«ۇشاقتان ورىن تاڭداعانداي»: ماجىلىستە جاتاقحاناعا ورنالاستىرۋدىڭ جاڭا جۇيەسى تالقىلاندى

جاتاقحانا جەتپەسە, ستۋدەنت قايدا بارادى؟

Respublica پارتياسىنىڭ ءباسپاسوز قىزمەتىنىڭ مالىمدەۋىنشە, ءماجىلىس دەپۋتاتى نۇرگۇل تاۋ استانا, الماتى جانە بىرقاتار وڭىردەگى ستۋدەنتتىك جاتاقحانالاردى ارالاپ, جاعدايمەن تانىسقان. ونىڭ ايتۋىنشا, ماسەلە رەسمي ەسەپتەردە كورسەتىلگەننەن الدەقايدا كۇردەلى.

بۇگىندە قازاقستاندا 678 مىڭ ستۋدەنت ءبىلىم الادى. ونىڭ 364,5 مىڭى − باسقا وڭىردەن كەلگەن جاستار. رەسمي دەرەك بويىنشا, جاتاقحاناعا مۇقتاج ستۋدەنتتەردىڭ سانى 115,6 مىڭ ادامدى قۇرايدى. سونىڭ ىشىندە 95,3 مىڭى عانا ورىنمەن قامتىلعان. ياعني كەمىندە 20 مىڭ ستۋدەنت جاتاقحاناسىز قالىپ وتىر. 

«كوپتەگەن جوعارى وقۋ ورىندارىنىڭ ستۋدەنتتەرى ەكىنشى كۋرستان باستاپ پاتەر جالداۋعا ءماجبۇر. سونىڭ سالدارىنان جاستار جەرتولەدە, جارتىلاي جەرتولەدە نەمەسە ۋاقىتشا باسپانالاردا تۇرادى. الماتىدا قاراپايىم پاتەردى جالداۋ قۇنى ايىنا 140 مىڭنان 270 مىڭ تەڭگەگە دەيىن جەتەدى. بۇل كوپتەگەن وتباسى ءۇشىن اۋىر سالماق. جىل سايىن 60 مىڭنان استام ستۋدەنت وقۋ اقىسى مەن باسپانا شىعىنىنىڭ اراسىندا تاڭداۋ جاسايدى», دەدى نۇرگۇل تاۋ.

عىلىم جانە جوعارى ءبىلىم مينيسترلىگى دە ماسەلەنىڭ وزەكتىلىگىن مويىندايدى. ۆەدومستۆو اپپاراتىنىڭ باسشىسى ماديار قوجاحمەتتىڭ ايتۋىنشا, سوڭعى سەگىز جىلدا 281 جاتاقحانا سالىنىپ نەمەسە كۇردەلى جوندەۋدەن ءوتىپ, 72 مىڭنان استام جاڭا ورىن پايدالانۋعا بەرىلگەن. سوعان قاراماستان, اسىرەسە ءىرى قالالارداعى ورىن تاپشىلىعى ءالى دە ساقتالىپ وتىر.

وتىرىس بارىسىندا ستۋدەنتتىك جاتاقحانا سالۋعا قارجى قۇيىپ جۇرگەن كاسىپكەرلەر دە ءوز ماسەلەلەرىن كوتەردى. قۇرىلىس كومپانيالارىنىڭ وكىلدەرى مەملەكەتتىك قولداۋ تەتىكتەرى بولعانىمەن, تولەمدەردىڭ كەشىگۋى جوبالاردىڭ جۇزەگە اسۋىنا كەدەرگى كەلتىرىپ وتىرعانىن ايتتى.

ماسەلەن, 500 ورىندىق جاتاقحانا سالعان ينۆەستور مەملەكەتتەن تيەسىلى قارجىلاندىرۋدى التى اي بويى كۇتكەن. سونىڭ سالدارىنان ينۆەستيتسيالىق قاراجات اينالىمنان شىعىپ, جوبانىڭ تيىمدىلىگى تومەندەگەن.

قولدانىستاعى جۇيە بويىنشا كاسىپكەر جاتاقحانا سالادى نەمەسە عيماراتتى قايتا جاڭعىرتادى, ال مەملەكەت ءاربىر توسەك-ورىن ءۇشىن جىل سايىن تولەم جاساپ وتىرادى. بۇعان قوسا جەڭىلدەتىلگەن نەسيەلەر مەن كوممەرتسيالىق ينفراقۇرىلىم ورنالاستىرۋ مۇمكىندىگى قاراستىرىلعان. الايدا ءىس جۇزىندە قارجىلاندىرۋدىڭ كەشىگۋى بيزنەس ءۇشىن نەگىزگى تاۋەكەلدەردىڭ بىرىنە اينالىپ وتىر.

قازۇۋ-دا 5 جاڭا جاتاقحانانىڭ قۇرىلىسى باستالدى

فراكتسيا ماسەلەنى جۇيەلى تۇردە شەشۋگە باعىتتالعان جەتى ۇسىنىس ازىرلەدى.

ءبىرىنشىسى – ستۋدەنتتەرگە ارنالعان بىرىڭعاي تسيفرلىق پلاتفورمانى ىسكە قوسۋ. تسيفرلىق دامۋ ۆيتسە-ءمينيسترى باقتيار مۇحامەتقاليەۆ بۇل باستامانى قولداپ, ستۋدەنت جاتاقحاناداعى ورنىن ۇشاقتاعى ورىن سەكىلدى ءوزى تاڭداي الۋى كەرەك ەكەنىن ايتتى.

ەكىنشىسى – جوعارى وقۋ ورىندارىنىڭ تيىمدىلىك كورسەتكىشتەرىنە جاتاقحانامەن قامتۋ دەڭگەيىن ەنگىزۋ. بۇل كورسەتكىش ليتسەنزيالاۋ جانە مەملەكەتتىك ءبىلىم بەرۋ تاپسىرىسىن ءبولۋ كەزىندە ەسكەرىلۋى مۇمكىن.

ءۇشىنشىسى – جاتاقحانا سالاتىن ۋنيۆەرسيتەتتەرگە كورپوراتيۆتىك تابىس سالىعى مەن قوسىلعان قۇن سالىعى بويىنشا جەڭىلدىكتەر بەرۋ.

ءتورتىنشىسى – قۇرىلىس سالۋشىلار ءۇشىن مەملەكەتتىك-جەكەمەنشىك ارىپتەستىك اياسىنداعى جاڭا ىنتالاندىرۋ شارالارى. اتاپ ايتقاندا, نولدىك ققس مولشەرلەمەسى, م ۇلىك سالىعىنان 10 جىلعا بوساتۋ جانە الەۋمەتتىك-كاسىپكەرلىك كورپوراتسيالار ارقىلى جىلدىق 2,5 پايىزبەن قارجىلاندىرۋ.

بەسىنشىسى – جاتاقحانا قۇرىلىسىنا ارنالعان جەر تەلىمدەرىنىڭ بىرىڭعاي ءتىزىلىمىن جاساپ, ولاردى ۇزاق مەرزىمگە جەڭىلدەتىلگەن شارتتارمەن بەرۋ.

التىنشىسى – حالىقارالىق PBSA مودەلىن ەنگىزۋ. بۇل جۇيەدە ستۋدەنتتىك تۇرعىن ءۇي ينۆەستيتسيالىق اكتيۆ رەتىندە قاراستىرىلادى جانە اقش, ۇلىبريتانيا, سينگاپۋر سەكىلدى ەلدەردە ءوز تيىمدىلىگىن دالەلدەگەن.

جەتىنشىسى – ستۋدەنتتىك تۇرعىن ءۇيدىڭ ۇلتتىق ستاندارتىن ازىرلەۋ. قۇجاتتا بولمە اۋماعىنا, قاۋىپسىزدىك تالاپتارىنا, ينتەرنەت ساپاسىنا جانە تۇرمىس جاعدايىنا قويىلاتىن بىرىڭعاي تالاپتار بەلگىلەنەدى.

قايتارىلعان اكتيۆتەر ەسەبىنەن شىمكەنتتە جاڭا جاتاقحانا اشىلدى

كەزەك پەن تانىستىقتىڭ ورنىنا – تسيفرلىق جۇيە

وتىرىستا «Alma Valley» كومپانياسىنىڭ باس ديرەكتورى ازامات مۇراتوۆ UniDorm 2.0 پلاتفورماسىنىڭ مۇمكىندىكتەرىن تانىستىردى.

ونىڭ ايتۋىنشا, جاڭا جۇيە ستۋدەنتكە بىرنەشە مينۋت ىشىندە بولمەنى ونلاين تاڭداۋعا مۇمكىندىك بەرەدى. جاساندى ينتەللەكت الەۋمەتتىك جەڭىلدىكتەرگە قاتىستى قۇجاتتاردى اۆتوماتتى تۇردە تەكسەرىپ, ادام فاكتورىن بارىنشا ازايتادى.

«ماشينا پارا المايدى», دەدى ول.

پلاتفورماداعى تۋرنيكەتتەر جاتاقحانادا ناقتى تۇرىپ جاتقان ستۋدەنتتەردى تىركەپ وتىرادى. ەگەر ستۋدەنت ۇزاق ۋاقىت بويى جاتاقحانادا كورىنبەسە نەمەسە ءوز ورنىن باسقا ادامعا بەرسە, جۇيە ونى اۆتوماتتى تۇردە انىقتاي الادى.

ءوز تاجىريبەسىن Satbayev University دە ءبولىستى. ۋنيۆەرسيتەتتىڭ پرورەكتورى ساپار شالاباەۆتىڭ ايتۋىنشا, Dormitory جۇيەسى كەزەكتىڭ قوزعالىسىن ناقتى ۋاقىت رەجيمىندە كورسەتەدى, ءتارتىپ بۇزۋشىلىقتاردى تىركەيدى جانە قاۋىپسىزدىك جۇيەلەرىمەن بىرىكتىرىلگەن. قازىرگى ۋاقىتتا ۋنيۆەرسيتەت جەكە ينۆەستورلارمەن بىرلەسىپ, جالپى سىيىمدىلىعى 1500 ورىن بولاتىن ەكى جاڭا جاتاقحانا سالىپ جاتىر.

بولاشاققا سالىنعان ينۆەستيتسيا

وتىرىستى قورىتىندىلاعان Respublica فراكتسياسىنىڭ جەتەكشىسى ايداربەك قوجانازاروۆ ستۋدەنتتىك تۇرعىن ءۇي ماسەلەسىن الەۋمەتتىك ەمەس, ستراتەگيالىق مىندەت رەتىندە قاراستىرۋ قاجەت ەكەنىن ايتتى.

«ەگەر ءبىز بۇگىن جاستارعا ساپالى ءبىلىم الۋعا جاعداي جاساماساق, ەرتەڭ بىلىكتى مامان تاپشىلىعىنا شاعىمدانۋدىڭ ءمانى بولمايدى. جاتاقحانا − بۇل قايىرىمدىلىق ەمەس, ەلدىڭ بولاشاعىنا سالىنعان ينۆەستيتسيا», دەدى ول.

Respublica فراكتسياسى كوتەرىلگەن ۇسىنىستاردى زاڭنامالىق باستامالار دەڭگەيىنە شىعارىپ, ولاردى ۇكىمەتپەن بىرلەسىپ پىسىقتاۋدى جوسپارلاپ وتىر.

5176 ستۋدەنتكە ورىن جەتپەيدى: الماتىدا جاتاقحانا ماسەلەسى قاشان تولىق شەشىلەدى؟