Almaty Air Initiative قورىنىڭ مالىمەتىنشە, جاڭا قۇرىلعىلاردىڭ 17-ءسى ادامدار كوپ شوعىرلاناتىن ورىندارعا – مەكتەپتەر, بالاباقشالار مەن سكۆەرلەر ماڭىنا ورنالاستىرىلعان.
بۇرىنعى قۇرىلعىلاردان ەرەكشەلىگى – جاڭا ستانسالار PM2.5 جانە PM10 ۇساق بولشەكتەرىن عانا ەمەس, دەنساۋلىققا قاۋىپتى گاز ءتارىزدى لاستاۋشى زاتتاردى دا باقىلايدى. ولاردىڭ قاتارىندا ازوت ديوكسيدى, كومىرتەك توتىعى, كۇكىرت ديوكسيدى جانە جەرگە جاقىن قاباتتاعى وزون بار.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, اۆتوكولىك شىعارىندىلارى مەن كومىر جاعۋدان بولىنەتىن بۇل زاتتار تىنىس الۋ جۇيەسىنە كەرى اسەر ەتىپ, سوزىلمالى اۋرۋلاردىڭ اسقىنۋىنا سەبەپ بولۋى مۇمكىن.
وسكەمەندە اۋا ساپاسى تەكسەرىلىپ جاتىر: ءوڭىر تۇرعىندارىنا وتەماقى تولەنە مە؟
قازىرگى ۋاقىتتا داتچيكتەر سىناق رەجيمىندە جۇمىس ىستەپ تۇر. ولاردىڭ كورسەتكىشتەرىن Mycar.kz قوسىمشاسىنداعى «اۋا ساپاسى» بولىمىنەن كورۋگە بولادى. جاڭا نۇكتەلەر كارتادا شارشى بەلگىمەن كورسەتىلگەن.
قوردىڭ اتقارۋشى ديرەكتورى جۇلدىز ساۋلەبەكوۆانىڭ ايتۋىنشا, بۇل جاڭارتۋ ورتالىق ازياداعى ەڭ تىعىز ازاماتتىق مونيتورينگ جەلىسىن ودان ءارى كۇشەيتەتە تۇسەدى. سىناق كەزەڭى اياقتالعاننان كەيىن بارلىق دەرەكتەر ۇيىمنىڭ اشىق داشبوردىنا ەنگىزىلەدى.
