تۇركىستان وبلىسىنىڭ قازىعۇرت اۋدانىنا قاراستى التىنتوبە اۋىلىندا ەرەكشە قابىلەتىمەن كوزگە تۇسكەن دارىندى بالا ءوسىپ كەلەدى. نەبارى 4 جاسىندا مەكتەپكە بارعان ءالي ادامبەك ويشا كۇردەلى ەسەپتەر شىعارادى. ەكى جانە ءۇش تاڭبالى سانداردى وڭاي ەسەپتەيدى. كوبەيتۋ امالدارىن اعىلشىن تىلىندە ەركىن ورىندايدى.
اعىلشىن تىلىنە قىزىعۋشىلىعىنا اناسى نۇرگۇل مىرزاعاليدىڭ سەپتىگى تيسە كەرەك. كوبەيتۋ امالدارىن قازاق, ورىس, اعىلشىن تىلدەرىندە ەركىن ورىندايتىن بالانىڭ دارىنى كوپشىلىكتى ءتانتى ەتەدى. بەس ۇل, ءبىر قىز تاربيەلەپ وتىرعان نۇرگۇل مىرزاعالي كەنجەسى ءاليدىڭ 2021 جىلدىڭ قازان ايىندا دۇنيەگە كەلگەنىن ايتادى. ەكى جاسىنان بالاباقشاعا بارعان ءالي ويىنشىق ماشينالارعا ەمەس, كىتاپ, داپتەر, قالامعا قىزىعۋشىلىق تانىتقان. ونىڭ وسى ءبىر ەرەكشەلىگىن بايقاعان اناسى كوبىنە دامىتۋشى ويىنشىقتار الىپ بەرەتىن. «فيگۋرالار, ساندار, ارىپتەردى دە تەز ۇيرەندى. ءوز بەتىمەن ينتەرنەتتەن قاراپ, ءالفاۆيتتى ءۇش تىلدە مەڭگەرىپ الدى. ءبىر كۇنى قاراسام, ءۇشىنشى سىنىپتاعى بالامنىڭ ماتەماتيكا جيناعىنداعى تاپسىرمالاردى وزدىگىنەن شىعارىپ قويىپتى. ۇيىقتار الدىندا ۇنەمى «ماما, ەسەپ ايتايىقشى» دەپ سۇرايدى. سول كۇنى جارتى ساعاتتاي ەسەپ ايتتىق. «ەندى ۇيىقتا» دەپ جاتقىزعانىمدا, ءبىرازدان كەيىن اعىلشىن تىلىندە كوبەيتۋ كەستەسىن ايتىپ جاتقانىن ەستىدىم. ول كەزدە جاسى ۇشتەن ەندى اسقان ەدى. ءوزىم اعىلشىن ءتىلى ءپانىنىڭ مۇعالىمىمىن. كۇنى بويى جۇمىستامىن, ءالي بالاباقشاعا بارادى. بالاباقشا تاربيەشىلەرى ەسەپتەر بەرسە, بىردەن شىعارىپ تاستاپ, قايتا-قايتا جاڭا تاپسىرما سۇرايدى ەكەن. ءسويتىپ, بالاباقشا وعان قىزىقسىز بولا باستادى. ءۇش جاستان اسقاندا تاربيەشىلەرى بالانىڭ ەرەكشە قابىلەتتى ەكەنىن ايتىپ, مەكتەپكە بەرۋگە كەڭەس بەردى. بىلتىر قىركۇيەكتە, 4 جاسىندا مەكتەپتىڭ دايارلىق سىنىبىنا بەردىم. وزىنەن جاسى ۇلكەن سىنىپتاستارىمەن تەز ءتىل تابىسىپ, وقۋ باعدارلاماسىن بىردەن مەڭگەرىپ كەتتى. تاڭەرتەڭ قينالماي تۇرادى, ساباقتان قالعىسى كەلمەيدى. ۇيگە كەلگەن سوڭ دا سۇراقتارى تاۋسىلمايدى. بارىنشا جاۋاپ بەرۋگە تىرىسامىن», دەيدى اناسى نۇرگۇل.
بۇگىندە ءالي «التىنتوبە» ورتا مەكتەبىنىڭ دايارلىق سىنىبىندا ءبىلىم الادى. ورتا مەكتەپ مۇعالىمى ءاليا مياتبەكوۆانىڭ ايتۋىنشا, ءالي ءتىپتى 5-6 سىنىپ وقۋشىلارى شەشە المايتىن كۇردەلى ەسەپتەردى ولاردان بۇرىن شىعارىپ, كوپشىلىكتى قايران قالدىرىپ ءجۇر. «العاش كەلگەندە جاسىنىڭ كىشىلىگىنە قاراپ, قالاي وقىتامىز دەپ ويلادىق. بىراق بايقاساق, ءبىلىم دەڭگەيى كەي وقۋشىلارىمنان دا جوعارى ەكەن. ءۇش تاڭبالى سانداردى قوسىپ-ازايتادى. ەكى امالدى ەسەپ بەرىپ كوردىك. ونى دا وڭاي شىعاردى. وقي الا ما دەپ الىپپەنى ۇسىنساق, ونى دا ەركىن وقىپ كەتتى», دەيدى ءاليا مياتبەكوۆا. ال باقداۋلەت جەتىباي ءاليدىڭ اپكەسى اياۋلىممەن بىرگە ارنايى كۋرسقا قاتىساتىنىن ايتادى. «ساباق بارىسىندا وقۋشىلاردان كوبەيتۋ كەستەسىن سۇراعاندا, ءالي دە قاسىندا وتىرىپ, جاۋاپ بەرىپ قويادى. كەيدە ەسەپتى ۇلكەندەردەن بۇرىن شىعارىپ ۇلگەرەدى», دەيدى مۇعالىم.
الىپپەنى تولىق مەڭگەرگەن ءالي تەك ماتەماتيكامەن شەكتەلمەي, اعىلشىن تىلىندە جەتىك وقىپ-جازۋعا دا ىقىلاس تانىتىپ ءجۇر ەكەن.
تۇركىستان وبلىسى