استانادا «حان شاتىر» ساۋدا ويىن-ساۋىق ورتالىعىنىڭ اۆتوتۇراعىندا بولعان وقيعا الەۋمەتتىك جەلىلەردە كەڭىنەن تالقىلانىپ جاتىر, دەپ حابارلايدى Egemen.kz.
كۋاگەردىڭ ايتۋىنشا, بىرنەشە ادام جاس قىزدى كۇشتەپ كولىككە وتىرعىزۋعا ارەكەت جاساعان.
Threads جەلىسىنىڭ قولدانۋشىسى بىرنەشە ادامنىڭ بويجەتكەندى ەركىنەن تىس اۆتوكولىككە وتىرعىزۋعا تىرىسقانىن كورگەن. جاريالانىم اۆتورىنىڭ مالىمەتىنشە, قىزدىڭ قول-اياعى بايلانىپ, دىبىسىن شىعارماس ءۇشىن اۋزىن جاپقان.
كۋاگەر جۇبايىمەن بىرگە ساۋدا ورتالىعىنىڭ كۇزەت قىزمەتىنەن كومەك سۇراپ, 102 نومىرىنە حابارلاسقانىن ايتقان.
كەيىنىرەك قىزدى الىپ كەتۋگە ارەكەتتەنگەن ادامدار ونىڭ قايىن جۇرتى بولىپ شىققان. تۋىستارىنىڭ نۇسقاسى بويىنشا بويجەتكەننىڭ پسيحيكالىق دەنساۋلىعىنا قاتىستى ماسەلە بار كورىنەدى. ولار قىزدى ءۇش كۇن بويى ىزدەگەندەرىن جانە ونى ۇيىنە قايتارماق بولعانىن مالىمدەگەن. الايدا بۇل اقپارات رەسمي تۇردە راستالعان جوق. سونداي-اق قىزدىڭ قازىرگى جاعدايى جانە وقيعاعا قاتىستى ءوز ۇستانىمى تۋرالى مالىمەت جاريالانباعان.
وقيعا الەۋمەتتىك جەلى قولدانۋشىلارى اراسىندا قىزۋ پىكىرتالاس تۋعىزدى. كوپشىلىك كۇش قولدانعان ادامداردىڭ ارەكەتىن سىنعا الىپ, قۇقىق قورعاۋ ورگاندارىن تەكسەرۋ جۇرگىزۋگە شاقىردى. كەيبىر پىكىر قالدىرۋشىلار بۇل جاعدايدان قىلمىستىق قۇقىق بۇزۋشىلىق بەلگىلەرىن كورۋگە بولاتىنىن ايتقان.
سونىمەن قاتار كەيبىر قولدانۋشىلار تۋىستارىنىڭ ارەكەتى قىزدىڭ جاعدايىنا بايلانىستى بولۋى مۇمكىن دەگەن بولجام جاسادى. دەگەنمەن, ولار دا مۇنداي ماسەلە تەك زاڭ اياسىندا جانە ۋاكىلەتتى ورگانداردىڭ قاتىسۋىمەن شەشىلۋى ءتيىس ەكەنىن اتاپ ءوتتى.
قازىر رەسمي ورگاندار وقيعاعا قاتىستى تولىق اقپارات تاراتقان جوق. قىزدىڭ جەكە باسى, وقيعاعا قاتىسۋشىلار جانە ولاردىڭ ارەكەتىنە بەرىلەتىن قۇقىقتىق باعا تۋرالى ناقتى مالىمەتتەر جاريالانباعان.
ەسكە سالا كەتەيىك, ەلىمىزدە نەكەگە ماجبۇرلەۋ مەن ادام ۇرلاۋعا قاتىستى زاڭ وزگەرەتىنى تۋرالى حابارلاعان بولاتىنبىز.