پرەزيدەنت ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆتى قابىلدادى

اسقاربەك ەرتاەۆ:

مەملەكەت تاراپىنان كورسەتىلەتىن الەۋمەتتىك مىندەتتەمەلەر تولىعىمەن ورىندالىپ جاتقانىن ايتتى.

2025 جىلى زەينەتاقى, بازالىق جاردەماقى جانە باسقا دا الەۋمەتتىك تولەمدەرگە 5,9 تريلليون تەڭگە جۇمسالدى. بيىلعى بەس ايدا بۇل كورسەتكىش 2,7 تريلليون تەڭگەنى قۇرادى.

مۇگەدەكتىگى بار جانداردى قولداۋ جانە جۇمىسقا ورنالاستىرۋ شارالارى جونىندە باياندادى.

بيىل 12 مىڭعا جۋىق مۇمكىندىگى شەكتەۋلى ازامات ەڭبەككە تارتىلعان. جىل سوڭىنا دەيىن مۇگەدەكتىكتى بەلگىلەۋگە ارنالعان تسيفرلىق تالداۋ تەتىگىن ەنگىزۋ جوسپارلانىپ وتىر.

مەملەكەت باسشىسى ارناۋلى الەۋمەتتىك قىزمەت كورسەتۋ ساپاسىن ارتتىرىپ, ەلىمىزدىڭ ايماقتارىندا 7 جاڭا وڭالتۋ ورتالىعىن اشۋ مىندەتىن قويدى. بۇل قىزمەتتەردىڭ قولجەتىمدىلىگىن جاقسارتىپ, ەرەكشە قاجەتتىلىگى بار جاندارعا جان-جاقتى قولداۋ كورسەتۋگە مۇمكىندىك بەرەدى.

حالىقتى ەڭبەكپەن قامتۋ باعىتىندا قولعا الىنعان شارالار تۋرالى مالىمەت بەردى.

ەل كولەمىندە 201 مىڭعا جۋىق ازامات, سونىڭ ىشىندە 74,9 مىڭ جاس جۇمىسپەن قامتىلدى.

بيىل لايىقتى جالاقى تولەپ, الەۋمەتتىك اۋدارىمداردى ۇزبەيتىن ءارى ەڭبەك قاۋىپسىزدىگىن ساقتايتىن تۇراقتى جانە ورنىقتى جۇمىس ورىندارىنىڭ سانىن 3,1 ميلليونعا دەيىن جەتكىزۋ مىندەتى قويىلدى.

جاساندى ينتەللەكت تەحنولوگيالارىن ەنگىزۋ اياسىندا ماڭعىستاۋ جانە پاۆلودار وبلىستارىندا «جۇمىسپەن قامتۋدىڭ تسيفرلىق قىزمەتى» پيلوتتىق رەجيمىن ىسكە قوسۋ جوسپارلاندى.

ەڭبەك قاتىناستارىن رەتتەۋ باعىتىندا اتقارىلعان جۇمىستار جونىندە ايتتى.

ەلەكتروندىق فورماتتا 6,7 ميلليون ەڭبەك شارتى جاسالعان. مەكەمەلەردىڭ 118 مىڭنان اسا جۇمىسكەرى مىندەتتى ساقتاندىرۋ شارتىمەن قامتىلدى.

ەڭبەك ينسپەكتورلارىنىڭ كومەگىمەن 22 مىڭنان اسا جۇمىسكەردىڭ قۇقىعى قورعالدى. وندىرىستىك جاراقاتتانۋ مەن جازاتايىم وقيعالاردىڭ الدىن الۋعا ەرەكشە نازار اۋدارىلۋدا.

كاسىپتىك تاۋەكەلدەردى ايقىنداۋ, وقىتۋ ۇدەرىسىن اۆتوماتتاندىرۋ جانە تومەندەتىلگەن جالاقىنى انىقتاۋ ءۇشىن تسيفرلىق شەشىمدەر ەنگىزۋ قاراستىرىلعان.

مەملەكەت باسشىسى:

سالانى ودان ءارى تسيفرلاندىرۋ, ەڭبەك ادامىنىڭ قۇقىعىن قورعاۋ, مۇقتاج جاندارعا كومەك كورسەتۋ جانە الەۋمەتتىك ماسىلدىقپەن كۇرەس جونىندە بىرقاتار تاپسىرما جۇكتەدى.

پرەزيدەنتتىڭ ايتۋىنشا, قابىلدانعان شارالاردىڭ بارلىعى حالىقتىڭ ءال-اۋقاتىن ارتتىرۋعا باعىتتالۋى قاجەت.