مەملەكەت باسشىسى مادەنيەت جانە ونەر قىزمەتكەرلەرىن ماراپاتتاۋ راسىمىندە ءتول مادەنيەتىمىزدىڭ ءورىسىن كەڭەيتىپ, حالقىمىزدىڭ رۋحاني دۇنيەتانىمىن بايىتۋ جولىندا جەمىستى ەڭبەك ەتىپ جۇرگەن ءبىر توپ ازاماتتى جوعارى مەملەكەتتىك ناگرادالارمەن ماراپاتتاۋ تۋرالى شەشىم قابىلداعانىن جەتكىزدى, دەپ حابارلايدى Egemen.kz.
«قازىر ءبىزدىڭ ورتامىزدا بەلگىلى ءانشى ءارى دومبىراشى تاتيانا نيكولاەۆنا بۋرميستروۆا وتىر. ول جارتى عاسىرعا جۋىق ۋاقىت بويى قازاقتىڭ ءداستۇرلى ونەرىن بەلسەندى تۇردە كەڭىنەن دارىپتەپ, جاس دارىندارعا ۇلگى-ونەگە كورسەتىپ ءجۇر. بۇگىن مەن تاتيانا بۋرميستروۆاعا ەڭ جوعارى «وتان» وردەنىن بەرۋ تۋرالى جارلىققا قول قويدىم. سونىمەن قاتار بۇگىن جەزتاڭداي ءانشى, حالقىمىز, اسىرەسە, ايەلدەر قاۋىمى جاقسى كورەتىن ونەر يەسى, قازاقستاننىڭ حالىق ءارتىسى ماقپال جۇنىسوۆاعا ەكىنشى دارەجەلى «بارىس» وردەنىن تاپسىرامىن. ميحايل لەرمونتوۆ اتىنداعى ۇلتتىق ورىس دراما تەاترىنىڭ اكتريساسى مارينا يۋرەۆنا گانتسەۆا III دارەجەلى «بارىس» وردەنىمەن ماراپاتتالادى. ول قازاقستان مادەنيەتىنىڭ دامۋىنا ەلەۋلى ۇلەس قوستى. تالانتى مەن كوپجىلدىق ەڭبەگىنىڭ ارقاسىندا تەاتر ونەرىن باعالايتىن كورەرمەننىڭ ىقىلاسى مەن سۇيىسپەنشىلىگىنە بولەندى. كاسىبي مەرەكە كۇنى مادەنيەتىمىزدىڭ دامۋىنا زور ەڭبەك سىڭىرگەن بىرنەشە ونەر قايراتكەرىنە «قازاقستاننىڭ حالىق ءارتىسى» اتاعى بەرىلەدى. جالپى, بيىل ەلىمىزدە 120 مادەنيەت جانە ونەر قىزمەتكەرى مەملەكەتتىك ماراپاتقا يە بولادى», دەدى مەملەكەت باسشىسى.
ىبىقتى ساي شاتقالىنداعى وقيعا بويىنشا قاتاڭ قورىتىندى شىعارۋ كەرەك: پرەزيدەنت ۆانداليزم تۋرالى
مەملەكەت باسشىسى الدىمىزدا ادىلەتتى, تازا, مادەنيەتتى, وركەنيەتتى, تۇپتەپ كەلگەندە, وزىق ويلى قازاقستاندى قۇرۋ مىندەتى تۇرعانىن ەسكە سالدى.
ء«بىز مۇنىڭ اسا جاۋاپتى ءارى وتە كۇردەلى مىندەت ەكەنىن جاقسى تۇسىنەمىز. حالقىمىز «ارەكەت ءتۇبى – بەرەكەت» دەپ بەكەر ايتپاعان. شىن مانىندە, وزىق جانە ناعىز دامىعان ەل بولامىز دەسەك, ەڭ الدىمەن, قوعامدا جاڭا مادەنيەت قالىپتاستىرۋىمىز قاجەت. ەڭبەكقورلىق, بىلىمپازدىق, جاسامپازدىق, جاناشىرلىق, وتانشىلدىق قاسيەتتەرىن وسكەلەڭ ۇرپاقتىڭ بويىنا ءسىڭىرۋىمىز كەرەك. مۇنىڭ ءبارىن كۇندەلىكتى قاجىرلى ەڭبەكپەن, ناقتى ىسپەن كورسەتۋىمىز قاجەت. زاڭ مەن ءتارتىپ قاعيداتى مادەنيەتى جوعارى قوعامدا عانا بەرىك ورنىعادى. بۇل – اقيقات. وسى ماڭىزدى جۇمىسقا سىزدەر دە ەلەۋلى ۇلەس قوسىپ جۇرسىزدەر, بولاشاقتا دا سولاي بولادى دەپ سەنەمىن», دەدى پرەزيدەنت.
«اسىل مۇرا» ۇلتتىق سىيلىعى تاعايىندالادى
پرەزيدەنت ءتول مادەنيەتىمىز تۇركى وركەنيەتىنىڭ اجىراماس بولىگى سانالاتىنىن جەتكىزدى.
«مەن بيىل ۇلىستىڭ ۇلى كۇنىندە كيەلى تۇركىستان جەرىندە مەملەكەتتىك ناگرادالار قاتارىنا Qoja Ahmet Yasaui وردەنىن ەنگىزۋ تۋرالى ماڭىزدى باستاما كوتەردىم. بۇل ماراپات قازاقستاننىڭ دامۋىنا ايرىقشا ەڭبەك سىڭىرگەن ەلىمىزدىڭ جانە شەتەلدىڭ بەلگىلى عالىمدارىنا, مەملەكەت جانە قوعام قايراتكەرلەرىنە بەرىلەتىن بولدى. وسى جوعارى ماراپاتتى وتكەن اپتادا ءبىرىنشى بولىپ تۇركيا پرەزيدەنتى رەجەپ تايپ ەردوعانعا جانە وسىدان ەكى كۇن بۇرىن يۋنەسكو-نىڭ بۇرىنعى باس ديرەكتورى ودرە ازۋلە حانىمعا تابىستادىم. ازۋلە حانىم كەزىندە قازاقستان مەن يۋنەسكو-نىڭ ىنتىماقتاستىعىن نىعايتۋعا زور ەڭبەك ءسىڭىردى, اسىرەسە, قوجا احمەت ياساۋي كەسەنەسىنە قاتىستى جۇمىسقا بەلسەنە اتسالىستى. مۇنى ەرەكشە اتاپ وتكىم كەلەدى. سوندىقتان ءبىز تۇركى بىرلىگىن نىعايتۋعا, ۇلت مادەنيەتىن دارىپتەۋگە مول ۇلەس قوسقان شەتەلدىك ارىپتەستەرىمىزدىڭ ەڭبەگىن ءاردايىم جوعارى باعالايمىز. سونىمەن قاتار بۇگىن مەن ۇلت ونەرىنە ەلەۋلى ۇلەس قوسىپ جۇرگەن بىرنەشە ازاماتقا پاتەر كىلتىن تابىستايمىن. 2024 جىلدان باستاپ وسى كۇنگە دەيىن مادەنيەت جانە ونەر قايراتكەرلەرىنە جالپى سانى 200 پاتەر بەرىلدى. بۇل يگى ءۇردىس مىندەتتى تۇردە ءوز جالعاسىن تابادى. بارشاڭىزعا قۇتتى بولسىن! ءتول ونەرىمىز وركەندەي بەرسىن! ۇلت مادەنيەتىنىڭ مارتەبەسى ءاردايىم بيىك بولسىن!», دەدى قاسىم-جومارت توقاەۆ.
ايتا كەتەيىك, مەملەكەت باسشىسى ونەرپازدارعا بەرىلەتىن مەملەكەتتىك ستيپەنديا كولەمى ەكى ەسە وسەتىنىن ايتتى.