يتاليادا وقىپ جۇرگەن قازاق ستۋدەنت قازا تاپتى. ونىڭ ءمايىتى ەلدىڭ وڭتۇستىگىندەگى ۆيبو-ۆالەنتيا پروۆينتسياسىنا قاراستى برياتيكو قالاسىنىڭ جاعالاۋ جارتاستارى اراسىنان تابىلدى, دەپ حابارلايدى Egemen.kz.
مارقۇم ورالداعى نازارباەۆ زياتكەرلىك مەكتەبىنىڭ تۇلەگى بولعان. جاقىندارىنىڭ الەۋمەتتىك جەلىدە جاريالاعان مالىمەتىنشە, وتباسى ونىڭ ءمايىتىن قازاقستانعا جەتكىزۋ ءۇشىن قاراجات جيناپ جاتىر. الدىن الا ەسەپ بويىنشا تاسىمالداۋ شىعىنى شامامەن 8000 ەۋرونى قۇرايدى.
يتالياندىق باق-تاعى دەرەكتەرگە سايكەس, برياتيكو جاعالاۋىندا تابىلعان ەر ادامنىڭ دەنەسىندە جارتاستارعا سوعىلۋ سالدارىنان جاراقاتتار بولعان. مارقۇمنىڭ جانىنان ۇيالى تەلەفون مەن جەكە زاتتارى تابىلعان.
قاراعاندىداعى جاتاقحانادا 21 جاستاعى شەتەلدىك ستۋدەنت كوز جۇمدى
قازاقستان رەسپۋبليكاسىنىڭ سىرتقى ىستەر مينيسترلىگى وقيعاعا قاتىستى ءمان-جايدىڭ انىقتالىپ جاتقاندىعىن مالىمدەدى.
«قازاقستان رەسپۋبليكاسىنىڭ يتالياداعى ەلشىلىگى مەن يتاليانىڭ قۇزىرەتتى ورگاندارى وقيعانىڭ ءمان-جايىن انىقتاپ جاتىر. ەلىمىزدىڭ ديپلوماتتارى مارقۇمنىڭ تۋىستارىمەن بايلانىستا بولىپ, قاجەتتى كونسۋلدىق-قۇقىقتىق كومەك كورسەتىپ جاتىر», دەلىنگەن ۆەدومستۆو حابارلاماسىندا.
ەسكە سالا كەتەيىك, بۇعان دەيىن قاراعاندىدا ەكى ۇندىستاندىق ستۋدەنت سۋعا باتىپ كەتكەنى تۋرالى قارالى حابار تاراعان ەدى.