قازاقستاندا تۇرعىن ءۇي الۋ نەمەسە ەمدەلۋ ماقساتىندا بىرىڭعاي جيناقتاۋشى زەينەتاقى قورى جيناعىنان مەرزىمىنەن بۇرىن شەشىپ الۋعا بولاتىن قاراجات كولەمى قىسقارۋى ىقتيمال. بۇل زەينەتاقى جيناعىنىڭ جەتكىلىكتىلىك شەگىن ەسەپتەۋ ءتاسىلىنىڭ وزگەرۋىنە بايلانىستى, دەپ حابارلايدى Egemen.kz.
جاڭا ۇسىنىس بويىنشا, ەندى جەتكىلىكتىلىك شەگىن انىقتاۋدا بۇرىنعى ەسەپتەۋ مودەلىنىڭ ورنىنا مەديانالىق جالاقى نەگىزگە الىنۋى مۇمكىن. قازىرگى تاڭدا ونىڭ كولەمى شامامەن 340 مىڭ تەڭگەنى قۇرايدى.
جەتكىلىكتىلىك شەگى – ازاماتتىڭ زەينەتاقى شوتىندا مىندەتتى تۇردە قالۋعا ءتيىس ەڭ تومەنگى سوما. ياعني, وسى مەجەدەن اسقان قاراجاتتى عانا تۇرعىن ءۇي, يپوتەكا نەمەسە ەمدەلۋ ماقساتىندا پايدالانۋعا بولادى.
زەينەتاقى جيناعىنىڭ شەكتى دەڭگەيى وزگەرەدى: ەندى اقشا قالاي ەسەپتەلەدى؟
قازىرگى جۇيە بويىنشا كەيبىر ازاماتتاردىڭ جيناعىنداعى بىرنەشە ميلليون تەڭگەنى مەرزىمىنەن بۇرىن شەشىپ الا الادى. الايدا جاڭا مودەل ەنگىزىلسە, شوتتا كوبىرەك قاراجات قالدىرۋ تالابى قويىلۋى مۇمكىن.
بىرىڭعاي جيناقتاۋشى زەينەتاقى قورى مالىمەتىنشە, قازىرگى ەسەپتەۋ ءتاسىلى بولاشاقتا ازاماتتارعا جەتكىلىكتى دەڭگەيدە زەينەتاقى تولەۋگە تولىق كەپىل بولا المايدى. قوردىڭ باعالاۋىنشا, ەگەر ادامدار جيناعىن قازىرگى شەككە دەيىن ازايتسا, زەينەتكە شىققان كەزدە تەك كۇنكورىس دەڭگەيىنە جۋىق تولەم الۋى ىقتيمال. قازىرگى ەسەپپەن بۇل شامامەن 50 مىڭ تەڭگە كولەمىندە.
جاڭا ءتاسىل حالىقارالىق ستاندارتتارعا جاقىنداۋدى كوزدەيدى. ياعني, بولاشاقتا زەينەتاقى مولشەرى ادامنىڭ بۇرىنعى تابىسىنىڭ شامامەن 40 پايىزىنا تەڭ بولۋى قاجەت دەگەن قاعيدا نەگىزگە الىنباق.
زەينەتاقى شەگىن كوتەرۋ جوباسى قوعامدىق تالقىلاۋدا قولداۋ تاپپادى
سونىمەن قاتار, مەرزىمىنەن بۇرىن پايدالانۋ تەتىگى تولىق جويىلمايدى. قازاقستاندىقتار بۇرىنعىداي تۇرعىن ءۇي ماسەلەسىن شەشۋگە نەمەسە ەمدەلۋگە قارجى الا الادى. بىراق شوتتا جاڭا بەلگىلەنەتىن «قول سۇعىلمايتىن» ەڭ تومەنگى سوما مىندەتتى تۇردە ساقتالۋعا ءتيىس.