اباي وبلىسىندا ارنايى ەكونوميكالىق ايماق قۇرىلادى

اتالعان ماسەلە ۇكىمەتتە وتكەن وتىرىستا تالقىلانىپ, وندا وڭىردەگى ينۆەستيتسيالىق احۋالدى جاقسارتۋ, جاڭا جوبالاردى تارتۋ جانە ينۆەستيتسيالىق پۋلدى كەڭەيتۋ باعىتىندا اتقارىلىپ جاتقان جۇمىستار ناتيجەسى تانىستىرىلدى.

وبلىستا 2025 جىلدىڭ باسىنان بەرى ينۆەستيتسيالىق پۋلعا ەنگىزىلگەن جوبالار سانى 29-دان 112-گە دەيىن ۇلعايىپ, ينۆەستيتسيالار كولەمى 2,2 ترلن تەڭگەدەن 4,3 ترلن تەڭگەگە جەتكەن.

وبلىس اكىمى بەرىك ءۋاليدىڭ ايتۋىنشا, 2026 جىلى جالپى قۇنى 131,2 ملرد تەڭگەنى قۇرايتىن 41 ينۆەستيتسيالىق جوبانى ىسكە اسىرۋ جوسپارلانىپ وتىر. ناتيجەسىندە 3 مىڭنان استام جاڭا جۇمىس ورنى اشىلادى.

وڭىردە ينۆەستورلار تاراپىنان وندىرىستىك نىساندار ورنالاستىرۋعا سۇرانىستىڭ ارتۋىنا بايلانىستى ء«وندىرىس» يندۋستريالىق ايماعىنىڭ اۋماعى 96 گەكتاردان 190 گەكتارعا دەيىن كەڭەيتىلگەن. سونىمەن قاتار شاعىن جانە ورتا بيزنەسكە ارنالعان شاعىن ونەركاسىپتىك پارك قۇرۋ مۇمكىندىگى دە قاراستىرىلىپ وتىر. جوباعا سايكەس, ارنايى ەكونوميكالىق ايماقتىڭ اۋماعى باستاپقى كەزەڭدە 600 گەكتاردى قۇراپ, كەيىن 1000 گەكتارعا دەيىن ۇلعايتىلادى.

ارنايى ەكونوميكالىق ايماقتىڭ باسىم باعىتتارى رەتىندە اگروونەركاسىپ كەشەنى, لوگيستيكا, كولىك-حاب قىزمەتتەرى جانە وڭدەۋ ونەركاسىبى ايقىندالعان. ونىڭ اۋماعىندا بىرقاتار ءىرى ينۆەستيتسيالىق جوبالاردى جۇزەگە اسىرۋ جوسپارلانىپ وتىر.

تالقىلاۋ قورىتىندىسى بويىنشا پرەمەر-مينيستر مەملەكەتتىك ورگاندارعا ينۆەستورلاردىڭ قاجەتتى راسىمدەردەن ۋاقتىلى وتۋىنە جان-جاقتى قولداۋ كورسەتۋدى تاپسىردى.