ەلىمىزدە ەندى ەلەكتروموبيلدەرگە ارنايى مەملەكەتتىك ءنومىر بەرىلەدى. سەنات تسيفرلاندىرۋ, جەكە دەرەكتەردىڭ قاۋىپسىزدىگى جانە كولىك سالاسىنداعى جاڭا تەحنولوگيالاردى رەتتەۋگە باعىتتالعان زاڭ جوباسىن ءبىرىنشى وقىلىمدا قابىلدادى, دەپ حابارلايدى Egemen.kz.
الدىن الا مالىمەت بويىنشا, ءنومىر جاسىل ءتۇستى بولۋى مۇمكىن. جاڭا جۇيە بيىل جازدا قابىلدانعانىمەن, كولىك يەلەرى نومىرلەردى بىردەن الا المايدى.
«ەلەكتروموبيلدەرگە ارنالعان ارنايى مەملەكەتتىك نومىرلەردى دايىنداۋعا بيۋدجەتتەن قوسىمشا قاراجات بولىنبەيدى. سەبەبى وزگەرىس تەك ءنومىردىڭ تۇسىنە قاتىستى بولادى. الدىن الا مالىمەت بويىنشا, ونىڭ ءتۇسى جاسىل بولۋى مۇمكىن. ءبىز التى ايلىق وتپەلى كەزەڭ ەنگىزۋدى ۇسىنىپ وتىرمىز. بۇل وزگەرىسكە بيۋدجەتتەن قارجى جۇمسالمايدى», دەدى ىشكى ىستەر ءمينيسترىنىڭ ورىنباسارى سانجار ءادىلوۆ.
زاڭ جوباسىندا جۇرگىزۋشىسىز كولىكتەردىڭ قوزعالىسىن رەتتەۋ, سونداي-اق ەلەكتروساموكاتتار مەن شاعىن ەلەكتر كولىكتەرىنىڭ جول قوزعالىسىنا شىعۋىنا شەكتەۋ ەنگىزۋ ماسەلەلەرى قاراستىرىلعان.
ءنومىرىن جاسىرعاندار جازالانادى
سونىمەن قاتار ماس كۇيىندە كولىك جۇرگىزىپ, جۇرگىزۋشى كۋالىگىنەن ايىرىلعاندارعا كۋالىك الۋ مەرزىمىن 7-8 جىلعا دەيىن ۇزارتۋ ۇسىنىلعان.
ەسكە سالا كەتەيىك, بۇعان دەيىن ىشكى ىستەر مينيسترلىگى كولىكتىڭ مەملەكەتتىك تىركەۋ ءنومىرىن جاقىن تۋىستارعا مۇراعا قالدىرۋعا مۇمكىندىك بەرىلەتىندىگىن مالىمدەدى. جاڭا تارتىپكە سايكەس, بۇرىن پايدالانىلعان نومىرلەردى مەملەكەتتىك ورگاندارعا, شەتەلدىك ديپلوماتيالىق وكىلدىكتەر مەن كونسۋلدىق مەكەمەلەرگە, سونداي-اق ولاردىڭ قىزمەتكەرلەرى مەن وتباسى مۇشەلەرىنە راسىمدەۋگە بولادى.