پاۆلودار وبلىسىنىڭ اقسۋ قالاسىندا ەكى جاسار بالا كوپقاباتتى تۇرعىن ءۇيدىڭ تەرەزەسىنەن قۇلاپ كەتتى, دەپ حابارلايدى Egemen.kz.
وقيعا 11 ماۋسىم كۇنى بولعان. 2023 جىلى تۋعان ءبۇلدىرشىن اۋىر جاراقات الىپ, جەدەل تۇردە اقسۋ قالالىق اۋرۋحاناسىنىڭ جانساقتاۋ بولىمىنە جەتكىزىلگەن.
دارىگەرلەر العاشقى مەديتسينالىق كومەكتى كورسەتكەننەن كەيىن بالانى پاۆلودار وبلىستىق بالالار اۋرۋحاناسىنا تاسىمالداۋ تۋرالى شەشىم قابىلدادى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, ناۋقاستىڭ جاعدايى دياگنوستيكالىق تەكسەرۋلەردەن كەيىن ناقتىلانادى. قازىرگى ۋاقىتتا دارىگەرلەر ونىڭ دەنساۋلىق جاعدايىن باقىلاۋدا ۇستاپ وتىر.
وقيعانىڭ ءمان-جايى انىقتالىپ جاتىر.
ايتا كەتەيىك, پاۆلوداردا بەس جاسار قىز ءۇشىنشى قاباتتان قۇلاپ كەتتى.
ەسكە سالايىق, بۇعان دەيىن اقتاۋدا 8 جاستاعى بالا تۇزەتۋ ورتالىعىنىڭ تەرەزەسىنەن قۇلاپ كەتكەنىن جازعان بولاتىنبىز.