بىتىمگەرلىك ميسسيانىڭ قولباسشىسى گەنەرال-مايور انيتا اسما قازاقستاننىڭ اسكەري قىزمەتشىلەرىنە بىتىمگەرلىك ميسسياعا قاتىسقانى ءۇشىن بىرىككەن ۇلتتار ۇيىمىنىڭ مەدالدارىن تابىس ەتتى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
قازاقستاندىق دەربەس بىتىمگەرلىك كونتينگەنت فاۋار بازاسىندا قىزمەت اتقارىپ, سيريا اراب رەسپۋبليكاسىندا ورنالاسقان گولان جوتالارىندا اتىستى توقتاتۋ رەجيمىن قامتاماسىز ەتۋ جونىندەگى مىندەتتەردى بۇۇ-نىڭ اجىراتۋدى قاداعالاۋ كۇشتەرى قۇرامىندا ورىنداپ كەلەدى. بۇۇ مەدالىمەن ميسسيادا قىزمەت اتقارىپ جاتقان بارلىق 139 اسكەري قىزمەتشى ماراپاتتالدى.
قازاقستاندىق اسكەري قىزمەتشىلەر ۇيىم بازالارىن كۇزەتۋ مەن قورعانىسىن كۇشەيتۋدى قامتاماسىز ەتىپ, جەرگىلىكتى تۇرعىندارمەن ءوزارا ءىس-قيمىل جاسايدى جانە جاۋاپكەرشىلىك ايماعىندا تۇراقتىلىقتى ساقتاۋعا باعىتتالعان ءتۇرلى مىندەتتەردى ورىندايدى.
«كونتينگەنتتىڭ جەكە قۇرامى جوعارى كاسىبي دايىندىقتى, ۇيلەسىمدىلىك پەن جەدەل ارەكەت ەتۋ قابىلەتىن كورسەتىپ كەلەدى. بۇۇ مەدالى – ءاربىر اسكەري قىزمەتشىنىڭ باتىلدىعى, ءتارتىبى مەن ءوز ىسىنە ادالدىعىنىڭ, سونداي-اق ميسسيا ايماعىندا بەيبىتشىلىكتى ساقتاۋ ىسىنە قوسقان ۇلەسىنىڭ مويىندالۋى», دەدى بىتىمگەرلىك روتانىڭ كومانديرى پودپولكوۆنيك جانىبەك نۇرلانوۆ.
2025 جىلعى ساۋىردەن بەرى كونتينگەنت اسكەري قىزمەتشىلەرى 55 تاپسىرمانى ورىنداپ, 1200-دەن استام جارىلعىش زات پەن 43 قولدان جاسالعان جارىلعىش قۇرىلعىنى جويدى. جالپى, قازاقستاندىق بىتىمگەرلىك كونتينگەنتتىڭ ەكىنشى قۇرامى ميسسيا باستالعالى بەرى 675 تاپسىرمانى ورىندادى.
قازاقستاننان 750-دەن اسا سارباز بۇۇ بىتىمگەرلىك قىزمەتىنە قاتىستى
ەستەرىڭىزگە سالا كەتسەك, قازاقستان گولان جوتالارىندا العاشقى دەربەس بىتىمگەرلىك كونتينگەنتىن 2024 جىلعى ناۋرىزدا ورنالاستىرعان بولاتىن.
مەملەكەت باسشىسى بىتىمگەرلىك ميسسياسىن اتقارعان اسكەريلەردى ماراپاتتادى