قازاق ۇلتتىق اگرارلىق زەرتتەۋ ۋنيۆەرسيتەتىندە ەكى مارتە سوتسياليستىك ەڭبەك ەرى, «دالا اكادەميگى», داڭقتى شوپان, «مالشىلاردىڭ مارشالى» اتانعان جازىلبەك قۋانىشباەۆتىڭ 130 جىلدىق مەرەيتويىنا ارنالعان «قازاقستاننىڭ قوي شارۋاشىلىعى: ءداستۇرى, دامۋى جانە بولاشاعى» اتتى حالىقارالىق عىلىمي-تاجىريبەلىك كونفەرەنتسيا ءوتتى, دەپ حابارلايدى Egemen.kz
اۋقىمدى تاجىريبەلىك كونفەرەنتسياعا كورشى رەسەي مەن وزبەكستاننان اكادەميك, عالىمدار, سونداي-اق ەلىمىزدىڭ كورنەكتى مەملەكەت جانە قوعام قايراتكەرلەرى, ايماقتاعى جوعارعى وقۋ ورىندارىنىڭ پروفەسسورلارى مەن باسشىلارى, ۇستازدار قاۋىمى جانە ستۋدەنتتەر قاتىستى.
ەكى مارتە سوتسياليستىك ەڭبەك ەرى جازىلبەك قۋانىشباەۆتىڭ ونەگەلى ءومىرى مەن ەڭبەك جولىن بۇگىنگى ۇرپاققا ۇلگى ەتە وتىرىپ, ەلىمىزدەگى قوي شارۋاشىلىعىن دامىتۋدىڭ زاماناۋي جاڭا باعىتتارىن جەتىلدىرۋدىڭ وزەكتى ماسەلەلەرىن تالقىلاۋ ماقساتىندا وتكەن كونفەرەنتسيانى KazNARU باسقارما توراعاسى – رەكتور, پرەزيدەنت جانىنداعى ۇعا پرەزيدەنتى, اكادەميك اقىلبەك كۇرىشباەۆ اشتى.
«مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا اۋىل شارۋاشىلىعى – ءبىزدىڭ نەگىزگى رەسۋرسىمىز ەكەندىگىن اتاپ وتكەن بولاتىن. اگرارلىق سالا – ەل ەكونوميكاسىنىڭ تىرەگى عانا ەمەس, حالىقتىڭ ءال-اۋقاتى مەن ازىق-ت ۇلىك قاۋىپسىزدىگىن قامتاماسىز ەتەتىن ستراتەگيالىق ماڭىزدى باعىت. سوندىقتان بۇل سالانىڭ دامۋىنا ۇلەس قوسقان ەڭبەك ادامدارىنىڭ قاجىرلى ەڭبەگىن ناسيحاتتاۋ, ولاردىڭ مول تاجىريبەسىن كەيىنگى بۋىنعا ۇلگى ەتۋ – ۋاقىت تالابى. جازىلبەك قۋانىشباەۆ اتامىز سياقتى داڭقتى ەڭبەك ەرلەرىنىڭ كاسىبي شەبەرلىگىن دارىپتەۋ ارقىلى جاستاردى اۋىل شارۋاشىلىعىنا تارتۋعا, ەڭبەككە قۇرمەت سەزىمىن قالىپتاستىرۋعا جانە وسى سالانىڭ بەدەلىن ارتتىرۋعا ىقپال ەتەدى.
جازىلبەك اتامىزدىڭ تاعىلىمعا تولى عۇمىرى مەن ەسەلى ەڭبەگى - بۇگىنگى جاستار ءۇشىن ادال ەڭبەك پەن تاباندىلىقتىڭ جارقىن ۇلگىسى. ونىڭ مال شارۋاشىلىعىن دامىتۋ جولىنداعى قاجىرلى ەڭبەگى, كاسىپكە دەگەن سۇيىسپەنشىلىگى مەن جاۋاپكەرشىلىگى قازىرگى بۋىنعا ۇلكەن ونەگە بەرەدى. وسىنداي ەڭبەك ادامدارىنىڭ ءومىر جولىن ناسيحاتتاۋ ارقىلى جاستاردىڭ اتاكاسىپكە, عىلىمعا قىزىعۋشىلىعىن ارتتىرىپ, قوي شارۋاشىلىعى سالاسىنا جاڭا سەرپىن بەرۋ - ءبىزدىڭ مىندەتىمىز! دالىرەك ايتقاندا, قوي شارۋاشىلىعى عىلىمي-زەرتتەۋ ينستيتۋتىن قۇرماي, ەلىمىزدە قوي شارۋاشىلىعىن دامىتۋ مۇمكىن ەمەس. ەلدىڭ بولاشاعى - ەڭبەكسۇيگىش, تۋعان جەرگە جاناشىر جاس ۇرپاقتىڭ قولىندا. سوندىقتان جازىلبەك قۋانىشباەۆ مۇراسى - تەك وتكەننىڭ تاريحى عانا ەمەس, اۋىل شارۋاشىلىعىن دامىتۋعا باعىت بەرەتىن, جاستارعا رۋح پەن جىگەر سىيلايتىن بىرەگەي ونەگە مەكتەبى بولعانى ايتىلدى.
القالى جيىندا قازاقستاننىڭ ەڭبەك سىڭىرگەن قايراتكەرى تۇرلىبەك دوقدىرحان جازىلبەك قۋانىشباەۆ تۋرالى تۇسىرىلگەن «قازاقتىڭ قارا شالى» اتتى دەرەكتى ءفيلمىن كوپشىلىك نازارىنا ۇسىندى.
كونفەرەنتسيادا «دالا اكەدەميگىنىڭ» ەلىمىزدىڭ قوي شارۋاشىلىعى سالاسىن دامىتۋعا قوسقان ۇلەسى تۋرالى جاسالعان زەرتتەۋلەر كوپشىلىك نازارىنا ۇسىنىلىپ, سالا ماماندارى تاجىريبە الماسىپ, بولاشاقتاعى ىنتىماقتاستىق باعىتتارىن ايقىندادى.