تەرگەۋ باستالدى: قاراعاندىدا ديپلومدى ەندى قورعاعان ستۋدەنتتەردى اسكەري كوميسسارياتقا الىپ كەتكەن

قاراعاندىلىق ۆيكتوريا ءۋلينيچتىڭ ايتۋىنشا, ونىڭ ءىنىسى ديپلومىن 23 مامىر كۇنى قورعاعان. وسىدان كەيىن ستۋدەنتتەرگە اۋديتوريادان شىعۋعا مۇمكىندىك بەرىلمەگەن, سەبەبى ولاردى اسكەري كوميسساريات قىزمەتكەرلەرى كۇتىپ تۇرعان.

«ولارعا تاڭعى ساعات وننان كەيىن عانا شاقىرۋ قاعازدارىن تابىستادى. ال قاعازدا تاڭعى توعىزدا دەرەكتەردى ناقتىلاۋ ءۇشىن كەلۋى كەرەك ەكەنى كورسەتىلگەن», دەدى ۆيكتوريا ۋلينيچ.

وسىدان كەيىن جاستاردى اسكەري كوميسسارياتقا اپارىپ, مەديتسينالىق تەكسەرۋدەن وتكىزگەن. قىزدىڭ ايتۋىنشا, ونىڭ ءىنىسىنىڭ بويىن قۇجاتتا 1,88 مەتر دەپ كورسەتكەن, الايدا شىن مانىندە ونىڭ بويى 1,95 مەتر. ول مۇنى بويى 1,90 مەتردەن اساتىن اسكەري قىزمەتكەرلەرگە قوسىمشا تاماقتانۋ قاراستىرىلعانىمەن بايلانىستىرۋى مۇمكىن دەپ ەسەپتەيدى.

قازاقستاندا اسكەري وقۋ ورىندارىنىڭ ۇزدىك تۇلەكتەرىنە «اعا لەيتەنانت» اتاعى بەرىلەدى

ستۋدەنتتەرگە ولاردى مەرزىمدى اسكەري قىزمەتكە جىبەرۋ جوسپارلانىپ وتىرعانى ايتىلعان. الايدا ۆيكتوريانىڭ ءىنىسى وقۋىن اياقتاعانعا دەيىن, ياعني 1 شىلدەگە دەيىن كەيىنگە قالدىرۋ قۇقىعى بار بولعان جانە ودان كەيىن ماگيستراتۋراعا تۇسپەك بولعان.

«ماعان «ول ديپلومىن قورعاپ قويدى, دەمەك وقۋىن اياقتادى» دەپ جاۋاپ بەردى», دەدى ول.

سونداي-اق ول اسكەري كوميسساريات قىزمەتكەرلەرى ستۋدەنتتىڭ «ديپلومىن كەيىن دە الىپ ۇلگەرەتىنىن» ايتقانىن, ال ۆەدومستۆو وكىلدەرىنىڭ ءبىرى قۇجاتتى ۇيىنە ءوزى اپارىپ بەرۋگە ۋادە ەتكەنىن مالىمدەدى. ايتۋىنشا, ونىڭ ءىنىسى ديپلومدىق جوبانى تانىستىرۋ ءۇشىن پايدالانعان قىمبات جابدىقتارىن تاپسىرىپ ۇلگەرمەگەن. ونىڭ ءىنىسى ساران قالاسىندا تىركەلگەن جانە سول جەردەگى اسكەري كوميسسارياتقا بەكىتىلگەن. سوعان قاراماستان ونى باسقا ستۋدەنتتەرمەن بىرگە قاراعاندى قالاسىنا الىپ كەتكەن, ولاردىڭ اراسىندا وزگە قالالاردان كەلگەن ستۋدەنتتەر دە بولعان.

ەلىمىزدە اسكەرگە بارۋ جاسى 50-گە دەيىن ۇزارتىلۋى مۇمكىن

وقيعادان كەيىن ۆيكتوريا پوليتسياعا ارىز جازىپ, قورعانىس مينيسترلىگىمەن بايلانىسقان. ونىڭ سوزىنشە, مينيسترلىكتەن كەيىنگە قالدىرۋ قۇقىعىنىڭ ءالى دە كۇشىندە ەكەنى جانە ونىڭ ءىنىسىن اسكەري كوميسسارياتتا ۇستاپ وتىرۋعا ەشكىمنىڭ قۇقىعى جوق ەكەنى ايتىلعان. وسىدان كەيىن 5 ستۋدەنتتىڭ بارلىعى بوساتىلعان. قىز ولاردىڭ اسكەري كوميسسارياتتا ءبىر تاۋلىكتەن ارتىق بولعانىن ايتتى.

«وسى فاكتى بويىنشا ازاماتتاردى مەرزىمدى اسكەري قىزمەتكە شاقىرۋ كەزىندە زاڭ تالاپتارىنىڭ ساقتالۋىن قوسا العاندا, بارلىق ءمان-جايلاردى زەردەلەۋ ماقساتىندا تەكسەرۋ ۇيىمداستىرىلدى», دەپ حابارلادى قاراعاندى وبلىسىنىڭ شاقىرۋ كوميسسياسى.

كوميسسيا وكىلدەرى تەكسەرۋ بارىسىندا زاڭ بۇزۋشىلىقتار نەمەسە قىزمەتتىك وكىلەتتىكتەردى اسىرا پايدالانۋ فاكتىلەرى انىقتالسا, كىنالىلەر جاۋاپكەرشىلىككە تارتىلاتىنىن مالىمدەدى.

اسكەردەگى جاڭا تالاپ: ەندى سارباز قىزمەت بارىسىندا كەمىندە 5 كىتاپ وقۋعا مىندەتتى