بىرنەشە اي بويى ءومىر ءۇشىن كۇرەسكەن الەكسەي ۆيۆتونەنكو كوز جۇمدى. بۇل تۋرالى ونىڭ جاقىندارى 8 ماۋسىم كۇنى حابارلادى, دەپ جازادى Egemen.kz.
36 جاستاعى ازامات 2026 جىلدىڭ اقپان ايىندا تايلاندتىڭ پحۋكەت ارالىندا دەمالىپ جۇرگەن كەزدە جاعدايى كۇرت ناشارلاپ, شۇعىل تۇردە اۋرۋحاناعا جەتكىزىلگەن بولاتىن. دارىگەرلەر وعان ۇيقى بەزىنىڭ جەدەل قابىنۋى مەن پانكرەونەكروزدىڭ اۋىر ءتۇرىن, سونداي-اق تىنىس الۋ جانە بۇيرەك جەتكىلىكسىزدىگىن انىقتاعان.
كەيىن ناۋقاستىڭ جاعدايى ودان ءارى كۇردەلەنىپ, سەپسيس, ەكىجاقتى پنەۆمونيا جانە بۇيرەكتىڭ جەدەل زاقىمدانۋى تىركەلدى. ەمدەۋ بارىسىندا الەكسەي بىرنەشە وپەراتسيانى باستان وتكەرىپ, جاساندى كومادا جاتقان. ول ۇزاق ۋاقىت جانساقتاۋ بولىمىندە ەم قابىلدادى.
ازاماتتىڭ تاعدىرى قوعام نازارىن اۋدارىپ, مىڭداعان ادام ونىڭ جاعدايىن باقىلاپ وتىردى. كوپشىلىك ەم-دوم شىعىندارى مەن مەديتسينالىق ەۆاكۋاتسياعا قاراجات جيناۋعا اتسالىستى.
ءبىر ايدان كەيىن ونى ەلگە جەتكىزۋ مۇمكىن بولىپ, 18 ساۋىردە الەكسەي قازاقستانعا ارنايى مەديتسينالىق بورتپەن تاسىمالداندى. الايدا تايلاند پەن قازاقستان دارىگەرلەرىنىڭ بارلىق كۇش-جىگەرىنە قاراماستان, ونىڭ ءومىرىن ساقتاپ قالۋ مۇمكىن بولمادى.
مارقۇمنىڭ تۋىستارى مەن جاقىندارى وسى ۋاقىت بويى قولداۋ كورسەتكەن جانە ساۋىعىپ كەتۋىنە تىلەك بىلدىرگەن بارشا ازاماتقا العىس ايتتى.