ەلىمىزدە مەيرامحاناداعى تاعام ساپاسىز نەمەسە تولىق پىسپەگەن جاعدايدا, كەلۋشى ونىڭ اقىسىن تولەۋدەن باس تارتا الا ما؟ جۋرناليستەردىڭ بۇل ساۋالىنا تۇتىنۋشىلاردىڭ قۇقىقتارىن قورعاۋ كوميتەتىنىڭ توراعاسى بولات تانابەرگەنوۆ جاۋاپ بەردى, دەپ جازادى Egemen.kz.
كوميتەت توراعاسىنىڭ ايتۋىنشا, مۇنداي جاعدايدا تۇتىنۋشى الدىمەن مەكەمە اكىمشىلىگىنە شاعىمدانۋى كەرەك. ماسەلەنى اۋىزشا شەشۋگە تىرىسۋ قاجەت, ال كەلىسىمگە كەلۋ مۇمكىن بولماسا, كافە نەمەسە مەيرامحانا يەسىنە جازباشا شاعىم بەرۋ كەرەك.
«ەگەر ماسەلەنى اۋىزشا شەشۋ مۇمكىن بولماسا, تاپسىرىس اقىسىن ءبارىبىر تولەۋگە تۋرا كەلۋى ىقتيمال. ودان كەيىن جاعدايدى انىقتاپ, ۋاكىلەتتى ورگاندارعا جۇگىنۋگە بولادى. ەگەر شاعىمعا جاۋاپ بەرىلمەسە نەمەسە نارازىلىق تۋىنداسا, ازاماتتار اۋماقتىق ساۋدا جانە تۇتىنۋشىلار قۇقىقتارىن قورعاۋ دەپارتامەنتىنە دە جۇگىنە الادى», دەدى تانابەرگەنوۆ.
ەسكە سالا كەتەيىك, ەلوردادا 2026 جىلدىڭ العاشقى ءۇش ايىندا تۇتىنۋشىلاردان 3 مىڭنان استام ءوتىنىش ءتۇسىپ, ولاردىڭ ناتيجەسىندە 48,4 ملن تەڭگە قايتارىلدى.
بۇعان دەيىن ەلىمىزدە ساتۋشىلاردىڭ ۇستىنەن QR-كود ارقىلى شاعىمدانۋ جۇيەسى ەنگىزىلەتىنىن حابارلاعان ەدىك.