كەزدەسۋدە قازاقستاننىڭ اتوم ەنەرگياسى جونىندەگى حالىقارالىق اگەنتتىكپەن ىقپالداستىق پەرسپەكتيۆاسى, سونداي-اق يادرولىق قاۋىپسىزدىكتى قامتاماسىز ەتۋ سالاسى بويىنشا جاھاندىق كۇن ءتارتىبىنىڭ وزەكتى ماسەلەلەرى تالقىلاندى, دەپ حابارلايدى Egemen.kz.
پرەزيدەنت قازاقستان ماگاتە-مەن ۇزاق جىلدار بويعى سەرىكتەستىكتى جوعارى باعالايتىنىن, سونداي-اق رافاەل گروسسيدىڭ جەتەكشىلىگىمەن ۇيىم يادرولىق قاۋىپسىزدىكتى نىعايتۋعا جانە اتوم قۋاتىن بەيبىت ماقساتتا قولدانۋعا ۇلەس قوسقانىن اتاپ ءوتتى.
ء«سىزدىڭ 2023 جىلى ءساۋىر ايىندا قازاقستانعا جاساعان العاشقى ساپارىڭىز ءوزارا بايلانىستاردى دامىتۋعا تىڭ سەرپىن بەردى. يادرولىق قارۋسىزدانۋ جانە جاپپاي قىرىپ-جويۋ قارۋىن تاراتپاۋ ماسەلەسىنە قاتىستى ۇستانىمىمىز ۇقساس دەپ ويلايمىن. دەگەنمەن الەمدە اسا كۇردەلى احۋال قالىپتاسىپ وتىر. بۇل جاھاندىق پروبلەمانى شەشۋ جولدارىن ىزدەۋدە كۇش بىرىكتىرۋدى تالاپ ەتەدى», دەدى مەملەكەت باسشىسى.
قاسىم-جومارت توقاەۆ ماگاتە-مەن ىنتىماقتاستىقتى تەرەڭدەتۋ تۋرالى 2036 جىلعا دەيىنگى جول كارتاسىنا جانە يادرولىق مەديتسينا مەن عىلىمدى دامىتۋ سالاسى بويىنشا بىرقاتار قۇجاتقا قول قويىلعانىن قۇپتادى.
پرەزيدەنت قازاقستاننىڭ يادرولىق قاۋىپسىزدىك پەن مەملەكەتارالىق سەنىمدى نىعايتۋعا باعىتتالعان جاھاندىق كۇش-جىگەرگە قوسىلۋعا الداعى ۋاقىتتا دا بەيىل ەكەنىن مالىمدەدى. وسى رەتتە قاسىم-جومارت توقاەۆ ءتيىستى حالىقارالىق ۋاعدالاستىق بولعان جاعدايدا, ەلىمىز ىزگى نيەتتى كوزدەپ, يراننىڭ يادرولىق باعدارلاماسى توڭىرەگىندەگى ماسەلەنىڭ شەشىلۋىنە اتسالىسۋعا دايىن ەكەنىن تاعى دا راستادى. سونىمەن قاتار پرەزيدەنت بۇۇ باس حاتشىسى لاۋازىمىنا ۇمىتكەر رافاەل گروسسيگە ساتتىلىك تىلەدى.
مەملەكەت باسشىسى جەڭىس قاسىمبەكتى قابىلدادى
ماگاتە باسشىسى قازاقستاننىڭ الەمدەگى يادرولىق قاۋىپسىزدىكتى جانە جاپپاي قىرىپ-جوياتىن قارۋدى تاراتپاۋ رەجيمىن نىعايتۋ باعىتىنداعى ءىس-قيمىلىنا جوعارى باعا بەردى.
سونداي-اق اگەنتتىك جەتەكشىسى ەلىمىزدى اەس سالۋ بويىنشا وتكەن جالپىحالىقتىق رەفەرەندۋمنىڭ ناتيجەسىندە اتوم ەنەرگياسىن دامىتۋ باعدارلاماسىنىڭ ىسكە اسىرىلا باستاۋىمەن قۇتتىقتادى. رافاەل گروسسي قازاقستاننىڭ جاھاندىق يادرولىق قاۋىپسىزدىكتى نىعايتۋ ىسىندەگى ماڭىزى مەن ءرولىن اتاپ ءوتىپ, ەلىمىزدىڭ يگى باستاماسىنا قولداۋ ءبىلدىردى.