ۇلتتىق عىلىمي ونكولوگيا ورتالىعى ماگاتە-ءنىڭ ورتالىق ازياداعى جەتەكشى ورتالىعى بولادى

قۇجات رادياتسيالىق ونكولوگيا, يادرولىق مەديتسينا, دياگنوستيكالىق ۆيزۋاليزاتسيا, مەديتسينالىق فيزيكا, راديوفارماتسيا جانە مەديتسيناداعى رادياتسيالىق قاۋىپسىزدىك باعىتتارىن قامتيدى. كەلىسىمگە ماگاتە-ءنىڭ باس ديرەكتورى رافاەل ماريانو گروسسيدىڭ قازاقستانعا ساپارى اياسىندا قول قويىلدى.

كەلىسىمگە قول قويۋ وتاندىق ونكولوگيانى دامىتۋ مەن رادياتسيالىق مەديتسينا سالاسىنداعى حالىقارالىق ىنتىماقتاستىقتى نىعايتۋدىڭ ستراتەگيالىق قادامى بولدى. نەگىزگى باعىتتاردىڭ ءبىرى – ۇلتتىق عىلىمي ونكولوگيا ورتالىعىن (ۇعوو) ماگاتە-ءنىڭ الەم بويىنشا ونكولوگيالىق كومەكتىڭ زاماناۋي تۇرلەرىنە قولجەتىمدىلىكتى كەڭەيتۋگە باعىتتالعان Rays of Hope جاھاندىق باستاماسى اياسىنداعى الەۋەتتى Anchor Centre رەتىندە دامىتۋ.

جوسپارلانعان ءىس-شارالار تولىق جۇزەگە اسقان جاعدايدا, ۇعوو الەمدەگى ماگاتە-ءنىڭ 19-شى Anchor Centre ورتالىعىنا جانە ورتالىق ازياداعى العاشقى وسىنداي ورتالىققا اينالادى.

ماگاتە-ءنىڭ باس ديرەكتورى رافاەل ماريانو گروسسي رادياتسيالىق ونكولوگيا مەن ساۋلەلىك تەراپيا سالاسىنداعى قازاقستانمەن ىنتىماقتاستىقتىڭ بۇگىندە جوعارى دەڭگەيدە دامىپ كەلە جاتقانىن جانە ونىڭ بۇكىل ءوڭىر ءۇشىن ماڭىزى زور ەكەنىن اتاپ ءوتتى.

ء«بىز ۇلتتىق عىلىمي ونكولوگيا ورتالىعىنىڭ ماگاتە-مەن ىنتىماقتاستىق اياسىندا ءجۇرىپ وتەتىن دامۋ جولىن ايقىنداعىمىز كەلەدى. بۇل تەك ورتالىقتىڭ وزىنە جاڭا مۇمكىندىكتەر اشىپ قانا قويماي, وڭىرلىك ىنتىماقتاستىققا دا نەگىز بولادى. ونكولوگيالىق اۋرۋلار مەن ودان بولاتىن ءولىم-ءجىتىم دەڭگەيى ءالى دە جوعارى. قازاقستاننىڭ ونكولوگيالىق كومەكتى دامىتۋعا ەرەكشە جاۋاپكەرشىلىكپەن قاراپ وتىرعانى زور قۇرمەتكە لايىق. بۇگىنگى كەلىسىمدەر ءوزارا بايلانىستارىمىزدى نىعايتىپ, الەمدىك دەڭگەيدەگى ورتالىقتى ودان ءارى دامىتۋعا نەگىز بولادى دەپ سەنەمىن», – دەدى مارتەبەلى مەيمان.

ىنتىماقتاستىق اياسىندا تاراپتار ءبىلىم بەرۋ باعدارلامالارىن جۇزەگە اسىرۋدى, حالىقارالىق تاعىلىمدامالار مەن عىلىمي ساپارلار ۇيىمداستىرۋدى, سونداي-اق ۇعوو ماماندارىنىڭ زەرتتەۋ جوبالارى مەن اگەنتتىكتىڭ ساراپتامالىق ميسسيالارىنا قاتىسۋىن جوسپارلاپ وتىر.

نەگىزگى نازار رادياتسيالىق ونكولوگيا, يادرولىق مەديتسينا, مەديتسينالىق فيزيكا جانە راديوفارماتسيا سالالارى بويىنشا ماماندار دايارلاۋعا اۋدارىلادى. سونىمەن قاتار ۇعوو رادياتسيالىق مەديتسينا مەن ونكولوگيا باعىتىندا كادر دايارلايتىن وڭىرلىك قۇزىرەت جانە ءبىلىم ورتالىعى رەتىندە دامۋدى كوزدەيدى.

جەكەلەگەن باعىتتاردىڭ ءبىرى رەتىندە ساپا مەنەدجمەنتى جۇيەسىن جەتىلدىرۋ كوزدەلگەن. اتاپ ايتقاندا, ساپانى باسقارۋدىڭ كەشەندى جۇيەسىن ەنگىزۋ, ىشكى اۋديتتەر جۇرگىزۋ جانە ۇعوو-نىڭ ماگاتە ستاندارتتارىنا سايكەس Anchor Centre رەتىندە جۇمىس ىستەۋگە دايىندىعىن بىرلەسىپ باعالاۋ جوسپارلانىپ وتىر.

سونىمەن قاتار حالىقارالىق ساراپشىلار ۇعوو-نىڭ ەسكى كورپۋسىن رەكونسترۋكتسيالاۋ بارىسىندا تەحنيكالىق جانە ساراپتامالىق قولداۋ كورسەتەدى. بۇل رادياتسيالىق مەديتسينا ينفراقۇرىلىمىن جاڭعىرتۋدى, جوعارى تەحنولوگيالىق جابدىقتارعا ارنالعان بولمەلەردى دايىنداۋدى, سونىڭ ىشىندە جەلىلىك ۇدەتكىشتەرمەن جابدىقتاۋدى قامتيدى.

بۇل سەرىكتەستىكتىڭ ماڭىزى ەرەكشە. سەبەبى قازىرگى ونكولوگيالىق كومەكتى حالىقارالىق تاجىريبە الماسۋسىز, عىلىمي ارىپتەستىك پەن الەمدىك وزىق تاجىريبەلەردى ەنگىزۋسىز دامىتۋ مۇمكىن ەمەس. قول قويىلعان كەلىسىم ۇعوو-نىڭ ورتالىق ازياداعى جەتەكشى ونكولوگيالىق ورتالىقتاردىڭ ءبىرى رەتىندەگى پوزيتسياسىن نىعايتىپ, وتاندىق ونكولوگيالىق قىزمەتتى جاھاندىق كاسىبي قاۋىمداستىققا ىقپالداستىرۋعا جاڭا مۇمكىندىكتەر اشادى.

قۇجاتقا ماگاتە-ءنىڭ باس ديرەكتورى رافاەل ماريانو گروسسي مەن ۇعوو باسقارما توراعاسى جاندوس بۇركىتباەۆ قول قويدى. كەلىسىم ءۇش جىل مەرزىمگە جاسالىپ, كەيىن ونى ۇزارتۋ مۇمكىندىگى قاراستىرىلعان.