الماتى حايۋاناتتار باعىنىڭ جانۋارلارى تولدەپ جاتىر. جىل باسىندا امۋر جولبارىسى تاپقان تاۋتاندارعا الماتىلىقتاردىڭ ءوزى جابىلىپ ات قويعان. سودان كوپ ۇزاماي ءۇش بىردەي كەنگۋرۋدىڭ ءتولى دۇنيەگە كەلگەن ەدى. ەندى, مىنە, حايۋاناتتار باعىنىڭ اققول گيببوندارى مەن ساقينالى قۇيرىقتى لەمۋرلارى بالالادى.
كەنگۋرۋ كوپكە دەيىن ءوزىنىڭ بالالاعانىن بىلدىرمەيدى ەكەن. ءتىپتى حايۋاناتتار باعىنىڭ تاجىريبەلى ماماندارىنىڭ ءوزى دە كەنگۋرۋدىڭ بالاسى باسىن قالتادان قىلتيتىپ شىعارعاندا عانا بايقايتىن كورىنەدى.
ساقينالى قۇيرىقتى لەمۋرلاردىڭ ەكى جۇبى دا ەگىزدەن تولدەگەن. العاشقى ەگىزدەر 6 ناۋرىزدا, ەكىنشى جۇپتىڭ تولدەرى 17 ناۋرىزدا تۋعان. قازىر ولاردىڭ بارلىعى مامانداردىڭ ءجىتى قاداعالاۋىندا, ەنەلەرىنىڭ باۋىرىندا ءوسىپ-جەتىلىپ جاتىر.
ال ناۋرىزدىڭ باسىندا بالالاعان اققولدى گيببوننىڭ ءتولى حايۋاناتتار باعىندا بىرنەشە بۋىن بويى جالعاسىپ كەلە جاتقان وزىندىك ء«بىر اۋلەت». ولاردىڭ اكەسى دجيم, اجەسى دجۋليا دا وسى حايۋاناتتار باعىندا تۋعان. ال ونىڭ ارعى اتاسى ءتابيندى حايۋاناتتار باعىنىڭ تۇراقتى كەلۋشىلەرى جاقسى تانيدى.
مامانداردىڭ ايتۋىنشا, انالىقتار مەن ولاردىڭ تولدەرىنىڭ جاعدايى جاقسى. كۇننىڭ جىلىنۋىنا بايلانىستى جانۋارلار جازعى قورشاۋعا شىعارىلا باستايدى. ەندى كەلۋشىلەر ولاردىڭ تابيعي ورتاعا بارىنشا جاقىن جاعدايداعى تىرشىلىگى مەن مىنەز-قۇلقىن تاماشالاي الادى.
قالاي دەسەك تە, سيرەك جانۋارلاردىڭ دۇنيەگە كەلۋى – حايۋاناتتار باعى ءۇشىن ايتارلىقتاي قۋانىشتى وقيعا. الماتى حايۋاناتتار باعى پريماتتار ءبولىمىنىڭ جەتەكشىسى شولپان ابدىبەكوۆا: «اققول گيببوندار مەن ساقينالى قۇيرىقتى لەمۋرلاردا ءتولدىڭ دۇنيەگە كەلۋى وسى تۇرلەردىڭ گەنەتيكالىق ارتۇرلىلىگىن ساقتاۋعا ىقپال ەتەدى ءارى كەلۋشىلەردىڭ جابايى تابيعاتتى قورعاۋ ماسەلەسىنە قىزىعۋشىلىعىن ارتتىرادى», دەيدى
سۇر كەنگۋرۋلار لورد پەن لارادان, سونداي-اق تيك پەن ليندادان ەكى ءتول تۋعان. لارا التىنشى رەت تولدەسە, ليندا العاش رەت بالالاعان. ال جيرەن كەنگۋرۋلار مارتين مەن مارتادان تاعى ءبىر ەركەك ءتول دۇنيەگە كەلگەن.
«جاڭا تۋعان كەنگۋرۋ ءتولىن بىردەن بايقاۋ مۇمكىن ەمەس. ءبىز ونىڭ دۇنيەگە كەلگەنىن ءبىراز وسكەن سوڭ, قالتادان باسىن شىعارا باستاعاندا عانا اڭعارامىز. سوندىقتان ناقتى تۋعان كۇنى شامامەن عانا انىقتالادى», دەيدى جىرتقىش سۇتقورەكتىلەر ءبولىمىنىڭ جەتەكشىسى گاۋھار سىرگەباەۆا.
الماتى