«قازگيدرومەت» 8 ماۋسىمدا اۋا رايىنا بايلانىستى ەسكەرتۋ جاريالادى. ەلىمىزدىڭ باسىم بولىگىندە نايزاعاي, بۇرشاق, قاتتى جەل, شاڭدى داۋىل جانە اپتاپ ىستىق كۇتىلەدى, دەپ حابارلايدى Egemen.kz.
سينوپتيكتەردىڭ مالىمەتىنشە, اباي, اقتوبە, اتىراۋ, باتىس قازاقستان, قوستاناي, سولتۇستىك قازاقستان جانە شىعىس قازاقستان وبلىستارىندا جاڭبىر جاۋىپ, نايزاعاي ويناپ, كەي جەرلەردە بۇرشاق ءتۇسۋى مۇمكىن. جەلدىڭ جىلدامدىعى سەكۋندىنا 15-20 مەترگە دەيىن جەتەدى.
جەتىسۋ, قاراعاندى, پاۆلودار جانە ۇلىتاۋ وبلىستارىندا اۋا تەمپەراتۋراسى 35-37 گرادۋسقا دەيىن كوتەرىلىپ, قاتتى ىستىق بولادى. قىزىلوردا مەن ماڭعىستاۋ وبلىستارىندا شاڭدى داۋىل كۇتىلەدى.
سونىمەن قاتار استانا, شىمكەنت جانە بىرقاتار وڭىرلەردە جوعارى جانە توتەنشە ءورت قاۋپى ساقتالىپ وتىر.
ماماندار تۇرعىنداردى اۋا رايىنىڭ قولايسىز جاعدايلارىنا بايلانىستى ساقتىق شارالارىن ساقتاۋعا شاقىردى.
ەسكە سالا كەتەيىك, «قازگيدرومەت» ۇسىنعان بولجامعا سايكەس, ماۋسىم جانە تامىز ايلارى ادەتتەگىدەن ىستىق بولادى. قازاقستان اۋماعىندا اۋا تەمپەراتۋراسى كليماتتىق نورمادان 1-2 گرادۋسقا جوعارى بولۋى مۇمكىن. ەلدىڭ وڭتۇستىگىندە كەي كۇندەرى اۋا تەمپەراتۋراسى +45 گرادۋسقا دەيىن كوتەرىلەدى.