قىتاي حالىق رەسپۋبليكاسىنىڭ گونكونگ ارنايى اكىمشىلىك اۋدانىنا جۇمىس ساپارى اياسىندا پرەمەر-ءمينيستردىڭ ورىنباسارى قانات بوزىمباەۆ گونكونگ اكىمشىلىگىنىڭ باسشىسى دجون ليمەن كەزدەستى. تاراپتار قازاقستان مەن گونكونگ اراسىنداعى ساۋدا-ەكونوميكالىق ىنتىماقتاستىقتىڭ قازىرگى جاعدايى مەن دامۋ كەلەشەگىن, سونداي-اق قارجى, تەحنولوگيا جانە يننوۆاتسيا سالالارىنداعى ءوزارا ءىس-قيمىلدى كەڭەيتۋ ماسەلەلەرىن تالقىلادى.
ساپاردىڭ ىسكەرلىك باعدارلاماسىنىڭ جالعاسى رەتىندە قانات بوزىمباەۆ پەن دجون لي گونكونگتىڭ ءىرى ينۆەستيتسيالىق قورلارىنىڭ, قارجى ينستيتۋتتارىنىڭ, تەحنولوگيالىق كومپانيالارى مەن ىسكەرلىك قاۋىمداستىقتارىنىڭ وكىلدەرىن بىرىكتىرگەن Alatau City Roadshow ينۆەستيتسيالىق دوڭگەلەك ۇستەلىنە قاتىستى.
قاتىسۋشىلاردىڭ نازارىنا مەملەكەت باسشىسىنىڭ تاپسىرماسى بويىنشا قۇرىلىپ جاتقان جاڭا ەكونوميكالىق ءوسۋ ورتالىعى – Alatau City-ءدىڭ ينۆەستيتسيالىق الەۋەتى ۇسىنىلدى. سونىمەن قاتار ارنايى قۇقىقتىق رەجىمنىڭ مۇمكىندىكتەرى, ينۆەستورلاردى مەملەكەتتىك قولداۋ شارالارى, سونداي-اق قارجى, تسيفرلىق تەحنولوگيالار, جاساندى ينتەللەكت, Web3-يندۋسترياسى جانە يننوۆاتسيالىق قالالىق ينفراقۇرىلىم سالالارىنداعى ىنتىماقتاستىقتىڭ پەرسپەكتيۆالىق باعىتتارى تانىستىرىلدى.
ءىس-شاراعا قاتىسۋشىلار الدىندا ءسوز سويلەگەن قانات بوزىمباەۆ قازاقستاننىڭ گونكونگتى ازياداعى جەتەكشى حالىقارالىق قارجى ورتالىقتارىنىڭ ءبىرى جانە ينۆەستيتسيالار, تەحنولوگيالار مەن قۇزىرەتتەردى تارتۋ ءۇشىن ماڭىزدى الاڭ رەتىندە قاراستىراتىنىن اتاپ ءوتتى.
«گونكونگ الەمدىك قارجى جۇيەسىندە ەرەكشە ورىن الادى جانە حالىقارالىق ينۆەستيتسيالار, كاپيتالدى باسقارۋ جانە ترانسشەكارالىق جوبالاردى جۇزەگە اسىرۋ ءۇشىن نەگىزگى الاڭداردىڭ ءبىرى بولىپ قالا بەرەدى. ءدال سوندىقتان ءبىز ءۇشىن الاتاۋ جوباسىن گونكونگتىڭ ينۆەستيتسيالىق جانە ىسكەرلىك قوعامداستىعىنا تانىستىرۋ ماڭىزدى. قازاقستان تاريحىندا العاش رەت تۇسىنىكتى قاعيدالارعا, ينۆەستورلاردىڭ قۇقىقتارىن قورعاۋعا, سونداي-اق رەتتەۋدىڭ ۇزدىك حالىقارالىق ستاندارتتارىنا باسىمدىق بەرە وتىرىپ, گونكونگتا قولدانىلاتىن تاسىلدەرمەن كوپ جاعدايدا ۇندەس كەلەتىن ارنايى قۇقىقتىق رەجىمى بار قالا قۇرىلىپ جاتىر», دەدى ق.بوزىمباەۆ.
ءوز كەزەگىندە گونكونگ اكىمشىلىگىنىڭ باسشىسى دجون لي سەرىكتەستىكتى كەڭەيتۋگە مۇددەلىلىگىن اتاپ ءوتىپ, ەكى تاراپتىڭ بيزنەس-قوعامداستىقتارى اراسىنداعى تىكەلەي بايلانىستاردى دامىتۋعا قولداۋ ءبىلدىردى.
دوڭگەلەك ۇستەل اياسىندا Alatau City Authority مەن تسيفرلىق تەحنولوگيالار جانە يننوۆاتسيالار سالالارىنداعى جەتەكشى كورپوراتسيالار اراسىندا ىنتىماقتاستىق تۋرالى 6 كەلىسىمشارت پەن مەموراندۋمعا قول قويىلدى.