«ەلىماي» فۋتبول كلۋبى جاڭا ماۋسىمعا دايىندىعىن تانىستىردى

ايتۋلى جيىنعا اباي وبلىسى اكىمىنىڭ ورىنباسارى مەيىرلان راحانوۆ, «ەلىماي» فك باسقارما توراعاسى اسقار ۇرانحاەۆ, KAZ Minerals توبى باسقارما توراعاسىنىڭ ورىنباسارى ەلدار مامەدوۆ, فۋتبول ارداگەرلەرى مەن جانكۇيەرلەر قاتىستى.

كوماندانىڭ باس باپكەرى اندرەي كارپوۆيچ كلۋبتىڭ جاڭارتىلعان قۇرامىن تانىستىرىپ, الداعى ماۋسىمعا قاتىستى سۇراقتارعا جاۋاپ بەردى. سونىمەن قاتار ول اباي وبلىسىنىڭ اكىمى بەرىك ۋاليگە جانە KAZ Minerals كومپانياسىنا العىسىن ءبىلدىردى.

«اتالعان كومپانيا كلۋبتىڭ سەرىكتەسى رەتىندە كومپانيا جۇمىس ىستەيتىن وڭىرلەردە سپورت پەن الەۋمەتتىك باستامالاردى جۇيەلى تۇردە قولداپ كەلەدى. «ەلىماي» فك-مەن سەرىكتەستىك فۋتبول ينفراقۇرىلىمىن دامىتۋعا, جاس سپورتشىلاردى قولداۋعا جانە سالاۋاتتى ءومىر سالتىن ناسيحاتتاۋعا باعىتتالعان», دەدى باس باپكەر.

ءىس-شارا بارىسىندا جاسوسپىرىمدەر جانە بالالار فۋتبولىن دامىتۋعا ەرەكشە نازار اۋدارىلدى. ۇيىمداستىرۋشىلار «ەلىماي» فۋتبول ورتالىعى اباي وبلىسىنىڭ جاڭا بۋىن سپورتشىلارىن تاربيەلەيتىن ماڭىزدى الاڭعا اينالىپ كەلە جاتقانىن اتاپ ءوتتى. بۇگىندە كلۋب تەك سپورتتىق جوبا عانا ەمەس, سونىمەن قاتار ءوڭىردىڭ قوعامدىق جانە مادەني ءومىرىنىڭ ءبىر بولىگىنە اينالدى.

«ەلىماي» فك-نىڭ جاڭارتىلعان قۇرامىنىڭ تانىستىرىلىمى – اباي وبلىسى ءۇشىن جاڭا فۋتبول ءداۋىرىنىڭ باستالعانىن شىنايى سەزىنەتىن ەرەكشە ءسات. بۇگىندە كلۋبتىڭ اينالاسىندا ايرىقشا ەنەرگيا, ۇلكەن ءۇمىت جانە جانكۇيەرلەردىڭ شىنايى قىزىعۋشىلىعى قالىپتاسىپ وتىر. بۇل زاڭدىلىق. ويتكەنى بيىل «ەلىماي» مۇلدە جاڭا دەڭگەيگە كوتەرىلىپ كەلەدى – پرەمەر-ليگانىڭ فاۆوريتتەرىنىڭ ءبىرى ءارى كونفەرەنتسيا ليگاسىنىڭ ىرىكتەۋ كەزەڭىنە قاتىسۋشى كلۋب رەتىندە. ءبىز ءۇشىن بۇل جاي عانا كلۋبتى قولداۋ ەمەس. بۇگىندە KAZ Minerals «ەلىمايدى» ستراتەگيالىق سەرىكتەس رەتىندە قولداپ قانا قويماي, كلۋبتى دامىتۋ مەن باسقارۋ پروتسەستەرىنە دە بەلسەندى قاتىسىپ وتىر. ماقساتىمىز – ۇزاق مەرزىمدى ءارى تۇراقتى فۋتبول جوباسىن بىرگە قالىپتاستىرۋ. بۇل ادامداردى بىرىكتىرەتىن, بالالارعا شابىت بەرەتىن جانە وڭىرگە ماقتانىش سىيلايتىن اۋقىمدى جۇمىس», دەدى ەلدار مامەدوۆ.

KAZ Minerals توبى باسقارما توراعاسىنىڭ ورىنباسارى جانە ستراتەگيالىق جوبالار جونىندەگى ديرەكتورىنىڭ ايتۋىنشا, الدا  جاڭا اكادەميالار اشىلىپ, بالالار سەكتسيالارى كوبەيەدى, ال جاسوسپىرىمدەردە ءبىر كۇنى «ەلىماي» ساپىندا الاڭعا شىعۋ ارمانى پايدا بولادى.

«كومانداعا جارقىن ماۋسىم, ادەمى ويىن, مىنەز جانە ۇلكەن جەڭىستەر تىلەيمىز. ەڭ باستىسى – فۋتبولدى شىنايى ءتىرى ەتەتىن جانكۇيەرلەرمەن بايلانىستى جوعالتپاۋ. ءبىز وسى تاريحتىڭ ءبىر بولىگى بولعانىمىزعا قۋانىشتىمىز جانە بۇكىل وبلىسپەن بىرگە جاڭا ماتچتار مەن جاڭا ەموتسيالاردى كۇتەمىز», دەدى ول.

راسىندا «ەلىماي» فك كلۋب اينالاسىنا ءوڭىردىڭ ءار بۋىن وكىلدەرىن بىرىكتىرىپ, جانكۇيەرلەرمەن بايلانىستى نىعايتۋدى جانە سەمەي فۋتبولىنىڭ جاڭا تاريحىن جازۋدى جالعاستىرىپ كەلەدى.