قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-لەيتەنانت شىڭعىس ءارىنوۆ جۇمىس ساپارى بارىسىندا اتىراۋ وبلىسىنداعى سولتۇستىك كاسپي ەكولوگيالىق دەن قويۋ بازاسىنا باردى, دەپ حابارلايدى Egemen.kz
ۆەدومستۆو باسشىسىنا كاسپي تەڭىزىنىڭ قازاقستاندىق سەكتورىندا مۇنايدىڭ اۆاريالىق توگىلۋىن جويۋعا, اۆاريالىق-قۇتقارۋ جانە ىزدەستىرۋ-قۇتقارۋ وپەراتسيالارىن جۇرگىزۋگە ارنالعان مامانداندىرىلعان كەمەلەر, تەحنيكا مەن جابدىقتار تانىستىرىلدى. سونىمەن قاتار تەڭىز فلوتىنىڭ اكۆاتورياعا جەدەل شىعۋعا دايىندىعىنا جانە ءوڭىردىڭ بەيىندى ينفراقۇرىلىمىنىڭ جاعدايىنا ەرەكشە نازار اۋدارىلدى.
بۇعان دەيىن قازاقستان رەسپۋبليكاسى پرەزيدەنتىنىڭ تاپسىرماسىمەن كاسپيدەگى ەكولوگيالىق قاۋىپسىزدىك جۇيەسىن كۇشەيتۋ جانە ۇلتتىق تەڭىز اۆاريالىق-قۇتقارۋ ينفراقۇرىلىمىن دامىتۋ مىندەتى قويىلعان بولاتىن. وسى تاپسىرمالاردى ورىنداۋ اياسىندا تەڭىزدەگى توتەنشە جاعدايلارعا دەن قويۋدى, اۆاريالىق-قۇتقارۋ جانە ىزدەستىرۋ-قۇتقارۋ جۇمىستارىن جۇرگىزۋدى, مۇنايدىڭ اۆاريالىق توگىلۋىن جويۋدى جانە كاسپي تەڭىزى اكۆاتورياسىن ەكولوگيالىق قاۋىپتەردەن قورعاۋدى قامتاماسىز ەتەتىن «تەڭىز جاساعى» اق قۇرىلدى.
ساپار بارىسىندا «پريمورسكي» كانالى مەن دەن قويۋ بازاسىنا باراتىن سۋ جولدارىنىڭ كەمە قاتىناسىنا جارامدىلىعىن قامتاماسىز ەتۋ ماسەلەلەرى قارالدى. كاسپي تەڭىزى دەڭگەيىنىڭ تومەندەۋى جاعدايىندا بۇل شارالار مامانداندىرىلعان كەمەلەردىڭ تۇراقتى جۇمىسى مەن تاۋلىك بويى توتەنشە جاعدايلارعا جەدەل دەن قويۋ ءۇشىن ەرەكشە ماڭىزعا يە بولدى. ءمينيستردىڭ تاپسىرماسى بويىنشا قازاقستان تجم ۇيلەستىرۋىمەن 2026 جىلعى ناۋرىز ايىنان باستاپ كانالدى كەڭەيتۋ, تەرەڭدەتۋ, مەليوراتسيالاۋ جانە اباتتاندىرۋ بويىنشا اۋقىمدى جۇمىستار جۇرگىزىلدى. بارلىق ءىس-شارالار بيۋدجەت قاراجاتىن تارتۋسىز ورىندالدى. جۇرگىزىلگەن جۇمىستار كانالدىڭ تولىق تازارتىلۋىنا جانە مامانداندىرىلعان فلوتتى ودان ءارى پايدالانۋ ءۇشىن سۋ مارشرۋتىنىڭ تولىققاندى جۇمىسىن قالپىنا كەلتىرۋگە مۇمكىندىك بەردى.
ءىس-شاراعا اتىراۋ وبلىسى اكىمىنىڭ ورىنباسارى قايرات نۇرتاەۆ پەن NCOC كومپانياسى باسقارۋشى ديرەكتورىنىڭ ورىنباسارى جاندوس ورازاليەۆ قاتىستى. قايرات نۇرتاەۆ كانالدىڭ تازارتىلۋىن ءوڭىر ءۇشىن تاريحي وقيعا ءارى تەڭىز ينفراقۇرىلىمىنىڭ تۇراقتى جۇمىسىن قامتاماسىز ەتۋدەگى ماڭىزدى قادام دەپ اتادى. سولتۇستىك كاسپي جوباسىنىڭ باسشىلىعى ەكولوگيالىق جانە ونەركاسىپتىك قاۋىپسىزدىك سالاسىنداعى ءتيىمدى ىنتىماقتاستىق ءۇشىن توتەنشە جاعدايلار مينيسترلىگىنە العىس ءبىلدىردى. ساپار قورىتىندىسى بويىنشا تجم باسشىسى كاسپي وڭىرىندەگى تەڭىز اۆاريالىق-قۇتقارۋ ينفراقۇرىلىمىن دامىتۋ جانە دەن قويۋ الەۋەتىن كۇشەيتۋ ۆەدومستۆو جۇمىسىنىڭ باسىم باعىتتارىنىڭ ءبىرى بولىپ قالا بەرەتىنىن اتاپ ءوتتى.