ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى قازاقستاندا العاش رەت ليتي-يوندى باتارەيالاردى كەشەندى قايتا وڭدەۋگە باعىتتالعان عىلىمي جوبانى جۇزەگە اسىرىپ جاتىر, دەپ جازادى Egemen.kz.
يننوۆاتسيالىق جوبا ۋنيۆەرسيتەتتىڭ ەلەكتروحيميالىق وندىرىستەر تەحنولوگياسى زەرتحاناسى بازاسىندا ورىندالىپ جاتىر. زەرتتەۋ جۇمىستارىنا PhD, دوتسەنت فيودور مالچيك جەتەكشىلىك ەتەدى. جوبانىڭ باستى ماقساتى – ىستەن شىققان اككۋمۋلياتورلاردى قاۋىپسىز كادەگە جاراتىپ قانا قويماي, ولاردىڭ قۇرامىنان ليتي, كوبالت جانە نيكەل سياقتى سيرەك كەزدەسەتىن باعالى مەتالداردى ءبولىپ الۋ. بۇل شيكىزاتتاردى كەيىننەن وندىرىستە قايتا پايدالانۋ كوزدەلىپ وتىر.
شۆەيتساريانىڭ SWISS ۇشاعى الماتى اۋەجايىنا شۇعىل قوندى
عالىمدار قولدانبالى زەرتتەۋلەر بارىسىندا مەحانوحيميالىق, سونوحيميالىق جانە ەلەكتروحيميالىق ادىستەردى قامتيتىن بىرەگەي تەحنولوگيالىق تاسىلدەردى قولدانىپ جاتىر.
«پايدالانىلعان باتارەيالار – قورشاعان ورتا ءۇشىن قاۋىپتى قالدىق قانا ەمەس, سونىمەن بىرگە باعالى مەتالداردىڭ كوزى. ءبىزدىڭ جوبا اككۋمۋلياتورلاردى جيناۋ مەن قاۋىپسىز رازريادتاۋدان باستاپ, ولاردان قۇندى كومپونەنتتەردى ءبولىپ الىپ, قايتا وڭدەۋگە دەيىنگى تولىق تسيكلدى قامتيدى. وسىلايشا, ءبىز قاۋىپتى قالدىقتاردى ەكونوميكالىق تۇرعىدان ءتيىمدى رەسۋرسقا اينالدىرۋدى ماقسات ەتىپ وتىرمىز», دەدى جوبا جەتەكشىسى فيودور مالچيك.
بۇل باعدارلامانىڭ ىسكە اسىرىلۋى ەلىمىزدەگى ەكولوگيالىق تاۋەكەلدەردى ازايتۋعا جانە تەحنوگەندىك قالدىقتار كولەمىن قىسقارتۋعا سەپتىگىن تيگىزەدى. سونىمەن قاتار, جوبا قازاقستاننىڭ جاسىل تەحنولوگيالار سالاسىنداعى عىلىمي الەۋەتىن نىعايتىپ, يمپورتتى الماستىراتىن ستراتەگيالىق شيكىزات بازاسىن قالىپتاستىرۋعا باعىتتالعان.
الماتى
جاپپاي توبەلەس: الماتىداعى ەكى ءجاسوسپىرىمنىڭ ولىمىنەن كەيىن قىلمىستىق ءىس قوزعالدى