قالا اكىمى جەڭىس قاسىمبەك Instagram پاراقشاسىندا جاڭادان سالىناتىن مەديتسينالىق نىساندار تۋرالى جازدى, دەپ حابارلايدى Egemen.kz.
اكىمنىڭ ايتۋىنشا, ەلوردانى بارلىق باعىت بويىنشا دامىتۋ جۇمىسى ءجۇرىپ جاتىر.
«الداعى جىلدارى قالادا دەنساۋلىق ساقتاۋ سالاسىنىڭ 11 نىسانى بوي كوتەرەدى, ولاردىڭ اراسىندا كوپبەيىندى اۋرۋحانا, زاماناۋي 8 ەمحانا جانە 2 جەدەل مەديتسينالىق جاردەم قوسالقى ستانتسياسى بار. نەگىزگى مىندەتتەردىڭ ءبىرى – اكۋشەرلىك جانە بوساندىرۋ قىزمەتتەرىن دامىتۋ. سوڭعى ون جىلدا ەلوردادا بوسانۋ كورسەتكىشى 35 پايىزعا ءوستى. وسىعان بايلانىستى جاڭادان ەكى پەريناتالدىق ورتالىق سالۋ تۋرالى شەشىم قابىلدادىق. نىسانداردىڭ ءبىرىن 2027 جىلى اياقتايمىز. بۇل ەكى جوبانىڭ جۇزەگە اسۋى اكۋشەرلىك توسەك-ورىندارعا دەگەن قازىرگى قاجەتتىلىكتى تولىق قامتاماسىز ەتىپ, ەلورداداعى انا مەن بالا دەنساۋلىعىن قورعاۋ جۇيەسىن نىعايتۋعا مۇمكىندىك بەرەدى», دەپ جازعان ج. قاسىمبەك.
مەملەكەت باسشىسىنىڭ تاپسىرماسى بويىنشا سارىارقا اۋدانىندا 300 ورىنعا ەسەپتەلگەن كوپبەيىندى اۋرۋحانانىڭ قۇرىلىسى ءجۇرىپ جاتىر.
استانانىڭ ەلەۋلى ەكونوميكالىق ءوسىمى
استانا اكىمىنىڭ مالىمدەۋىنشە, №2 قالالىق كوپبەيىندى اۋرۋحانانىڭ جانىنداعى قابىلداۋ-دياگنوستيكالىق كەشەنىنىڭ قۇرىلىسى اياقتالۋعا جاقىن.
سول سياقتى «نۇرلى جول» ۆوكزالى ماڭىندا ءبىر اۋىسىمدا 350 ادام قابىلدايتىن جاڭا ەمحانا جۇمىسىن باستادى.
«بۇدان بولەك, تەلمان ەلدى مەكەنىندە ەمحانا قۇرىلىسى ءجۇرىپ جاتىر. كەلەسى جىلى تاعى ەكى ءىرى ەمحانانىڭ, سونداي-اق ءوندىرىس ەلدى مەكەنىندەگى دارىگەرلىك امبۋلاتوريانىڭ قۇرىلىسىن باستاۋدى جوسپارلاپ وتىرمىز», دەپ جازدى جەڭىس قاسىمبەك.
استانادا قىتاي مەن ورتالىق ازيا جاستارىن بىرىكتىرگەن E-LIGHT 2026 فەستيۆالى ءوتتى