تسيفرلى عاسىردىڭ كىتاپحاناسى وقىرمانعا كىتاپ بەرۋمەن عانا شەكتەلمەيدى, ناعىز رۋحاني, ادەبي, مادەني ورتاعا اينالدى. ىرگەسى وسىدان 130 جىل بۇرىن قالانعان وبلىستىق پۋشكين كىتاپحاناسىنا باس سۇعىپ كورىڭىز... كىرسە, شىققىسىز. زاماناۋي كىتاپحانا كۇنى كەشە عانا مەرەيلى داتاسىن اتاپ ءوتتى. ارىسى امەريكا, بەرىسى رەسەيدەن مەيماندار قۇتتىقتاپ كەلدى.
كىتاپحانانىڭ كىرەبەرىس فويەسىندە رۋحاني وشاقتىڭ قۇرىلۋ جولىنداعى جەتىستىكتەرىن ءتىزىپ, جىلناما جاساعان. كوز جۇگىرتىپ ەدىك, وڭىردە ەڭ العاشقى قوعامدىق كىتاپحانانى 1896 جىلى وتستاۆكاداعى فەلدفەبەلدىڭ 18 جاستاعى ۇلى پەتر ستولبوۆ اشقان ەكەن. بۇل لاۋازىمدا ول 19 جىل قىزمەت اتقارىپ, كەيىن ءىزباسارلارىنا اماناتتاعان. عاسىردان استام تاريحى بار كىتاپحانا بۇگىندە ۇلكەن جەتىستىككە جەتىپ وتىر. ايتپاسقا بولمايدى, كىتاپحانانىڭ قارىشتاپ دامۋى 1992 جىلدارى باستالعان. كىتاپحانا ۇجىمى سول جىلداردان باستاپ, اقپاراتتىق تەحنولوگيالاردى يگەرۋدە سەرپىندى جۇمىس اتقاردى. ينتەرنەت يگىلىگى جەتە سالا قازاق, ورىس, اعىلشىن تىلدەرىندە كىتاپحانالىق ۆەب-سايتتار اشىپ, ەلىمىزدە ءبىرىنشى رەت الدىڭعى ساندىق تەحنولوگيالاردى يگەردى. كەيىن دە كىتاپحانانىڭ دامۋ قارقىنى ءبىر كۇنگە دە دامىلداعان ەمەس. ۇنەمى جاڭارىپ وتىردى. بيىل مەرەيتوي قارساڭىندا دەمەۋشىلەردىڭ كومەگىمەن كىتاپحانانىڭ كىرەبەرىس فويەسى جاڭارتىلىپ, كونفەرەنتسيا زالى تولىق جوندەۋدەن ءوتتى. سالتاناتتى جيىنعا ايماقتىڭ زيالى قاۋىم وكىلدەرىمەن قاتار قالا باسشىسى المات تالعات ۇلى دا كەلىپ, جىلى ەستەلىكتەرىمەن ءبولىسىپ كەتتى. اۋەلى قوناقتار عيمارات الدىنداعى ايگىلى اقىن ا.س. پۋشكيننىڭ بيۋستىنە گۇل شوقتارىن قويدى.
– پۋشكين كىتاپحاناسىنىڭ ورنى وبلىستاعى وقىعان-توقىعان ءار ازامات ءۇشىن ەرەكشە. سەبەبى جوعارى ءبىلىم العان ستۋدەنتتەردىڭ قوسىمشا ءبىلىم الاتىن جەرى وسى. ءوزىم دە وقۋشى كەزىمدە وسى كىتاپحانادان شىقپادىم. كەيىن ستۋدەنت بولعاندا ساعاتتاپ وتىرىپ رەفەرات جازاتىنبىز. كىم بىلگەن, كەيىن قالا اكىمى رەتىندە كەلىپ قۇتتىقتاپ تۇراتىنىمدى؟ بىزدەردىڭ جەتىستىككە جەتىپ جاتقانىمىز, وسىناۋ كىتاپحانالاردىڭ ارقاسى, كىتاپ وقىعاندىعىمىزدىڭ ەسەبى. رۋحاني وشاعىمىز دامي بەرسىن, – دەدى شاھار باسشىسى المات اقىشوۆ.
كىتاپحانانىڭ باسشىسى نازىم ەرنازارقىزى, كىتاپحاناشى مايا تۇردىبەكقىزى, مەرۋەرت نۇرجانقىزىنا العىس حات تابىستالدى.
سونىمەن قاتار كىتاپحانا ۇجىمىن ارنايى قۇتتىقتاۋعا وسكەمەندەگى رەسەيدىڭ باس كونسۋلى الان الەكساندروۆيچ حەتاگۋروۆ تا كەلدى.
– وسىناۋ پۋشكين كىتاپحاناسى ەكى ەلدىڭ اراسىنداعى دوستىقتىڭ نىشانىنداي كورىنەدى. وسكەمەن تۇرعىندارىنىڭ رۋحاني ورتاسى ماڭگى جاساي بەرسىن! دوستىعىمىز نىعايا ءتۇسسىن, – دەپ تىلەدى الان حەتاگۋروۆ.
ءيا, بۇگىنگى كەش كىتاپ پەن مادەنيەتتىڭ, ءبىلىم مەن پاراساتتىڭ سالتانات قۇرعان ەرەكشە مەرەكەسى. ايتۋلى كەشكە سوناۋ اقش-تىڭ قازاقستانداعى مادەنيەت جانە ءبىلىم بويىنشا وكىلى كولينا گاردا اق تىلەگىن اقتاردى. ونىڭ ۇستىنە, ارنايى كەلگەن اتاشە ويىن قازاق تىلىندە جەتكىزدى.
وسىلايشا, وبلىسىمىزدىڭ ادەبي, مادەني وشاعىندا ۇلكەن توي ءوتتى. اننەن شاشۋ شاشىلدى, تاعىلىمدى اڭگىمەلەر ايتىلدى.
وسكەمەن