گازەتتىڭ قىسقاشا تاريحى 

ءجۇز جىلدىق مەجەسىنە جاقىنداعان رەسپۋبليكالىق باسىلىم – «ەگەمەن قازاقستان» گازەتى العاش رەت ءوز وقىرماندارىنىڭ قولىنا «ۇشقىن» دەگەن اتپەن 1919 جىلعى 17 جەلتوقساندا ءتيدى. سودان بەرى بۇل گازەتتە ءار جىلدارى بەرنياز كۇلەەۆ، سماعۇل سادۋاقاسوۆ، جۇسىپبەك ايماۋىتوۆ، مۇحتار اۋەزوۆ، بەيىمبەت مايلين، ساكەن سەيفۋللين، تۇرار رىسقۇلوۆ، وراز جاندوسوۆ، عابيت مۇسىرەپوۆ، شەرحان مۇرتازا، ءابىش كەكىلباەۆ سىندى ۇلتىمىزدىڭ ءبىرتۋار ازاماتتارى قىزمەت ىستەپ، باسىلىمدى دامىتۋ، بەت-بەينەسىن قالىپتاستىرۋ، بەدەلىن ارتتىرۋ ىسىنە زور ۇلەس قوستى. گازەت ءوز تاريحىندا «ۇشقىننان» كەيىن «ەڭبەك تۋى»، «ەڭبەكشىل قازاق»، «ەڭبەكشى قازاق»، كەيىننەن «سوتسيالدى قازاقستان»، «سوتسياليستىك قازاقستان» اتاۋىمەن جارىققا شىقتى. ەلىمىز ەگەمەندىك العان تۇستا اتى «ەگەمەندى قازاقستان»، ال 1993 جىلى «ەگەمەن قازاقستان» بولىپ وزگەردى.