اباي وبلىسىندا قازاقتىڭ ءداستۇرلى ءان ونەرىن حالىقارالىق دەڭگەيدە ناسيحاتتاۋعا باعىتتالعان مادەني ءىس-شارا ءوتتى. ناتيجەسىندە مادەنيەت سالاسىنىڭ ۇزدىگى, Shakarim University «ونەر» كافەدراسىنىڭ وقىتۋشىسى, ۋنيۆەرسيتەتتىڭ قۇرمەتتى پروفەسسورى قايرات قابىشەۆ ەتنومادەنيەت باعىتى بويىنشا ازيا مەن افريكانىڭ دۇنيەجۇزىلىك رەكوردتار كىتابىنا ەندى, دەپ حابارلايدى Egemen.kz.
رەكوردتى تىركەۋ قورىتىندىسى بويىنشا ونەر يەسىنە رەسمي سەرتيفيكات پەن كۇمىس مەدال تابىستالدى. قايرات ارقاش ۇلى رەكورد ورناتۋ بارىسىندا قازاقتىڭ 102 ءداستۇرلى ءانىن 5 ساعات 29 مينۋت بويى ورىندادى. رەكورد تالاپتارىنا سايكەس ءار 25 اننەن كەيىن 15 مينۋتتىق ءۇزىلىس جاساۋ مۇمكىندىگى قاراستىرىلعانىمەن, ورىنداۋشى بۇل قۇقىقتى پايدالانعان جوق. بارلىق شىعارمالار نوتاسىز, ءماتىنسىز, فونوگرامماسىز جانە ورىنداۋشىنىڭ ءوز اسپاپتىق سۇيەمەلدەۋىمەن ورىندالدى.
ءىس-شاراعا حالىقارالىق Global Best of Records (GBR) ۇيىمىنىڭ ازيا جانە افريكا ديۆيزيونى بويىنشا رەكوردتاردى تىركەۋ جونىندەگى باس وفيتسەرى قۋاندىق قۇدايبەرگەن قاتىسىپ, كورسەتىلگەن ناتيجەنىڭ بىرەگەي سيپاتىن اتاپ ءوتتى. ونىڭ ايتۋىنشا, دۇنيەجۇزىلىك رەكوردتار كىتابى ساراپشىلارىنىڭ شەشىمىمەن رەكورد رەسمي تۇردە تىركەلىپ, 2026 جىلعى باسىلىمعا ەنگىزىلەدى.
11 500 دومبىراشى: ۇلتتىق رەكورد تىركەلدى
جوباعا ساراپشىلىق باعا بەرگەن قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ەركىن شۇكىمان اتالعان جەتىستىكتىڭ قازاقتىڭ ءداستۇرلى ءان ونەرىن حالىقارالىق دەڭگەيدە دارىپتەۋگە ىقپال ەتەتىنىن اتاپ ءوتتى.
ءوز كەزەگىندە قايرات قابىشەۆ بۇل ناتيجەگە ۇلتتىق انشىلىك مەكتەپ ءداستۇرى مەن ۇستازدار تاعىلىمىنىڭ نەگىز بولعانىن ايتتى. سونداي-اق مۇنداي باستامالار جاستار اراسىندا ۇلتتىق ونەردى ناسيحاتتاۋعا سەرپىن بەرەتىنىن جەتكىزدى.
مىڭ تۇيەلى كەرۋەن: قازاقستاننىڭ جاڭا رەكوردى گيننەس كىتابىنا تىركەلدى
اتالعان رەكورد قازاقتىڭ ءداستۇرلى ءان ونەرىنىڭ حالىقارالىق دەڭگەيدە تانىلۋى مەن ۇلتتىق مادەنيەتتىڭ جاھاندىق كەڭىستىكتەگى بەدەلىنىڭ ارتىپ كەلە جاتقانىن كورسەتەدى.
قازاقستان گيننەستىڭ رەكوردتار كىتابىنا قانشا رەت ەندى؟