ۇلتتىق بانك جۇرگىزگەن ساۋالناما ناتيجەسى بويىنشا, 2026 جىلدىڭ ءبىرىنشى توقسانىندا ەلدەگى نەسيەگە سۇرانىس بىرقاتار باعىتتا تومەندەگەن. اسىرەسە يپوتەكا مەن اۆتونەسيە سەگمەنتىندە بەلسەندىلىك باسەڭدەگەنى بايقالادى, دەپ حابارلايدى Egemen.kz.
ۇلتتىق بانك مالىمەتىنشە, ءىرى بيزنەس تاراپىنان كرەديتتىك وتىنىمدەر سانى توقساندىق كورسەتكىشپەن 16 پايىزعا ءوسىپ, 238-گە جەتكەن. سونىمەن قاتار وتىنىمدەردىڭ ورتاشا كولەمى 18,8 ملرد تەڭگەنى قۇراعان. بانكتەر مۇنى ستراتەگيالىق جوبالاردى قارجىلاندىرۋعا قىزىعۋشىلىقتىڭ ارتۋىمەن بايلانىستىرادى.
ۇلتتىق بانكتىڭ قارجىلىق تۇراقتىلىق جانە زەرتتەۋلەر دەپارتامەنتىنىڭ ديرەكتورى ولجاس كۋبەنباەۆتىڭ ايتۋىنشا, ورتا جانە شاعىن بيزنەس سەگمەنتىندە سۇرانىس ءبىرشاما ازايعان. بۇعان مەملەكەتتىك قولداۋ باعدارلامالارى اياسىنداعى قاراجاتتى يگەرۋ جانە جىل باسىنداعى ماۋسىمدىق فاكتورلار اسەر ەتكەن.
تابىسىنان 8 ەسە كوپ قارىزى بارلارعا نەسيە بەرىلمەيدى: ۇلتتىق بانك جاڭا شەكتەۋ ەنگىزەدى
شاعىن كاسىپكەرلىك سالاسىندا وتىنىمدەر سانى 5 پايىزعا تومەندەپ, 912 مىڭ بولعان. ورتا بيزنەس بويىنشا كەرىسىنشە وتىنىمدەر كولەمى تسيفرلىق ونىمدەردىڭ ەسەبىنەن 5 پايىزعا ارتقان.
يپوتەكالىق نەسيەگە سۇرانىس تا تومەندەگەن. بانكتەردىڭ ايتۋىنشا, وعان سىياقى مولشەرلەمەسىنىڭ كوتەرىلۋى جانە تۇرعىن ءۇيدى پايدالانۋعا بەرۋ كولەمىنىڭ ازايۋى سەبەپ بولعان. ناتيجەسىندە يپوتەكالىق وتىنىمدەر سانى 21 پايىزعا قىسقارىپ, 191 مىڭعا جەتتى. ورتاشا قارىز كولەمى 20,5 ملن تەڭگەنى قۇراعان.
اۆتونەسيە نارىعىندا دا بەلسەندىلىك باسەڭدەگەن. بۇل جاڭا كولىك باعاسىنىڭ ارزانداۋى جانە اۆتوديلەرلەر ۇسىناتىن جەڭىلدەتىلگەن باعدارلامالارعا سۇرانىستىڭ ازايۋىمەن ءتۇسىندىرىلدى. اۆتونەسيە بويىنشا وتىنىمدەر سانى 20 پايىزعا ازايىپ, 1,2 ملن بولعان.
قازاقستان كريپتوحابقا اينالادى: پرەزيدەنت ۇكىمەت پەن ۇلتتىق بانككە شۇعىل تاپسىرما بەردى
سونىمەن قاتار كەپىلسىز تۇتىنۋشىلىق نەسيەلەرگە سۇرانىس ايتارلىقتاي وزگەرمەگەن. بۇل سەگمەنتتە وتىنىمدەر سانى 16,1 ملن دەڭگەيىندە ساقتالعان.
2026 جىلدىڭ ەكىنشى توقسانىندا بانكتەر ىسكەرلىك بەلسەندىلىكتىڭ ارتۋىنا بايلانىستى ءىرى بيزنەس تاراپىنان نەسيەگە سۇرانىس وسەدى دەپ كۇتەدى. ال يپوتەكالىق نارىقتا دا سۇرانىستىڭ قايتا جاندانۋ ىقتيمالدىعى بار.