اقتاۋدا پلاستيكالىق حيرۋرگيا كلينيكاسىنا جۇگىنگەن ماڭعىستاۋ وبلىستىق ءماسليحاتىنىڭ دەپۋتاتى ەربول ايتۋوۆ كوز جۇمدى, دەپ حابارلايدى Egemen.kz.
49 جاستاعى دەپۋتات كلينيكاعا يەك تۇسىنا ليپوساكتسيا جاساتۋ ءۇشىن بارعان. وپەراتسيا 4 ساۋىرگە جوسپارلانعان, الايدا ناركوز ەنگىزۋ كەزىندە ناۋقاستىڭ جاعدايى كۇرت ناشارلاعان.
مارقۇمنىڭ جۇبايىنىڭ ايتۋىنشا, بۇعان ينتۋباتسيانىڭ دۇرىس جاسالماۋى سەبەپ بولۋى مۇمكىن. سونىڭ سالدارىنان قان قىسىمى مەن قانداعى قانت دەڭگەيى كۇرت كوتەرىلىپ, يشەميالىق ينسۋلت بولعان. ەر ادام كوماعا ءتۇسىپ, ءبىر ايدان كەيىن قايتىس بولعان.
دەنساۋلىق ساقتاۋ مينيسترلىگى كلينيكاعا جوسپاردان تىس تەكسەرۋ جۇرگىزىپ, وپەراتسيالىق بلوك تولىق جابدىقتالماعانىن, كەيبىر قۇرالداردىڭ جارامدىلىق مەرزىمى ءوتىپ كەتكەنىن انىقتاعان. بۇدان بولەك, كلينيكادا ەرەسەكتەرگە ارنالعان انەستەزيولوگيا جانە رەانيماتسيا ليتسەنزياسى جوق ەكەنى انىقتالعان.
ەربول ايتۋوۆ ماڭعىستاۋ وبلىستىق ءماسليحاتىنىڭ دەپۋتاتى بولعان. 2023 جىلدان بەرى ماڭعىستاۋ وبلىسى كاسىپكەرلەر پالاتاسىندا وڭدەۋ ونەركاسىبى جانە بازالىق سالالار كوميتەتىن باسقارعان.
ايتا كەتەيىك, بۇعان دەيىن الماتىداعى جەكە كلينيكادا ليپوساكتسيادان كەيىن بلوگەر ءارى كاسىپكەر ساۋلە ەرماحانوۆا دا قايتىس بولعان ەدى. كاسىپكەردىڭ ولىمىنە قاتىستى دەنساۋلىق ساقتاۋ مينيسترلىگى تەكسەرۋ جۇرگىزەتىنىن مالىمدەگەن بولاتىن.