سوت اكىمدىككە ارنايى ءوتىنىش جاسادى

وعان قالالىق سوتتىڭ القا توراعالارى, ۇيلەستىرۋشى-سۋديالارى, اۋداندىق جانە وعان تەڭەستىرىلگەن سوتتاردىڭ توراعالارى, ۇيلەستىرۋشى-سۋديالارى, قر سوت اكىمشىلىگى شىمكەنت بويىنشا دەپارتامەنتىنىڭ باسشىسى قاتىستى.

قىلمىستىق ىستەر جونىندەگى سوت القاسىنىڭ توراعاسى ب. دۇيسەبەكوۆتىڭ ايتۋىنشا, وتكەن جىلى سوت 2 856 قىلمىستىق ءىس قاراعان. الدىڭعى جىلعا قاراعاندا بىلتىرعى تۇسكەن قىلمىستىق ىستەر سانى 18-گە كوپ. وتكەن جىلى قارالىپ بىتپەگەن 115 قىلمىستىق ءىس بيىلعا قالىپ وتىر. 32 ازاماتتىڭ سوت ۇكىمى جويىلىپ, 91-نە قاتىستى ۇكىم وزگەرگەن.

ب.دۇيسەبەكوۆتىڭ مالىمدەۋىنشە, بىلتىر سىبايلاس جەمقورلىق قىلمىسىمەن ۇستالعان 34 تۇلعاعا سوت باس بوستاندىعىنان ايىرۋ جازاسىن تاعايىنداعان. ءدال وسىنداي قىلمىسپەن سوتتالعان 11 ازامات ايىپپۇل جازاسىن ارقالادى. 189 ملن تەڭگە كولەمىندە جالپى ايىپپۇل سالىنسا, سونىڭ 180 ميلليونى مەملەكەت پايداسى ءوندىرىلدى. قالعان 9 ملن تەڭگەنىڭ تولەۋ مەرزىمى ءالى اياقتالمادى. كۇزەتپەن ۇستاۋدىڭ بۇلتارتپاۋ شاراسىن سانكتسيالاۋ جونىندە 1 377 ءوتىنىشحات قارالسا, سونىڭ 758-ءى قاناعاتتاندىرىلعان.  

ازاماتتىق سوت ىستەرى جونىندەگى سوت القاسىنىڭ توراعاسى ءلايلا تاكىشەۆانىڭ بايانداماسىندا ايتىلعانداي, بىلتىر اۋداندىق سوتتارعا 60 233 ءىس پەن ارىز كەلىپ تۇسكەن, بۇل كورسەتكىش وتكەن جىلمەن سالىستىرعاندا 24.6%-عا ارتقان. سوت  قاراعان ىستەردىڭ جارتىسى جۋىعىن وتباسىلىق داۋلار قۇراعان. سوت شىعارعان شەشىمدەردىڭ 243-ءى اپپەلياتسيالىق ساتىدا ءوز كۇشىن جويعان. بۇل شامامەن قارالعان ىستەردىڭ 1%-نا تەڭ. سوتتىڭ كاسساتسيالىق ساتىسىندا 10 قاۋلى كۇشىن جويىپ, 6 قاۋلى وزگەرگەن. سۋديا ل.تاكىشەۆانىڭ مالىمدەۋىنشە, 3 692 ءىس تاتۋلاسۋمەن اياقتالعان. داۋلاردىڭ بەيبىت جولمەن شەشىلۋىنە مەدياتسيا كوپ اسەرىن تيگىزگەن.

قازاقستان سوت اكىمشىلىگى شىمكەنت قالاسى بويىنشا دەپارتامەنتىنىڭ باسشىسى بەرىك مەيىرحانوۆ بىلتىر 17 مەملەكەتتىك قىزمەتكەر مەريتوكراتيا نەگىزىندە جوعارى لاۋازىمدارعا تاعايىندالعانىن اتاپ ءوتتى. سونداي-اق ول سوت سالاسى – ادىلدىك پەن زاڭ ۇستەمدىگىن قامتاماسىز ەتەتىن جاۋاپتى ءارى بەدەلدى سالا بولعاندىقتان وعان جاستاردى تارتىپ, كاسىبي باۋلۋ كەرەك ەكەنىن مالىمدەدى.

دەپارتامەنت باسشىسى سوت جۇيەسىن تسيفرلاندىرۋ باعىتىندا كوپ جۇمىستار اتقارىلىپ جاتقانىن باياندادى. ماسەلەن وسى كۇندە سوت وتىرىستارىن ازاماتتار ونلاين رەجيمىندە باقىلاي الادى. ەلەكتروندىق قىزمەتتەردىڭ ارتۋىنا تورەلىك پلاتفورماسى كوپ كومەگىن تيگىزگەن. كومپيۋتەر جادىندا دەرەكتەردىڭ كوبەيۋىنە بايلانىستى سوت تورەلىك-2 پلاتفورماسىنا كوشىپ جاتىر.

ب.مەيىرحانوۆتىڭ سوزىنشە, بۇل جۇمىستار بيىل جىل سوڭىنا دەيىن اياقتالۋى ءتيىس. بۇل كۇندە وزگە وڭىرلەردىڭ سوتتارى شىمكەنتتە شىعارىلعان سوت شەشىمدەرى, قاۋلى, ۇكىمدەردى ونلاين تۇردە كورىپ وتىرادى. ماماننىڭ پىكىرىنشە, سول ارقىلى سۋديالار ءبىر-بىرىمەن تاجىريبە الماسىپ, كاسىبي بىلىكتىلىكتەرىن شىڭداي تۇسەدى.

سونداي-اق مەگاپوليستە قۇزىرلى ورگانداردىڭ بىرىڭعاي دەرەكتەر قورى جۇمىس ىستەيدى. وعان سوت, پروكۋراتۋرا, پوليتسيا دەپارتامەنتى باسقا دا ءتيىستى مەكەمەلەر قوسىلعان. وسى دەرەكقور بازاسىنان سوت جۇيەسىنىڭ قىزمەتكەرلەرى وزىنە كەرەكتى اقپاراتتى وڭاي تاۋىپ الادى. تسيفرلىق تەحنولوگيانىڭ تاعى ءبىر مۇمكىنشىلىگى قازىر سوتتاردىڭ قاۋلى, اكتىلەرىنىڭ ءبىر بولىگىن جاساندى ينتەللەكەت كومەگىمەن روبوتتار دايىندايتىن بولعان. ونىڭ ۇلەسى بۇگىندە 30% بولسا, كەلەشەكتە بۇل كورسەتكىشتى بارىنشا ارتتىرا ءتۇسۋ جوسپاردا بار.

ءباسپاسوز ءماسليحاتىندا سوتتاردىڭ قايىرىمدىلىق ىستەرگە ەرەكشە كوڭىل بولەتىنى ءسوز بولدى. ماسەلەن 2019 جىلدان بەرى شىمكەنت قالالىق سوتى №4 بالالار ءۇيىنىڭ تاربيەلەنۋشىلەرىن باسپانامەن قامتاماسىز ەتۋ ىسىنە ارالاسىپ كەلەدى. بۇگىنگە دەيىن سوت جۇيەسىنىڭ ماماندارى وسى قايىرىمدىلىق ىسكە 80 ملن تەڭگە قاراجات جۇمساعان. سونىمەن بىرگە جىل سايىن بالالار كۇنىنە وراي بالالار ءۇيىنىڭ تاربيەلەنۋشىلەرىن قۇتتىقتاپ بارۋ ادەمى داستۇرگە اينالعان.

ءوز كەزەگىندە اكىمشىلىك ىستەر جونىندەگى سوت القاسىنىڭ توراعاسى گۇلميرا قىدىرباەۆا مەملەكەتتىك ساتىپ الۋ باسقارماسىنا قاتىستى سوتتىڭ شىعارعان جەكە ۇيعارىمىن باسشىلىققا الۋ جونىندە شىمكەنت قالاسى اكىمدىگىنە بۇقارالىق اقپارات قۇرالدارى ارقىلى ارنايى مالىمدەمە جاسادى. ونىڭ ايتۋىنشا, اتالعان باسقارما جىل سايىن ءوزىنىڭ قىزمەتىن ىسكە اسىرۋ بارىسىندا كوپتەگەن زاڭبۇزۋشىلىقتارعا جول بەرەدى. سونىڭ سالدارىنان مەكتەپتەردەگى تاماقتاندىرۋ سالاسىندا قىزمەت اتقاراتىن كاسىپكەرلەرمەن مەمەلكەتتىك ساتىپ الۋ بويىنشا ارادا داۋلار تۋىنداپ جاتادى. ەڭ قىزىعى سوت نەشە جىلدان بەرى جەكە ۇيعارىم شىعارعانىمەن ول ءتيىستى ورگاندار تاراپىنان نازارعا الىنباي كەلەدى.