وسىدان بەس كۇن بۇرىن اقش-تا وتكەن Regeneron ISEF 2026 الەمدەگى ەڭ ءىرى عىلىمي جوبالار بايقاۋىندا جاساندى ينتەللەكت كومەگىمەن قاتەرلى ىسىكتى انىقتاۋ جۇيەسىن ازىرلەگەن قازاقستاندىق وقۋشى ماراپاتقا يە بولعان ەدى. بۇگىن قازاقستاندىق وقۋشىلاردىڭ تاعى ەكى جوباسى جاساندى ينتەللەكت سالاسىنداعى جەتەكشى حالىقارالىق ۇيىمداردىڭ ءبىرى Association for the Advancement of Artificial Intelligence, قىسقاشا AAAI, ارنايى ماراپاتتارىنا يە بولدى, حابارلايدى Egemen.kz
KazLib جوباسى اكادەميالىق جوسپارلاۋ جانە وقۋ ۇلگەرىمىن مودەلدەۋگە ارنالعان تسيفرلىق پلاتفورما رەتىندە AAAI Student Membership ماراپاتىن الدى. جوبانىڭ اۆتورلارى تالدىقورعان قالاسىنداعى ء«بىلىم-يننوۆاتسيا» مامانداندىرىلعان ليتسەي-ينتەرناتىنىڭ وقۋشىلارى اسلان باشاروۆ پەن بولىسباي نۇركەلدى.
️ەكىنشى جوبا Neuralese نەيروندىق جەلىلەردى ازىرلەۋگە ارنالعان ۆيزۋالدى-ينتەراكتيۆتى پلاتفورما رەتىندە بىردەن ەكى ارنايى ماراپاتقا يە بولدى. ولار AAAI Membership جانە School Library Membership ماراپاتتارى. جوبانى الماتى قالاسىنداعى پانفيلوۆ اتىنداعى №54 قازاقستان-رەسەي مەكتەپ-ليتسەيىنىڭ وقۋشىلارى ميحايل يساكوۆ پەن راحيم نۇرمۇحانبەتوۆ ۇسىندى.
️جاڭا ماراپاتتار قازاقستاندىق وقۋشىلاردىڭ جوعارى دايىندىق دەڭگەيىن جانە ەلىمىزدىڭ جاساندى ينتەللەكت پەن تسيفرلىق يننوۆاتسيالار سالاسىنداعى الەۋەتى ارتىپ كەلە جاتقانىن تاعى ءبىر مارتە دالەلدەدى. بۇگىندە قازاقستاندىق وقۋشىلار الەمدەگى ەڭ ءىرى عىلىمي جارىستارعا قاتىسىپ قانا قويماي, ولاردىڭ جوبالارى حالىقارالىق ساراپشىلار قاۋىمداستىعى تاراپىنان جوعارى باعالانىپ, وتاندىق ءبىلىمنىڭ جاھاندىق دەڭگەيدەگى باسەكەگە قابىلەتتىلىگىن كورسەتىپ وتىر.
️ايتا كەتەيىك, Regeneron ISEF الەمدەگى ەڭ ءىرى وقۋشىلارعا ارنالعان عىلىمي جانە ينجەنەرلىك جوبالار بايقاۋى بولىپ سانالادى. ول جىل سايىن ونداعان ەلدەن ۇزدىك جاس زەرتتەۋشىلەردى بىرىكتىرەدى. بيىل بايقاۋ اقش-تىڭ فينيكس قالاسىندا ءوتتى. بيىل قازاقستان اتىنان بەس عىلىمي جوبا ۇسىنىلىپ, ولاردىڭ ۇشەۋى حالىقارالىق كونكۋرستىڭ ارنايى ماراپاتتارىنا يە بولدى.