ەنەرگەتيكا مينيسترلىگىنىڭ مەملەكەتتىك ەنەرگەتيكالىق قاداعالاۋ جانە باقىلاۋ كوميتەتىنىڭ توراعاسى ەرجان ەرتاەۆ پاۆلودار وبلىسىنا جۇمىس ساپارى اياسىندا ەكىباستۇز گرەس-1 ستانتسياسىنا بارىپ, الداعى كۇزگى-قىسقى كەزەڭدە ەلىمىزدىڭ ءىرى ەنەرگيا كوزدەرىنىڭ سەنىمدى جۇمىسىن قامتاماسىز ەتۋ ماسەلەلەرى بويىنشا كوشپەلى كەڭەس وتكىزدى, دەپ حابارلايدى Egemen.kz.
كەڭەسكە «KEGOC» اق, «سامۇرىق-ەنەرگو» اق, ەكىباستۇز گرەس-1, ەكىباستۇز گرەس-2, «ەەك» اق, پاۆلودار وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىلىعى قاتىستى.
كەڭەس بارىسىندا ەلەكتر ستانتسيالارىنىڭ اعىمداعى جۇمىس كورسەتكىشتەرى, جوندەۋ باعدارلامالارىنىڭ ورىندالۋى جانە جابدىقتاردىڭ پايدالانۋ سەنىمدىلىگىن ارتتىرۋ شارالارى قارالدى.
وتكەن جىلىتۋ ماۋسىمىنداعى ەنەرگيا نىساندارى جۇمىسىنىڭ مونيتورينگ ناتيجەلەرىنە ەرەكشە نازار اۋدارىلىپ, سونىڭ قورىتىندىسى بويىنشا تەحنولوگيالىق بۇزۋشىلىقتاردى ازايتۋعا جانە جابدىقتاردىڭ تۇراقتى جۇمىسىن ارتتىرۋعا باعىتتالعان قوسىمشا تەحنيكالىق جانە وندىرىستىك باقىلاۋ شارالارى ايقىندالدى.
ەكىباستۇزدا كارتونعا ماركەرمەن مەملەكەتتىك ءنومىر جازىپ العان جۇرگىزۋشى ۇستالدى
كوميتەت توراعاسى ەكىباستۇز ەنەرگيا تورابىنداعى جۇيە قۇراۋشى ەلەكتر ستانتسيالارى ەلىمىزدىڭ تۇراقتى ەنەرگيامەن جابدىقتالۋى ءۇشىن ستراتەگيالىق ماڭىزعا يە ەكەنىن اتاپ ءوتىپ, ولاردى دايىنداۋ ماسەلەلەرى ەنەرگەتيكا مينيسترلىگىنىڭ ەرەكشە باقىلاۋىندا ەكەنىن ايتتى.
الداعى جىلىتۋ ماۋسىمىنا دايىندىق اياسىندا ەكىباستۇز گرەس-1 ستانتسياسىندا ءبىر ەنەرگوبلوك كۇردەلى جوندەلۋدە, ەكىباستۇز گرەس-2-دە دە ءبىر ەنەرگوبلوكتا جوندەۋ جۇمىستارى جۇرگىزىلۋدە. ءوز كەزەگىندە «ەەك» اق ءبىر ەنەرگوبلوكتىڭ كۇردەلى جوندەۋ جۇمىستارىن اياقتادى.
«نەگىزگى مىندەت – جابدىقتاردىڭ جىلىتۋ ماۋسىمىنا تولىق دايىن بولۋىن قامتاماسىز ەتۋ. بارلىق جوندەۋ جۇمىستارى كەستەگە سايكەس جانە ساپا مەن سەنىمدىلىك تالاپتارىن ساقتاي وتىرىپ ورىندالۋى ءتيىس», دەپ اتاپ ءوتتى ەرجان ەرتاەۆ.
كەڭەس قورىتىندىسى بويىنشا ەلەكتر ستانتسيالارىنىڭ باسشىلىعىنا جوندەۋ جۇمىستارىنىڭ ۋاقتىلى ءارى ساپالى ورىندالۋىنا جەكە باقىلاۋدى قامتاماسىز ەتۋ تاپسىرىلدى. كوميتەتتىڭ اۋماقتىق دەپارتامەنتىنە ەنەرگيا كوزدەرىنىڭ كۇزگى-قىسقى كەزەڭگە دايىندىعىنا اپتا سايىن باقىلاۋ جۇرگىزۋ جۇكتەلدى.
ەكىباستۇزدا تسيفرلىق حاب قۇرىلادى: جەر ۋچاسكەلەرى انىقتالىپ, كەلىسىمدەر جاسالدى
جۇمىس ساپارىنىڭ سوڭىندا ەرجان ەرتاەۆ ەكىباستۇز جەو-سىنا دا بارىپ, جوندەۋ ناۋقانىنىڭ بارىسى مەن جىلۋ كوزىنىڭ الداعى جىلىتۋ ماۋسىمىنا دايىندىق جۇمىستارىمەن تانىستى.