ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جوعارى وقۋ ورنىنىڭ 30 جىلدىعىنا ارنالعان سالتاناتتى ءىس-شارالار ءوتتى. مەرەيتويلىق باعدارلاما اياسىندا حالىقارالىق لۋ بان شەبەرحاناسىنىڭ اشىلۋى مەن مەملەكەت جانە قوعام قايراتكەرلەرىنىڭ, شەتەلدىك سەرىكتەستەردىڭ, عالىمدار مەن تۇلەكتەردىڭ قاتىسۋىمەن عىلىمي كەڭەستىڭ سالتاناتتى وتىرىسى ۇيىمداستىرىلدى, دەپ حابارلايدى Egemen.kz.
لۋ بان شەبەرحاناسىنىڭ لەنتاسىن قيۋ راسىمىنە عىلىم جانە جوعارى ءبىلىم ءمينيسترى ساياسات نۇربەك, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى باسقارما توراعاسى – رەكتورى ەرلان سىدىقوۆ, سونداي-اق قىتاي حالىق رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى حان چۋنلين قاتىستى.
لۋ بان شەبەرحاناسى – مەملەكەت باسشىسىنىڭ تاپسىرماسى اياسىندا جۇزەگە اسىرىلىپ جاتقان, جوعارى بىلىكتى تەحنيكالىق ماماندار دايارلاۋعا ارنالعان يننوۆاتسيالىق ءبىلىم بەرۋ ورتالىقتارىن قۇرۋ بويىنشا بىرلەسكەن قازاقستاندىق-قىتايلىق جوبا.
قازاقستاندىق تۇلەكتەر ۇبت سەرتيفيكاتىمەن مالايزيا ۋنيۆەرسيتەتتەرىنە تۇسە الادى
ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ لۋ بان شەبەرحاناسى تيانتسزين كاسىپتىك ينستيتۋتىمەن بىرلەسىپ جۇزەگە اسىرىلدى جانە تەحنيكالىق ءارى IT-ءبىلىم بەرۋدى دامىتۋعا, سونداي-اق جاساندى ينتەللەكت پەن تسيفرلىق شەشىمدەر سالاسىندا سۇرانىسقا يە ماماندار دايارلاۋعا باعىتتالعان. لۋ بان شەبەرحاناسى حالىقارالىق تاجىريبە الماسۋ مەن ۋنيۆەرسيتەتتىڭ يننوۆاتسيالىق ەكوجۇيەسىن دامىتۋدىڭ جاڭا الاڭىنا اينالدى.
شەبەرحانانى ارالاۋ بارىسىندا قوناقتارعا اۆتوماتتاندىرىلعان وندىرىستىك جەلىلەر, جوعارى ءونىمدى ەسەپتەۋلەر, ۇشقىشسىز جۇيەلەر, ماشينالىق كورۋ جانە روبوتوتەحنيكا زەرتحانالارى تانىستىرىلدى. ەۇۋ ستۋدەنتتەرى مەن IT-ماماندارى جاساندى ينتەللەكت سالاسىنداعى جوبالارىن ۇسىندى. ولاردىڭ قاتارىندا ۇلكەن تىلدىك مودەلدەرگە نەگىزدەلگەن ءبىلىم پلاتفورماسى, كورۋ قابىلەتى ناشار ادامدارعا ارنالعان ناۆيگاتسيالىق جۇيە, ينتەللەكتۋالدى بەينە تالداۋ تەحنولوگيالارى, Industrial AI جانە باسقا دا ازىرلەمەلەر بار.
قازاقستاندا بيىل اشىلاتىن جي ۋنيۆەرسيتەتىنە كىمدەر تۇسە الادى؟
عىلىمي كەڭەستىڭ سالتاناتتى وتىرىسى تەاترلاندىرىلعان پرولوگ, بەينەپرەزەنتاتسيا جانە مەرەكەلىك فلەشموبپەن جالعاستى. ەۇۋ-دىڭ باسقارما توراعاسى-رەكتور ەرلان سىدىقوۆ جينالعان قاۋىمدى جانە وسى وقۋ ورنىندا ەڭبەك ەتىپ, ەلىمىزدىڭ ءبىلىم, عىلىم سالاسىنا ايرىقشا ۇلەس قوسىپ جۇرگەن عالىمداردى, وقىتۋشىلاردى مەرەيلى 30 جىلدىق مەرەكەمەن قۇتتىقتادى جانە مەرەيلى بەلەسكە ۋنيۆەرسيتەت ۇلكەن تابىستارمەن جەتكەندىگىنە توقتالدى.
«ۋنيۆەرسيتەتىمىزدىڭ باستى بايلىعى – ول ۋنيۆەرسيتەتىمىزدىڭ ۇجىمى.ءبىلىم ورداسىنىڭ ىرگەسىن قالاپ, بۇگىنگى بيىككە جەتۋىمىزگە ولشەۋسىز ۇلەسىن قوسقان ارداگەرلەرىمىز بەن ۇستازدارىمىزعا العىسىمىز شەكسىز.سىزدەردىڭ تاجىريبەلەرىڭىز بەن ءتالىم-تاربيەلەرىڭىز ءبىز ءۇشىن ارقاشان ۇلگى. جىل سايىن ۇلەس قوسىپ جۇرگەن پروفەسسور-وقىتۋشىلار قۇرامىنا, قىزمەتكەرلەرگە جانە ستۋدەنتتەر مەن جاس ۇستازدارعا شىنايى ىقىلاسىمدى بىلدىرەمىن», دەدى رەكتور.
عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسى قاسىم-جومارت توقاەۆتىڭ قۇتتىقتاۋىن وقىپ بەردى. وندا ۋنيۆەرسيتەت العاش قۇرىلعان كۇننەن باستاپ تاۋەلسىزدىكپەن بىرگە جاساسىپ كەلە جاتقانى جانە ەلىمىزدىڭ بەتكە ۇستار ءبىلىم ۇياسىنا اينالعانى ايتىلعان. قۇرىلعانىنا 50 جىل تولماعان الەمدىك ۋنيۆەرسيتەت اراسىندا ەۇۋ-دىڭ كوش باستاعانىن جەتكىزىپ, الداعى ۋاقىتتا ءبىلىم مەن عىلىمنىڭ كوشباسشىسى بولىپ, ۇلتتىق ۋنيۆەرسيتەتتىڭ بەدەلىن ارتتىرا بەرەتىنىنە جانە ۋنيۆەرسيتەت تۇلەكتەرى ەلىمىزدىڭ بارلىق سالاسىندا جەمىستى ەڭبەك ەتەتىنىنە سەنىم بىلدىرگەن. وتاندىق جوعارى وقۋ ورىندارىنىڭ اراسىندا الدى ەكەنى اتالىپ, ەۇۋ الداعى ۋاقىتتا دا جوعارى بىلىكتى مامانداردى دايارلاۋدا ماڭىزدى عىلىمي-ءبىلىم بەرۋ ورتالىعى رەتىندە قالا بەرەتىنىنە ءۇمىت ارتقان.
«سىزدەردى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 30 جىلدىق مەرەيتويىمەن شىن جۇرەكتەن قۇتتىقتايمىن! وسىدان 30 جىل بۇرىن قۇرىلىپ, ەۇۋ ەۋروپا, ازيا, اقش, تاعى باسقا شەتەلدىك جوعارى وقۋ ورىندارىمەن, ءتۇرلى عىلىمي-زەرتتەۋ ورتالىقتارىمەن, شەتەل مەملەكەتتەرىنىڭ ەلشىلىكتەرىمەن, حالىقارالىق ءبىلىم بەرۋ ۇيىمدارىمەن قارىم-قاتىناس جاسايتىن جەتەكشى ۋنيۆەرسيتەتكە اينالدى», دەلىنگەن پرەزيدەنت قۇتتىقتاۋىندا.
سونداي-اق جيىن بارىسىندا رەسەي, بەلارۋس جانە ازەربايجان پرەزيدەنتتەرىنىڭ قۇتتىقتاۋ حاتتارى وقىلدى جانە ۋنيۆەرسيتەت ۇجىمىن پارلامەنت سەناتى مەن ءماجىلىس توراعالارى, ديپلوماتيالىق كورپۋس وكىلدەرى, شەتەلدىك سەرىكتەستەر, باس پروكۋراتۋرا, جوعارعى سوت, جوعارى وقۋ ورىندارىنىڭ رەكتورلارى جانە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى تۇلەكتەرى قۇتتىقتادى.
ء«بىر بەلدەۋ – ءبىر جول»: اۋەزوۆ ۋنيۆەرسيتەتىندە قىتاي ورتالىعى اشىلدى
«بۇگىن وتاندىق عىلىم مەن جوعارى ءبىلىم سالاسىندا ايتۋلى مەرەكە. ۋنيۆەرسيتەت بۇگىندە تەك ورتالىق ازيا كەڭىستىگىندە عانا ەمەس, الەمدىك دەڭگەيدەگى ىرگەلى جوعارى وقۋ ورنىنا اينالدى. 30 جىلدىق تاريحى بار ەۇۋ بۇگىندە زامان سۇرانىسىنا جاۋاپ بەرە الاتىن, بىلىكتىلىگى مەن ءبىلىمى, تاجىريبەسى مەن تالانتى ءبىر ارناعا توعىسقان سالا يەلەرىن دايارلاۋدى ايقىن ماقسات ەتىپ كەلەدى. ۇلتتىق ۋنيۆەرسيتەت عىلىم مەن ءبىلىم ايدىنىندا جۇكتەلگەن مىندەتتەردى جوعارى ناتيجەمەن جۇزەگە اسىرىپ وتىر. بۇگىنگى ناتيجەلى جۇمىس پەن ىرگەلى بەلەستەر ۋنيۆەرسيتەت ۇجىمىنىڭ تاباندى ەڭبەگىنىڭ ارقاسى دەپ باعامدايمىن», دەدى ەۇۋ تۇلەگى, عىلىم جانە جوعارى ءبىلىم ءمينيسترى ساياسات نۇربەك.
ۋنيۆەرسيتەتتىڭ 30 جىلدىعىن مەرەكەلەۋ كامپۋس اۋماعىندا ستۋدەنتتەردى, وقىتۋشىلاردى, تۇلەكتەر مەن قوناقتاردى بىرىكتىرگەن مادەني-كوپشىلىك ءىس-شارالارمەن جالعاستى. قاتىسۋشىلار ءۇشىن پالاۋ فەستيۆالى, مەرەكەلىك كونتسەرت, ۇلتتىق ويىندار, كورمە جانە ينتەراكتيۆتى الاڭدار, سونداي-اق ەۇۋ تۇلەكتەرىنىڭ سلەتى وتكىزىلدى. مەرەكەلىك باعدارلاماعا قازاقستاندىق ونەرپازداردىڭ شىعارماشىلىق قويىلىمدارى, سپورتتىق شارالار مەن ۋنيۆەرسيتەتتىڭ كوپۇلتتى مادەنيەتى مەن ستۋدەنتتىك رۋحىن ايشىقتايتىن حالىقتىق سەرۋەندەر ەندى.
بۇگىندە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى – قازاقستان مەن ورتالىق ازياداعى جەتەكشى زەرتتەۋ ۋنيۆەرسيتەتتەرىنىڭ ءبىرى. ۋنيۆەرسيتەتتە 27 مىڭنان استام ستۋدەنت ءبىلىم الادى, ال ءبىلىم بەرۋ جانە عىلىمي ۇدەرىستى شامامەن 3 مىڭ وقىتۋشى مەن قىزمەتكەر قامتاماسىز ەتەدى. ۋنيۆەرسيتەت 200-دەن استام ءبىلىم بەرۋ باعدارلاماسىن جۇزەگە اسىرىپ, حالىقارالىق ىنتىماقتاستىقتى, تسيفرلىق تەحنولوگيالاردى جانە جاساندى ينتەللەكت, ينجەنەريا, يادرولىق فيزيكا, بيوتەحنولوگيا جانە باسقا دا باعىتتار بويىنشا عىلىمي زەرتتەۋلەردى بەلسەندى دامىتۋدا. QS World University Rankings 2026 قورىتىندىسى بويىنشا ەۇۋ الەمنىڭ جەتەكشى ۋنيۆەرسيتەتتەرى اراسىندا 317-ورىنعا يە.