قازاقستاننىڭ ۇلتتىق سپورت ۋنيۆەرسيتەتىنىڭ عىلىم جانە يننوۆاتسيالار جونىندەگى پرورەكتورى الەكساندر نەفتيسوۆ جۋرناليست مايا بەكباەۆانىڭ جاڭا پودكاستىندا سپورتتاعى عىلىم, يننوۆاتسيالار مەن ادام فاكتورىنىڭ ءرولى تۋرالى پىكىر ءبىلدىردى, دەپ حابارلايدى Egemen.kz.
PhD, دوتسەنت الەكساندر نەفتيسوۆ پودكاستتا سپورتشىلاردى دايىنداۋدا عىلىمي تاسىلدەردى پراكتيكالىق قولدانۋ تۋرالى ەگجەي-تەگجەيلى اڭگىمەلەدى. ول بيومەحانيكا, فيزيولوگيا جانە تسيفرلىق مونيتورينگ سياقتى ءدال دەرەكتەر مەن تەحنولوگيالار كۇشتى قۇرال بەرەتىنىن, بىراق ولار جاتتىقتىرۋشىنىڭ ينتۋيتسياسىن, پسيحولوگيالىق تۇراقتىلىقتى جانە باسەكەلەستىك جاعدايدا جىلدام بەيىمدەلۋ قابىلەتىن الماستىرا المايتىنىن اتاپ ءوتتى.
«سپورت – بۇل ماتەماتيكا ەمەس, مۇندا ويلانۋ كەرەك. جارىس بارىسىندا سپورتشىنىڭ پسيحولوگيالىق كۇيى, موتيۆاتسياسى, قارسىلاس قىسىمى, ءتىپتى كەزدەيسوق جاعدايلار ناتيجەگە تىكەلەي اسەر ەتەدى. مۇنداي كۇردەلى فاكتورلاردى كەز كەلگەن مودەل 100% ءدال بولجاي المايتىنى انىق. سوندىقتان سپورتتاعى تابىس تەك ماتەماتيكالىق ەسەپتەۋلەرگە سۇيەنبەيدى. ول تەرەڭ تالداۋدى, تاجىريبەنى, كرەاتيۆتى ويلاۋدى جانە ناقتى ساتتە دۇرىس شەشىم قابىلداي ءبىلۋدى تالاپ ەتەدى. جاتتىقتىرۋشىنىڭ ينتۋيتسياسى مەن سپورتشىنىڭ ىشكى دايىندىعى كەيدە كەز كەلگەن تسيفرلىق مودەلدەن دە ماڭىزدىراق ءرول اتقارادى», دەدى الەكساندر نەفتيسوۆ.
ەلورداداعى ۇلتتىق سپورت ۋنيۆەرسيتەتىنىڭ قۇرىلىسى جىل سوڭىنا دەيىن اياقتالادى
اڭگىمە بارىسىندا ول سپورتتىق دايىندىققا عىلىمدى ينتەگراتسيالاۋ, تالانتتاردى انىقتاۋ ءۇشىن ينتەللەكتۋالدى جۇيەلەردى ازىرلەۋ, ۋنيۆەرسيتەتتىڭ فەدەراتسيالارمەن ىنتىماقتاستىعى جانە سپورتتا Industry 4.0 پەرسپەكتيۆالارى تۋرالى ايتتى. سونىمەن قاتار الەكساندر نەفتيسوۆ اكادەميالىق عىلىمدى قازاقستان سپورتىنىڭ پراكتيكالىق قاجەتتىلىكتەرىمەن ۇيلەستىرەتىن جوبالاردى ىسكە اسىرۋ تاجىريبەسىمەن ءبولىستى.
ەسكە سالا كەتەيىك, جۋىردا جەڭىل اتلەتيكا فەدەراتسياسى مەن قازاق ۇلتتىق سپورت ۋنيۆەرسيتەتى مەموراندۋم جاساستى. مەموراندۋم اياسىندا جەڭىل اتلەتيكادان قازاقستاننىڭ جازعى چەمپيوناتتارى ۇلتتىق سپورت ۋنيۆەرسيتەتىنىڭ بازاسىندا وتكىزىلەتىن بولىپ شەشىلدى.