الماتىدا جىل سوڭىنا دەيىن 20 جاتاقحانا پايدالانۋعا بەرىلەدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى, دەپ حابارلايدى Egemen.kz.
مينيستر الماتىداعى ستۋدەنتتىك جاتاقحانالاردا قانشا ورىن جەتىسپەيتىنى تۋرالى ايتتى. ونىڭ ايتۋىنشا, 2019 جىلى ەل بويىنشا جاتاقحانا تاپشىلىعى 82 مىڭنان استام ورىندى قۇراعان. قازىر ورىن جەتىسپەۋشىلىگى تەك الماتى قالاسىندا عانا ساقتالىپ وتىر.
«الماتىدا 5176 ورىن جەتىسپەيدى. جىل سوڭىنا دەيىن 10 مىڭ ورىنعا ارنالعان شامامەن 20 جاتاقحانانى پايدالانۋعا بەرەمىز. بىزدە مەملەكەتتىك جانە جەرگىلىكتى بيۋدجەت ەسەبىنەن 10 مىڭ ورىن سالۋ جوسپارى بولدى. سونىمەن قاتار سۋبسيديالاۋ تەتىگى ءوزىن جاقسى كورسەتتى. سوڭعى بەس جىلدا وسى مەحانيزمدى پايدالانعان جەكە ينۆەستورلاردىڭ كومەگىمەن شامامەن 60 مىڭ ورىن ماسەلەسىن شەشتىك», دەدى مينيستر ۇكىمەتتەگى بريفينگتە.
قازۇۋ-دا 5 جاڭا جاتاقحانانىڭ قۇرىلىسى باستالدى
ءمينيستردىڭ سوزىنشە, جاتاقحاناعا قاتىستى تالاپتار قايتا قارالعان. قازىر مينيسترلىك جوعارى وقۋ ورىندارىنان ستۋدەنتتەردىڭ كەمىندە 80 پايىزىن ورىنمەن قامتاماسىز ەتۋدى تالاپ ەتەدى.
«سوڭعى 3-4 جىلدا جاتاقحانا ماسەلەسى, ستۋدەنتتەردى ورنالاستىرماۋ تۋرالى شاعىمدار ازايدى. قازىر بۇل جۇيەلى تۇردە جۇمىس ىستەپ تۇر. تامىز-قىركۇيەك ايلارىنا دايىندىق باستالىپ كەتتى», دەدى مينيستر.
ءساۋىر ايىنىڭ سوڭىندا جوعارى اۋديتورلىق پالاتا جوعارى وقۋ ورىندارى ستۋدەنتتەرىنە ارنالعان تۇرعىن ءۇي تاپشىلىعى ءالى دە وزەكتى ەكەنىن مالىمدەگەن بولاتىن. 2024-2025 وقۋ جىلىندا جاتاقحاناداعى ورىن تاپشىلىعى 10 مىڭنان اسقان.
ستۋدەنتتەردى ەدەن جۋعا ماجبۇرلەگەن: تۇركىستاندا جاتاقحانا قىزمەتكەرلەرى سوگىس الدى