الماتى قالاسىندا ورنالاسقان Hilton قوناقۇيىندە قىزمەتكەرلەردى عيماراتتان كۇشتەپ شىعارۋ ارەكەتى ءجۇرىپ جاتقانى تۋرالى اقپارات تارادى. بۇل تۋرالى ءماجىلىس دەپۋتاتى ەرمۇرات باپي باس پروكۋرور بەرىك اسىلوۆقا جولداعان دەپۋتاتتىق ساۋالىندا ايتتى, دەپ حابارلايدى Egemen.kz.
دەپۋتاتتىڭ مالىمەتىنشە, قوناقۇيدە 250-گە جۋىق ادام جۇمىس ىستەيدى.
«الماتى قالالىق ادىلەت باسقارماسىنىڭ شەشىمىمەن, الماتىدا Hilton قوناقۇيىن مەنشىك يەسىنەن تارتىپ الۋ, عيماراتتى كۇشتەپ بوساتۋ ارەكەتتەرى ءجۇرىپ جاتىر. وسى ارەكەتتەردىڭ ءبارى شەتەلدەن كەلگەن قوناقتاردىڭ كوز الدىندا ءجۇرىپ جاتىر», دەدى ەرمۇرات باپي.
بۇل ءىستىڭ ارتىندا «ەسكى» قازاقستاننىڭ مۇددەسىنە جاسالىپ جاتقان زاڭسىز, ادىلەتسىز, ارەكەتتەر بار ەكەندىگىن اتاپ وتكەن دەپۋتات بۇعان دەيىن دە اتالعان قوناقۇيگە قاتىستى ماسەلە كوتەرىلگەنىن ەسكە سالدى. ونىڭ ايتۋىنشا, بۇل اكتيۆ بۇرىن قايرات ساتىبالدى ۇلىنا قاتىستى ءىس بويىنشا مەملەكەتكە قايتارىلعان بولاتىن.
«وسى ارالىقتا قايرات ساتىبالدى تۇرمەگە وتىرىپ, كەيىن بوساپ شىقتى. ءبىراز اكتيۆىن مەملەكەتكە قايتاردى, سونىڭ ىشىندە Hilton قوناقۇيى دە بار. بۇل – ايلا. قوناقۇيدى تارتىپ الىپ, مەملەكەتتىك م ۇلىك كوميتەتى ارقىلى ونى اۋكتسيونعا شىعارىپ, ساتىبالدىعا استىرتىن تيەسىلى كومپانياعا ساتۋدىڭ استىرتىن جۇيەسى جۇزەگە اسىپ جاتىر», دەدى ەرمۇرات باپي Hilton-دى نارىق بويىنشا 12 ملرد تەڭگە ەمەس, 4,5 ملرد تەڭگەگە باعالاعانىن تىلگە تيەك ەتىپ.
قايرات ساتىبالدىنىڭ قوناقۇيى مەملەكەتكە قايتارىلدى
الماتىداعى قوناقۇي توڭىرەگىندەگى زاڭسىزدىق پرەزيدەنت قاسىم-جومارت توقاەۆتىڭ قۇلاعىنا جەتەتىنىنە سەنىم بىلدىرگەن دەپۋتات باس پروكۋراتۋرادان بۇل جاعدايدى تەكسەرىپ, قۇقىقتىق باعا بەرۋدى تالاپ ەتتى.
ەسكە سالا كەتەيىك, بۇعان دەيىن قايتارىلعان اكتيۆتەردى باسقارۋ كومپانياسى (كۋۆا) الماتىداعى قايرات ساتىبالدىعا تيەسىلى Kaisar Plaza ساۋدا-كەڭسە ورتالىعىن ساتۋعا شىعاراتىنىن حابارلاعان بولاتىن.