سارىكول اۋدانىنىڭ تاعىل اۋىلىنداعى بۇل ءۇيدىڭ اۋلاسىنان ءار قىس سايىن ءارتۇرلى جان-جانۋاردىڭ مۇسىندەرىن كورۋگە بولادى. مىسالى, وتكەن جىلى قىستاي تۇرعان قاراگەر اتتىڭ ورنىن بيىل بيىكتىگى ەكى جارىم مەتر بولاتىن اقبوز ات باسقان. ال اق ايۋدىڭ ورنىندا الا پاندا تۇر.
اۋىل بالالارىنىڭ كوزايىمىنا اينالعان عاجايىپ مۇسىندەردىڭ اۆتورى – جەرگىلىكتى شارۋشىلىقتىڭ تەمىر جونۋشىسى سەرىك قوشقارباەۆ دەگەن ازامات.
سەرىك الدىمەن مەتالدان ءمۇسىننىڭ قاڭقاسىن جاساپ الادى. ودان كەيىن دايىن قاڭقانىڭ ىشىنە قار تولتىرىپ, ارتىعىن جونىپ, سىرتىن سىلاپ شىعادى.
«بالا كەزىمدە پلاستيليننەن بۇركىت, قاز, ۇيرەك ءتارىزدى نەشە ءتۇرلى قۇستاردىڭ مۇسىنشەلەرىن جاساۋدى جاقسى كورەتىنمىن. سودان قالعان ادەت قوي. 2021 جىلى اۋدان ورتالىعىنداعى الاڭعا جىلقىنىڭ, قىران بۇركىت ۇستاعان اڭشىنىڭ, مۋلتفيلم كەيىپكەرلەرىنىڭ ءمۇسىنىن جاساپ بەردىم. ول كەزدە ەشبىر سىزباسىز ءمۇسىن جاساي بەرەتىنمىن. قازىر عالامتوردان كەز كەلگەن جانۋاردىڭ سىزباسىن تاۋىپ الۋعا بولادى. كەيىنگى جىلدارى ءۇيدىڭ اۋلاسىنا ءمۇسىن جاساپ قوياتىن بولدىم. اۋىل بالالارى كەلىپ تاماشالاپ, سۋرەتكە ءتۇسىپ كەتەدى. بيىل كورسيكالىق ءيتتىڭ ءمۇسىنىن جاسادىم. جۇرتتىڭ كوبى شىن يت ەكەن دەپ ويلاپ قالادى. وتكەندە وسى ءمۇسىندى كورگەن ءبىر تانىسىم قورىققانىنان جالما-جان كولىگىنە قايتا كىرىپ كەتتى», دەيدى سەرىك.
قار مۇسىنگە جاراتاتىن شيكىزات ازىرلەۋ ءادىسى دە قىزىق. شەبەر اياق ءىزى تۇسپەگەن اق قاردىڭ بەتىن ارشىپ ۇلپاسىن ۇلكەن استاۋعا ۇيەدى دە, ۇستىنەن جابىسقاق كۇيگە جەتكەنشە ازداپ سۋ قوسادى.
«بىرىنشىدەن, مۇنداي قارمەن جاسالعان فيگۋرا وتە مىقتى كەلەدى, كوپكە دەيىن تۇرادى. ەكىنشىدەن, قار ساز سياقتى جابىسقاق بولعاندىقتان, بىردەن ءۇستى-ۇستىنە جابىستىرىپ ءمۇسىن جاساي بەرۋگە بولادى. تەك كەيبىر كەدىر-بۇدىر تۇستارىن بالتامەن جونىپ وتىرامىن. قاردان ءمۇسىن جاساۋعا اۋا رايى دا قولايلى بولۋ كەرەك. مەن ادەتتە 15–20 گرادۋس ايازدا جۇمىسقا كىرىسەمىن. بۇدان جىلى بولسا, ءمۇسىن ەرىپ, قۇلاي بەرەدى. ال قاتتى ايازدا جارىلىپ كەتەدى. اۋلاداعى جۇمىسىم نەگىزگى جۇمىسىمنان كەيىن, كەشكە جاقىن باستالادى. كەيدە اي جارىقتا ءتۇن جارىمعا دەيىن سوزىلىپ كەتەدى. بۇل ۋاقىتتا كۇن سۋىتىپ, اياز كۇشەيە تۇسەدى. الايدا مۇندايدا ايازدى ۇمىتىپ كەتەسىڭ. ويىڭداعى دۇنيەنىڭ ءاربىر بولشەگى كوز الدىڭدا تۋىپ, ءمۇسىننىڭ سۇلباسى ءسات سايىن ايقىندالا تۇسكەن سايىن ارقاڭ تەرگە مالشىنىپ, جۇمىستىڭ قىزىعىنا بەرىلە تۇسەسىڭ», دەيدى قولونەر شەبەرى.
قوستاناي وبلىسى