الماتى وبلىسىندا اۋە تاكسيى العاش رەت سىناقتان وتكىزىلدى

اەروتاكس ساعاتىنا 200 شاقىرىمدى ەڭسەرە الادى. قۋاتى دا 200 شاقىرىمعا شاقتالعان. ءبىر ۇشقىش پەن بەس جولاۋشىنى تاسىمالداي الادى. 13 ەلەكترقوزعالتقىشپەن جابدىقتالعان. باسقا كولىك تۇرلەرىمەن سالىستىرعاندا دىبىسى الدەقايدا باسەڭ جانە كومىرقىشقىل گازىن شىعارمايدى. قاۋىپسىزدىك تالاپتارىنا سايكەس العاشقى سىناق جولاۋشىسىز وتكىزىلدى, – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

ەلىمىزدە ەندى ۇشاتىن تاكسيلەر پايدا بولادى

شاراعا وبلىس اكىمى مارات سۇلتانعازيەۆ تە قاتىسىپ, جوبا وتاندىق كولىك سالاسىنىڭ تاريحىنداعى ايتۋلى جاڭالىق ەكەنىن اتاپ ءوتتى.

«وزدەرىڭىزگە بەلگىلى, جاقىندا عانا مەملەكەت باسشىسى قاسىم-جومارت توقاەۆ «الاتاۋ قالاسىنىڭ ارناۋلى قۇقىقتىق رەجيمى تۋرالى» كونستيتۋتسيالىق زاڭعا قول قويدى. قالا كەلەشەكتە ەكونوميكالىق ءوسىم ءۇشىن قولايلى ەكوجۇيەگە اينالادى. ال بۇگىنگى جوبا – وزىق تەحنولوگيالار مەن «اقىلدى قالا» تۇجىرىمداماسىن جۇزەگە اسىرۋعا باعىتتالعان ماڭىزدى قادام. وسىنداي زاماناۋي ۇشىپ-قونۋ قۇرىلعىلارىن دامىتۋعا كۇش سالىپ جاتقان «Alatau Advance Air Group Ltd.» كومانداسىنىڭ ەڭبەگى ەرەكشە قۇرمەتكە لايىق.اتالعان باستاما الاتاۋ قالاسىن يننوۆاتسيالار مەن تسيفرلاندىرۋدىڭ باستى ورتالىعى رەتىندە دامىتۋ تۇجىرىمداماسىمەن تولىق ۇندەسىپ جاتىر. جوباعا 250 ملن دوللار ينۆەستيتسيا تارتىلدى. بۇل – Alatau City-ءدىڭ بولاشاعىنا دەگەن جوعارى سەنىمنىڭ كورىنىسى. بۇگىندە ەلىمىز جاھاندىق تەحنولوگيالىق وزگەرىستەردى سىرتتاي باقىلاپ قانا قويماي, ولاردىڭ بەلسەندى قاتىسۋشىسىنا اينالدى. كوك اسپاندى باعىندىرعان اۋە تاكسيلەرىنىڭ ساپارى ءساتتى ءارى قاۋىپسىز بولسىن. ورتالىق ازياداعى زاماناۋي اۆياتسيانىڭ جاڭا ءداۋىرى ءدال وسى ءبىزدىڭ وڭىردەن باستاۋ العانى – ءبارىمىز ءۇشىن ۇلكەن ماقتانىش», – دەدى ايماق باسشىسى.

سونداي-اق جوبانى ىسكە اسىرۋشى سەرىكتەستەرمەن كەلىسىمشارتقا قول قويدى. «Alatau City Authority»-تىڭ باس اتقارۋشى ديرەكتورى الىشەر ابدىقادىروۆ ءوز سوزىندە يگى باستامانىڭ بەرەتىن مۇمكىندىكتەرىنە توقتالدى.

«بۇگىن ءبىز قازاقستان ءۇشىن تاريحي ءساتتىڭ كۋاسى بولىپ وتىرمىز. ەلىمىزدە العاش رەت اەروتاكسي سىناقتان ءوتتى. بۇل تەك جاڭا تەحنولوگيانى تانىستىرۋ ەمەس, سونىمەن قاتار يننوۆاتسيا مەن تسيفرلىق تەحنولوگياعا نەگىزدەلگەن جاڭا قالانىڭ دامۋ كەزەڭىنىڭ باستاماسى. Alatau City – بولاشاقتىڭ قالاسى. سوندىقتان ەلىمىزدىڭ اۋە موبيلدىلىگى مەن جاڭا يندۋسترياسىنىڭ دامۋى ءدال وسى جەردەن باستالۋىنىڭ سيمۆولدىق ءمانى زور. ءبىزدىڭ ماقسات – تەحنولوگيانى جاي عانا ەنگىزۋ ەمەس, ونىڭ تولىققاندى ەكوجۇيەسىن قالىپتاستىرۋ. ياعني قاجەتتى ينفراقۇرىلىم قۇرۋ, ينجەنەرلىك سالانى دامىتۋ جانە جاڭا جۇمىس ورىندارىن اشۋ», – دەدى ول.

eVTOL اۋە تاكسيىنىڭ ۇشىپ-قونۋى ءۇشىن قۋاتتاۋ جانە ناۆيگاتسيالىق جۇيەلەرمەن جابدىقتالعان ۆەرتيپورتتار پايدالانىلادى. ولاردى قالا ورتاسىنا – عيمارات شاتىرلارىنا, كولىك توراپتارىنا جانە بيزنەس-كلاستەرلەرگە ورنالاستىرۋعا بولادى. قازىرگى تاڭدا Alatau City-دە العاشقى ۆەرتيپورتتىڭ قۇرىلىسى باستالىپ كەتتى. بولاشاقتا الاتاۋ قالاسى, الماتى جانە الماتى وبلىسىنىڭ تۋريستىك ايماقتارىندا ۆەرتيپورتتار جەلىسىن قۇرۋ جوسپارلانىپ وتىر. مارشرۋتتار ءوڭىردىڭ نەگىزگى كولىك توراپتارىن بايلانىستىرادى دەپ كۇتىلۋدە.

ءىس-شارا بارىسىندا اەروتاكسيمەن قاتار جۇك تاسىمالدايتىن دروندار مەن تسيفرلىق ناۆيگاتسيا پلاتفورماسى دا تانىستىرىلدى.

قازىرگى تاڭدا الەم بويىنشا جولاۋشى تاسىمالدايتىن اەروتاكسيلەر ءالى سىناقتان وتكىزىلىپ جاتىر. ازىرگە ينفراقۇرىلىمدى دايىنداۋ جۇمىستارى جۇرگىزىلىپ, قۇجاتتارى ازىرلەنۋدە. 2029 جىلعا قاراي ىسكە قوسىلۋى مۇمكىن. بۇل جوبا تەك ءوڭىردىڭ عانا ەمەس ەلىمىزدىڭ اۋە تاسىمالىن دامىتۋعا سەرپىن بەرەتىنى ءسوزسىز.