قاراعايلى قارابۇلاق اۋىلىندا كونەنىڭ كوزىنە اينالعان اعاش ءۇيدىڭ قابىرعاسى قالانعانىنا عاسىرعا تاياعان. ىرگەتاسىنان باستاپ, شاتىرىنا دەيىن شەگە قاعىلماي سالىنعان جادىگەردىڭ تاريحى تۋرالى اۋىلداعى مادەنيەت ءۇيىنىڭ ديرەكتورى, سۋرەتشى-ءمۇسىنشى ەرجان قوجاحمەت ۇلى اڭگىمەلەپ بەردى.
«بۇل ءۇيدىڭ قۇرىلىسىندا بىردە-ءبىر شەگە جوق. شىرشالاردىڭ سايلارى ارقىلى قوبىلانىپ سالىنعان كونە جادىگەر. وزدىگىنەن قۇلامايتىن بەرىك ءۇي. 1928 جىلى تۇرعىزىلعان. 1932 جىلى قارادالا وڭىرىندەگى قىرعىزساي اۋىلىنداعى بالالار ءۇيىن وسى جەرگە كوشىرىپ اكەلگەن. مەكتەپ-ينتەرناتتا بالالار جاتىپ وقىعان. بۇل قارا شاڭىراقتا اۋىلىمىزدا دۇنيەگە كەلگەن كورنەكتى مەملەكەت جانە قوعام قايراتكەرى, قازاق رەسپۋبليكاسىنىڭ ورمان جانە اعاش وڭدەۋ ونەركاسىبى ءمينيسترى مولدان الدەرباەۆ, تاريحشى-اكادەميك كەڭەس نۇرپەيىسوۆ ساۋات اشىپ, ءبىلىم العان. وسىنداي كيەلى شاڭىراقتى ساقتاپ قالۋعا اۋىلىمىزدان شىققان قالتالى, جاناشىر ازاماتتار ارەكەت ەتىپ جاتىر. الداعى ۋاقىتتا اۋىلدىق مۋزەيگە اينالدىرىپ, ەل يگىلىگىنە جاراتۋعا نيەتتىمىز», دەيدى اۋىل ازاماتى, ونەر جاناشىرى ەرجان قوجاحمەت ۇلى.
جالپى اۋماعى 100 شارشى مەتردى قۇرايتىن اعاش ءۇيدىڭ ءىشى 3 بولمەگە بولىنگەن. العاش قالانعاننان باستاپ اۋىل بالالارىنىڭ ءبىلىم الۋىنا ەسىگىن اشقان اعاش ءۇي 2020 جىلعا دەيىن بالاباقشا رەتىندە پايدالانىلىپ كەلگەن. ودان بەرگى جىلدارى ەسىك-تەرەزەلەرى بۇلىنگەنىمەن, قابىرعاسى اكتەلىپ, ەدەنى سىرلانعان كۇيى تۇر.
الماتى وبلىسى,
قارابۇلاق اۋىلى