ولجاس بەكتەنوۆ اشحابادتاعى تمد ۇكىمەتتەرى باسشىلارى كەڭەسىنىڭ وتىرىسىنا قاتىستى

بيىل دوستاستىققا تۇرىكمەنستان رەسپۋبليكاسىنىڭ توراعالىق ەتۋدە. تمد ۇبك وتىرىسى باستالار الدىندا تۇرىكمەنستان پرەزيدەنتى سەردار بەردىمۇحامەدوۆ ۇكىمەتتىك دەلەگاتسيالار باسشىلارىن قابىلدادى.

ەكىجاقتى كەزدەسۋ بارىسىندا ولجاس بەكتەنوۆ قازاقستان پرەزيدەنتى قاسىم-جومارت توقاەۆتىڭ اتىنان تۇرىكمەن حالقىنىڭ ۇلتتىق كوشباسشىسى, تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ پەن تۇرىكمەنستان پرەزيدەنتى سەردار بەردىمۇحامەدوۆكە جىلى لەبىزىن جەتكىزدى. 

كەزدەسۋدە ساۋدا-ەكونوميكالىق جانە كولىك-ترانزيتتىك ىنتىماقتاستىق, سونداي-اق ەنەرگەتيكا, اۋىل شارۋاشىلىعى سالالارىنداعى ءوزارا ءىس-قيمىل ماسەلەلەرىنە نازار اۋدارىلدى. 2026 جىلعى قاڭتار-ناۋرىز ايلارىندا قازاقستان مەن تۇركىمەنستان اراسىنداعى ءوزارا ساۋدا كولەمى $125,3 ملن-دى قۇرادى. بۇل رەتتە ەكسپورت قازاقستاندىق اۋىل شارۋاشىلىعى ونىمدەرىن جەتكىزۋدى ۇلعايتۋ ەسەبىنەن 15%-عا ءوستى. قازاقستان ۇكىمەتى مەن تۇركىمەنستان مينيسترلەر كابينەتى ەكى مەملەكەت باسشىلارى جۇكتەگەن تاۋار اينالىمىن ارتتىرۋ جونىندەگى مىندەتتەر جوسپارلى تۇردە جۇزەگە اسىرىلىپ كەلە جاتقانى اتاپ ءوتىلدى.  

تمد ۇبك وتىرىسىنا ازەربايجان, بەلارۋس, قىرعىزستان, رەسەي, تاجىكستان, وزبەكستان ۇكىمەتتەرىنىڭ باسشىلارى, تۇركىمەنستان مەن ارمەنيانىڭ وكىلدەرى, سونداي-اق تمد-نىڭ باس حاتشىسى قاتىستى.

ءداستۇر بويىنشا وتىرىس شاعىن جانە كەڭەيتىلگەن قۇرامدا ءوتتى. 

شاعىن فورماتتاعى وتىرىستا تمد-عا مۇشە ەلدەردىڭ ەكونوميكالىق ءوزارا ءىس-قيمىلىنا قاتىستى وزەكتى ماسەلەلەر تالقىلاندى, وندا گەودەزيا, كارتوگرافيا, كەڭىستىكتەگى دەرەكتەر سالاسىنداعى ىنتىماقتاستىق بويىنشا مەملەكەتارالىق باعدارلامانى جۇزەگە اسىرۋ بارىسى تۋرالى ەسەپ قابىلداندى. كەڭەيتىلگەن قۇرامداعى وتىرىس شەڭبەرىندە ۇكىمەتتىك دەلەگاتسيا باسشىلارى تمد-عا قاتىسۋشى مەملەكەتتەردىڭ تاۋ-كەن مەتاللۋرگيا كەشەنى سالالارىن تسيفرلىق ترانسفورماتسيالاۋ تۇجىرىمداماسىنىڭ جوباسىن جانە ونى جۇزەگە اسىرۋ جونىندەگى ءىس-شارالار جوسپارىن, تمد-نىڭ 2030 جىلعا دەيىنگى كەزەڭگە ارنالعان كونگرەسستىك-كورمە قىزمەتىنىڭ ستراتەگياسىن قارادى.

شاعىن قۇرامداعى وتىرىستا ءسوز سويلەگەن ولجاس بەكتەنوۆ قازاقستان جاڭا كونستيتۋتسيانىڭ قابىلداۋ ارقىلى ءوز دامۋىنداعى جاڭا تاريحي كەزەڭگە كىرگەنىن جانە ەكونوميكانى ورنىقتى دامىتۋعا باعىت تۇزەگەنىن اتاپ ءوتتى. وسىعان بايلانىستى مادەني-گۋمانيتارلىق ىنتىماقتاستىق سالاسىنداعى ءوزارا ءىس-قيمىلعا قاتىستى ماسەلەلەر قوزعالدى. ونىڭ ىشىندە ەكونوميكا, تسيفرلىق ترانسفورماتسيا جانە جاساندى ينتەللەكت, اگروونەركاسىپ كەشەنى, ترانزيتتىك جانە لوگيستيكالىق ينفراقۇرىلىم, سۋ قاۋىپسىزدىگى, سونداي-اق ەرىكتىلەر قوزعالىسىن دامىتۋ بار. 2025 جىلدىڭ قورىتىندىسى بويىنشا قازاقستاننىڭ تمد ەلدەرىمەن تاۋار اينالىمى $38,4 ملرد قۇرادى. 2026 جىلعى قاڭتار-ناۋرىزدا ءوزارا ساۋدا كولەمى 17,1%-عا ءوستى.

قر پرەمەر-ءمينيسترى تمد تاۋ-كەن مەتاللۋرگيا كەشەنى سالالارىن تسيفرلىق ترانسفورماتسيالاۋ تۇجىرىمداماسىن قابىلداۋ جانە جۇزەگە اسىرۋ ونەركاسىپتى جاڭعىرتۋعا ءارى تەحنولوگيالىق ىنتىماقتاستىقتى كەڭەيتۋگە قوسىمشا سەرپىن بەرەتىنىن اتاپ ءوتتى. قازاقستان پرەزيدەنتى قاسىم-جومارت توقاەۆتىڭ باستاماسىمەن تمد-نىڭ نەگىزگى كولىك ارتەريالارىن ۇشتاستىرۋ تۇجىرىمداماسى جۇكتەردى جەدەل تاسىمالداۋ ءۇشىن ينفراقۇرىلىمدى جاڭعىرتۋدى قامتاماسىز ەتەدى. بۇل كولىك شىعىندارىن قىسقارتادى جانە كولىك مارشرۋتتارىنىڭ باسەكەگە قابىلەتتىلىگىن, ولاردىڭ حالىقارالىق جۇك جونەلتۋشىلەر مەن ينۆەستورلار ءۇشىن تارتىمدىلىعىن ارتتىرادى, سونداي-اق تمد-عا مۇشە ەلدەردىڭ الەۋمەتتىك-ەكونوميكالىق دامۋى مۇددەسىندە كولىك دالىزدەرىن ءتيىمدى پايدالانۋعا مۇمكىندىك بەرەدى.

وتىرىس قورىتىندىسى بويىنشا تمد ەلدەرىنىڭ تاۋ-كەن مەتاللۋرگيا كەشەنى, كولىك, راديوناۆيگاتسيا سالالارىن تسيفرلىق ترانسفورماتسيالاۋ, ۋران ءوندىرۋ وندىرىستەرىنىڭ اسەرىنە ۇشىراعان اۋماقتاردى رەكۋلتيۆاتسيالاۋ, كونگرەسس-كورمە قىزمەتى جانە تاعى دا باسقا سالالارداعى ىنتىماقتاستىعىنا قاتىستى بىرقاتار قۇجاتقا قول قويىلدى. 

بۇدان بولەك, 2027 جىلى مينسك قالاسىن (بەلارۋس رەسپۋبليكاسى), 2028 جىلى – قاراعاندى قالاسىن (قازاقستان رەسپۋبليكاسى) تمد جاستارىنىڭ استاناسى دەپ جاريالاۋ تۋرالى شەشىم قابىلداندى. حالىقارالىق جوبا ازاماتتاردىڭ جاس بۋىنىن مەملەكەتارالىق قاتىناستاردىڭ بارلىق سالالارىندا ورنىقتى دامۋ باعدارلامالارىن جۇزەگە اسىرۋعا تارتۋعا باعىتتالعان.

تاۋەلسىز مەملەكەتتەر دوستاستىعى ۇكىمەتتەرى باسشىلارى كەڭەسىنىڭ كەلەسى وتىرىسى وسى جىلدىڭ جەلتوقسان ايىندا ماسكەۋ قالاسىندا وتەدى.