قازاقستاندىق بلوگەر ءارى كاسىپكەر ساۋلە بازارحاننىڭ قايتىس بولۋىنان كەيىن الەۋمەتتىك جەلىلەردە پلاستيكالىق جانە كوسمەتولوگيالىق كلينيكالاردىڭ جۇمىسىنا قاتىستى قىزۋ تالقىلاۋ باستالدى. اسىرەسە, الماتىداعى Smart Beauty Clinic-تە بۇعان دەيىن وسىنداي جاعداي بولعانى, كلينيكانىڭ اتاۋىن وزگەرتىپ قايتا جۇمىسىن جالعاستىرعانى تۋرالى اقپارات تارادى. وسىعان بايلانىستى Egemen.kz ءتىلشىسى دەنساۋلىق ساقتاۋ مينيسترلىگىنە رەسمي ساۋال جولدادى. مينيسترلىك وقيعانى ەرەكشە باقىلاۋعا الىپ, تەكسەرۋدى باستاعانىن مالىمدەدى.
قارالى حاباردى العاش بولىپ پروديۋسەر گۇلزيرا ايداربەكوۆا الەۋمەتتىك جەلىدەگى پاراقشاسىندا راستادى. ول مارقۇمنىڭ «سىڭلىسىندەي جاقىن ادام» بولعانىن ايتىپ, كوڭىل ايتتى.
كەيىن Halyqstan ارناسى بلوگەردىڭ الماتىداعى پلاستيكالىق حيرۋرگيا كلينيكالارىنىڭ بىرىندە كوز جۇمعان بولۋى مۇمكىن ەكەنىن حابارلادى. مالىمەتتەرگە سايكەس, ايەلدىڭ جاعدايى وپەراتسيا باستالماي تۇرىپ ناشارلاعان. سونىمەن قاتار 2GIS پلاتفورماسىندا قولدانۋشىلار ابدومينوپلاستيكا كەزىندە ايەلدىڭ قايتىس بولعانى تۋرالى پىكىرلەر قالدىرعان. الايدا بۇل اقپارات رەسمي تۇردە راستالعان جوق.
بۇدان كەيىن Threads جەلىسىندە مارقۇمنىڭ قىزى جازبا جاريالاپ, 53 جاستاعى ساۋلە ەرماحانوۆانىڭ 15 مامىر كۇنى الماتىداعى جەكەمەنشىك كلينيكادا جەرگىلىكتى انەستەزيامەن جاسالعان جوسپارلى ليپوساكتسيا بارىسىندا قايتىس بولعانىن مالىمدەدى.
تۋىستارىنىڭ ايتۋىنشا, دارىگەرلەر وپەراتسيا ەڭ كوبى ءبىر جارىم ساعاتقا سوزىلاتىنىن ايتقان. الايدا بىرنەشە ساعات بويى جاقىندارىنا پاتسيەنتتىڭ جاعدايى تۋرالى ناقتى اقپارات بەرىلمەگەن.
مارقۇمنىڭ تۋىستارى جەدەل جاردەمنىڭ نە سەبەپتى كەش شاقىرىلعانىن جانە ايەلدىڭ ءومىرىن ساقتاپ قالۋ ءۇشىن قانداي شارالار قابىلدانعانىن انىقتاۋدى تالاپ ەتىپ وتىر. ولاردىڭ سوزىنشە, قايعىلى جاعدايدان كەيىن دە كلينيكا جۇمىسىن جالعاستىرعان.
كەيىن الماتىداعى Smart Beauty Clinic رەسمي مالىمدەمە جاساپ, قازىرگى ۋاقىتتا پاتسيەنت قابىلداۋ ۋاقىتشا توقتاتىلعانىن حابارلادى.
«قازىرگى ۋاقىتتا بولعان جاعدايعا بايلانىستى زاڭنامادا كوزدەلگەن بارلىق راسىمدەر جۇرگىزىلىپ جاتىر. دارىگەرلىك قۇپيانى ساقتاۋ, پاتسيەنتتىڭ وتباسىنا قۇرمەتپەن قاراۋ جانە تەرگەۋدىڭ وبەكتيۆتىلىگى ماقساتىندا رەسمي پروتسەدۋرالار اياقتالعانعا دەيىن وقيعانىڭ ءمان-جايى مەن مەديتسينالىق دەرەكتەرگە قاتىستى تۇسىنىكتەمە بەرمەيمىز», دەلىنگەن كلينيكا حابارلاماسىندا.
الماتى قالالىق پوليتسيا دەپارتامەنتى اتالعان فاكتى بويىنشا بوستاندىق اۋداندىق پوليتسيا باسقارماسى قىلمىستىق ءىس قوزعاعانىن مالىمدەدى.
سونىمەن قاتار الەۋمەتتىك جەلىلەردە ءدال وسى كلينيكادا بەس جىل بۇرىن دا وسىنداي وپەراتسيا كەزىندە ايەل ادامنىڭ قايتىس بولعانى, سول وقيعادان كەيىن مەكەمەنىڭ جابىلىپ, كەيىن باسقا اتاۋمەن قايتا جۇمىسىن جالعاستىرعانى تۋرالى اقپارات تارادى. الايدا بۇل مالىمەتتەر ازىرگە رەسمي تۇردە راستالعان جوق.
وسىعان بايلانىستى رەداكتسيا ءتىلشىسى كوسمەتولوگيالىق جانە پلاستيكالىق حيرۋرگيا قىزمەتىن كورسەتەتىن كلينيكالاردىڭ ليتسەنزياسىن دەنساۋلىق ساقتاۋ مينيسترلىگى قانشالىقتى باقىلاپ, تەكسەرەتىنى جونىندە رەسمي ساۋال جولدادى.
دەنساۋلىق ساقتاۋ مينيسترلىگى اتالعان جاعداي ءمينيستردىڭ ەرەكشە باقىلاۋىنا الىنعانىن حابارلادى.
«دەنساۋلىق ساقتاۋ ءمينيسترىنىڭ تاپسىرماسى بويىنشا بەيىندى ماماندار مەن اۋماقتىق دەپارتامەنتتەردىڭ قاتىسۋىمەن جان-جاقتى تەكسەرۋ جۇرگىزىلەدى. مەديتسينالىق قىزمەتتى جۇزەگە اسىرۋعا ليتسەنزيانىڭ بولۋى, كورسەتىلەتىن قىزمەتتەردىڭ قولدانىستاعى ستاندارتتارعا سايكەستىگى, مەديتسينا قىزمەتكەرلەرىنىڭ بىلىكتىلىگى, سونداي-اق شۇعىل مەديتسينالىق كومەك كورسەتۋ ستاندارتتارى مەن حاتتامالارىنىڭ ساقتالۋى زەردەلەنەدى», دەپ مالىمدەدى مينيسترلىك.
ۆەدومستۆو ينۆازيالىق كوسمەتولوگيالىق پروتسەدۋرالار مەديتسينالىق ارالاسۋعا جاتاتىنىن جانە مۇنداي قىزمەتتەر تەك ليتسەنزياسى بار مەديتسينالىق ۇيىمداردا بىلىكتى مامانداردىڭ قاتىسۋىمەن جۇرگىزىلۋى ءتيىس ەكەنىن ەسكە سالدى.
«تەكسەرۋ قورىتىندىسى بويىنشا زاڭبۇزۋشىلىقتار انىقتالعان جاعدايدا ماتەريالدار قۇقىق قورعاۋ ورگاندارىنا جولدانىپ, قازاقستان رەسپۋبليكاسىنىڭ زاڭناماسىنا سايكەس ءتيىستى شارالار قابىلدانادى», دەلىنگەن مينيسترلىك جاۋابىندا.
سونداي-اق مينيسترلىك كوسمەتولوگيالىق قىزمەت كورسەتەتىن ۇيىمدارعا جۇرگىزىلەتىن مونيتورينگ كۇشەيتىلەتىنىن اتاپ ءوتتى. ۆەدومستۆو پاتسيەنتتەردىڭ قاۋىپسىزدىگىنە, مەديتسينالىق ستاندارتتاردىڭ ساقتالۋىنا جانە رۇقسات قۇجاتتارىنىڭ بولۋىنا ەرەكشە نازار اۋدارىلاتىنىن مالىمدەدى.