اۋىل كاسىپكەرلەرىنە قوماقتى كومەك

«اۋىل اماناتى» باعدارلاماسى تۇركىستان وبلىسىندا اۋىل ەكونوميكاسىن دامىتۋعا, تۇرعىنداردى تۇراقتى جۇمىسپەن قامتۋعا ۇلەس قوسىپ كەلەدى. 2023–2025 جىلدارى اتالعان جوبانى ىسكە اسىرۋ ءۇشىن رەسپۋبليكالىق بيۋدجەتتەن جالپى سوماسى 30,2 ملرد تەڭگە ءبولىندى. ونىڭ ىشىندە 2023 جىلى – 19,8 ملرد تەڭگە, 2024 جىلى 3 ملرد تەڭگە تولىق يگەرىلگەن. بىلتىر 7,4 ملرد تەڭگە ءبولىنىپ, 3,5 ملرد تەڭگەگە 401 جوبا قارجىلاندىرىلدى. قا­راجات 3 ترانش بويىنشا ءبولىنىپ, قالعان 3,9 ملرد تەڭگە 2026 جىلعى ناۋرىزدىڭ سوڭىنا دەيىن اۋدان اكىمدىكتەرىنىڭ ناقتى ۇسىنىستارى مەن سكرينينگ ناتيجەسىنە سايكەس تولىق يگەرىلەدى.

باعدارلاما شەڭبەرىندە 2023–2025 جىلدار ارالىعىندا كەلەس اۋدانىندا 339 جوبا قار­جى­لاندىرىلىپ, ناتيجەسىندە, 750 جاڭا جۇمىس ورنى اشىلدى. اۋىل تۇرعىندارى قولعا العان جوبالار نەگىزىنەن مال شارۋاشىلىعى مەن ەگىنشىلىكتى دامىتۋعا, جىلىجاي شارۋا­شى­لىعىن كەڭەيتۋگە, بالىق پەن قۇس ءوسىرۋدى جولعا قويۋعا باعىت­تالدى. سونىمەن قاتار اۋىل شارۋا­شىلىعى كووپەراتيۆتەرى قاجەتتى تەحنيكامەن, قۇرال-جاب­دىقتارمەن قامتاماسىز ەتىلىپ, تۇرعىنداردىڭ جەكە كاسىبىن باستاۋىنا مۇمكىندىك جاسالدى. وسى كەزەڭدە ايماقتا بىرنەشە شاعىن ءوندىرىس ورنى دا ىسكە قوسىلدى. 2026 جىلعا وڭدەۋ سالاسىنا باسىمدىق بەرىلىپ, كەمىندە ءتورت كووپەراتيۆ قۇرۋ جوسپارلانىپ وتىر. وسى ماقساتتا اباي ­اۋىلىندا ءسۇت ءوندىرۋ كووپەراتي­ۆىن, ال بىرلەسۋ اۋىلدىق وكرۋگىندە قۇلپىناي ءوسىرۋ كووپەراتيۆىن قۇرۋ بويىنشا قاجەتتى قۇجاتتار ءتيىستى مەكەمەلەرگە جولدانعان.

 ال بىرلىك اۋىلدىق وكرۋگىندە وندىرىستىك پارك اشۋ ءۇشىن ارنايى جەر ۋچاسكەسى بەلگىلەندى. مۇندا ء«بىر اۋىل – ءبىر ءونىم» قا­عيداتى بويىنشا جەمشوپ دا­يىندايتىن تسەح سالۋ مەن مال بور­داقىلاۋ الاڭدارىن بىرىڭعاي ۇلگى­دە ورنالاستىرۋ كوزدەلىپ وتىر. اقتوبە اۋىلدىق وكرۋگىندە بالىق شارۋاشىلىعىن دامىتۋ جونىندە ۇسىنىستار بەرىلىپ, الداعى ۋاقىتتا بالىق ونىمدەرىن ساتاتىن شاعىن ساۋدا نۇكتەسىن اشۋ جوسپارلانعان.

اتالعان جوبانىڭ ىسكە اسىرىلۋ بارىسى تالقىلانعان جيىندا وبلىس اكىمى نۇرالحان كوشەروۆ ناقتى ناتيجە مەن ساپاعا ءمان بەرۋ كەرەكتىگىن ايتىپ, جاۋاپتىلارعا ءتيىستى تاپسىرمالار بەردى. «2026 جىلى «اۋىل اماناتى» ارقىلى 15,3 ملرد تەڭگە قاراجات تارتۋ جوسپارلانۋدا. بۇل – جاقسى كورسەتكىش, دەگەنمەن 1 115 جاڭا جوبا بويىنشا 1 400 عانا جۇمىس ورنىن اشۋدى از دەپ سانايمىن. قارجىنى الىپ, جوبا باستاعان كاسىپكەرلەر تۇراقتى جاڭا جۇمىس ورىندارىن اشۋى قاجەت. بيىل بولىنگەن قارجى باعىتتالاتىن اۋىلدىق وكرۋگتەر كووپەراتيۆتەر ءتىزىمى مەن جوسپارىن بەكىتۋدى شۇعىل قولعا الىپ, 1 ناۋرىزعا دە­يىن اياقتاڭىزدار. جوبا بويىنشا بولىنگەن قارجى ۋاقتىلى ءارى ساپالى يگەرىلىپ, حالىقتىڭ جاعدايىن جاقسارتۋعا تىكەلەي اسەر ەتۋگە ءتيىس», دەدى ن.كوشەروۆ.

«تۇركىستان» اكك» اق باس­قارما توراعاسى بەكجان بيسەن­باەۆتىڭ ايتۋىنشا, 6 باعىت بويىنشا 3 902 جوباعا جالپى 26,3 ملرد تەڭگە نەسيە بەرىلگەن. ناتيجەسىندە, وبلىس­تا شاعىن كاسىپكەرلىك 3 902 بىر­لىك­كە ارتتى, 25 گەكتار اۋماقتا ­513 جىلىجاي كەشەنى سالىندى, ­مال باسى 74 109-عا كوبەيگەن. سونى­مەن قاتار 39 قايتا وڭدەۋ كاسىپ­ورنى ىسكە قوسىلىپ, 4 190 جاڭا جۇ­مىس ورنى اشىلدى. جۇمىس ورىن­دارى­نىڭ كوبەيۋىنە بايلانىستى اتاۋلى الەۋمەتتىك كومەك الۋشىلار سانى 441 ادامعا قىسقاردى. جوبالار ارقىلى جىل سايىن شامامەن 30 ملرد تەڭگەنىڭ اۋىل شارۋاشىلىعى ءونىمى ءوندىرىلىپ جاتىر.

باعدارلاما اياسىندا بۇگىندە 4,8 ملرد تەڭگە قايتارىلعان, ونىڭ 4,6 ملرد تەڭگەسى قايتا اينالىمعا جىبەرىلدى. بۇل قاراجات ەسەبىنەن 579 جاڭا جوبا قارجىلاندىرىلىپ, 600 جاڭا جۇمىس ورنى اشىلدى. جەكە قوسالقى شارۋاشىلىقتاردى بىرىكتىرىپ, كووپەراتيۆتەر قۇرۋعا ەرەكشە كوڭىل ءبولىنىپ كەلەدى. ءۇش جىل ىشىندە 103 كووپەراتيۆكە 2,5 ملرد تەڭگە نەسيە بەرىلدى.

وڭىردە ءونىم وندىرۋدەن باستاپ ونى وڭدەۋ جانە نارىققا وتكىزۋگە دەيىنگى تولىق وندىرىستىك تسيكلدى قامتيتىن تابىستى كووپەراتيۆتەر قالىپتاستى. اتاپ ايتقاندا, «مايتوبە ءسۇت» كووپەراتيۆى ءسۇت جيناۋ مەن ونى قايتا وڭدەۋ جەلىسىن ىسكە قوسىپ, ونىمدەرىن الەۋمەتتىك مەكەمەلەرگە جەتكىزىپ وتىر. «ايات-اگرو.سوم» كووپەراتيۆى جەمىس-كوكونىس وڭدەۋ تسەحىن كەڭەيتىپ, ونىم­دەرىن شەتەل نارىعىنا ەكس­پورت­تاپ كەلەدى. ورداباسى اۋدا­نى­نىڭ شۇبارسۋ اۋىلىندا 27 جى­لى­جاي ىسكە قوسىلىپ, جىلىنا 580 توننا ءونىم وندىرەدى. جالپى, 2026–2028 جىلدارى «اۋىل اماناتى» باعدارلاماسى اياسىندا 68,7 ملرد تەڭگە تارتۋ جوسپارلانىپ وتىر.

تۇركىستان وبلىسى