەرمانيادا وتكەن Grüne Woche 2026 حالىقارالىق كورمەسىنە قاتىسقان قاۋىمداستىق, اپورتقا ەۋروپالىق سەرىكتەستەردىڭ قىزىققانىن ايتتى. تەك الما ەمەس, ودان جاسالعان ونىمدەر دە ەۋروپالىقتاردىڭ نازارىنا ىلىككەن.

بۇگىندە الماتى اپورتىن وندىرۋشىلەر قاۋىمداستىعىنا 8 شارۋاشىلىق كىرەدى. جىل سايىن ولار 1500-2000 توننا ءونىم وندىرەدى. ازىرگە ەكسپورت كولەمى تومەن. سوندىقتان جاڭا مەموراندۋم تۇراقتى ەكسپورت جۇيەسىن قالىپتاستىرۋعا باعىتتالعان ماڭىزدى قادام. 

قاۋىمداستىق پرەزيدەنتى رومان سافاروۆتىڭ ايتۋىنشا, بەرليندەگى كورمەگە ساۋدا ساياساتىن دامىتۋ ورتالىعىنىڭ شاقىرۋىمەن قاتىسقان.

«اپورتتىڭ باستى ەرەكشەلىگى ونىڭ تابيعاتىندا. بۇل جاپپاي وسىرىلەتىن, ۇزاق ساقتاۋعا ارنالعان سورت ەمەس. اپورت ءىرى, ءدامى قانىق, حوش ءيىسى ەرەكشە بولىپ كەلەدى. ءبىزدىڭ الما باقتار تەڭىز دەڭگەيىنەن 850 مەتردەن جوعارى ورنالاسقان. المانىڭ دامىنە تاۋلى ايماقتىڭ كليماتى اسەر ەتەدى», دەيدى رومان سافاروۆ.

بەرليندە وتكەن كورمە اپورتتىڭ ەكسپورتتىق الەۋەتىن ناقتى كورسەتتى. اسىرەسە, قوسىلعان قۇنى جوعارى وڭدەلگەن ونىمدەرگە قىزىعۋشىلىق باسىم بولعان. ولاردىڭ قاتارىندا پاستيلا, الما چيپسى, شىرىن, سىركە سۋى جانە كەپتىرىلگەن الما بار.

«الماتى اپورتى گەوگرافيالىق كورسەتكىش رەتىندە تىركەلگەن. بۇل مارتەبە ونىڭ تابيعي ەرەكشەلىگىن قورعايدى. الماتىنىڭ تاۋ بوكتەرىندەگى توپىراق, تازا سۋ جانە تەمپەراتۋرا ءونىم ساپاسىن قالىپتاستىرادى. گەوگرافيالىق كورسەتكىش برەندتى شەتەلدە پرەميۋم ءونىم رەتىندە ىلگەرىلەتۋگە مۇمكىندىك بەرەدى», دەيدى ساۋدا ساياساتىن دامىتۋ ورتالىعنىڭ باس ديرەكتورى ايتمۇحاممەد الداجاروۆ.

المالىقتاعى اپورت باعى

مەموراندۋم اياسىندا ساۋدا جانە ينتەگراتسيا مينيسترلىگىنە قاراستى QazTrade ۇيىمى اپورت وندىرۋشىلەردى سىرتقى نارىقتا سۇيەمەلدەيدى. حالىقارالىق كورمەلەرگە قاتىسۋ, كەلىسسوز جۇرگىزۋ جانە سەرىكتەس تابۋ باعىتىندا قولداۋ كورسەتەدى. جۇيەلى جۇمىس ارقاسىندا اپورتتىڭ گەوگرافياسى كەڭەيىپ, قوسىلعان قۇنى جوعارى ۇلتتىق برەندكە اينالادى دەپ بولجانىپ وتىر.

اپورتتىڭ ءباسى ارتادى