وقۋ-اعارتۋ مينيسترلىگى مەكتەپتەردەگى بجب مەن تجب جۇيەسىنەن بىرتىندەپ باس تارتۋ مۇمكىندىگىن قاراستىرىپ جاتىر. ونىڭ ورنىنا باقىلاۋ جۇمىستارى كەڭىرەك قولدانىلۋى مۇمكىن. بۇل تۋرالى ۇكىمەتتەگى بريفينگتە وقۋ-اعارتۋ ءمينيسترى جۇلدىز سۇلەيمەنوۆا مالىمدەدى, دەپ حابارلايدى Egemen.kz.
مينيستر جۇلدىز سۇلەيمەنوۆانىڭ ايتۋىنشا, قازىر بۇل ماسەلە بويىنشا اۋقىمدى تالداۋ جۇمىستارى جۇرگىزىلىپ جاتىر. سونىمەن قاتار مەكتەپتەردە قازىردىڭ وزىندە ديكتانت, شىعارما جانە مازمۇنداما سياقتى جەكە باقىلاۋ جۇمىستارى ەنگىزىلىپ جاتىر.
«سوندىقتان بىرتىندەپ بجب مەن تجب-دان باس تارتۋدى ويلاستىرىپ جاتىرمىز. بىراق ول ءۇشىن ناقتى نەگىزدەمە مەن تالداۋ قاجەت», دەدى مينيستر.
ونىڭ ايتۋىنشا, بيىل ورتا ءبىلىم كوميتەتى مەن وقۋ-اعارتۋ مينيسترلىگى 2025-2026 وقۋ جىلىنداعى 1-11 سىنىپتار بويىنشا بجب مەن تجب-عا تالداۋ جۇرگىزگەن. تامىز كونفەرەنتسياسىنا دەيىن قاي سىنىپتاردا باعالاۋ جيىنتىعى ساقتالاتىنى, ال قاي سىنىپتاردا ولاردىڭ ورنىنا باعالاۋدىڭ باسقا تۇرلەرى ەنگىزىلەتىنى انىقتالماق.
بجب مەن تجب-عا بايلانىستى جۇكتەمە ماسەلەسى بىرنەشە جىلدان بەرى كوتەرىلىپ كەلەدى. 2019 جىلى مينيسترلىك كەي مەكتەپتەردە كۇنىنە 6-7 بجب نەمەسە تجب وتكىزىلەتىنىن ايتىپ, مۇنى جول بەرۋگە بولمايتىن جاعداي دەپ باعالاعان ەدى.
ايتا كەتەيىك, قازاقستاندا مەكتەپ مۇعالىمدەرىنىڭ وزدەرى ساباق بەرەتىن وقۋشىلارعا اقىلى قوسىمشا ساباق وتكىزۋىنە تىيىم سالىنباق.