ەلوردادا رەۆماتولوگيالىق اۋرۋلاردى ەمدەۋگە ارنالعان العاشقى مامانداندىرىلعان ورتالىق ىسكە قوسىلدى. جاڭا نىسان ناۋقاستارعا ستاتسيونارلىق كومەكتى قولجەتىمدى ەتىپ, ۇزاق كەزەك ماسەلەسىن شەشۋگە مۇمكىندىك بەرەدى, دەپ جازادى Egemen.kz.
رەۆماتولوگيا ورتالىعى «قالالىق كوپسالالى فتيزيوپۋلمونولوگيا جانە ىشكى اۋرۋلار» ورتالىعىنىڭ بازاسىندا اشىلدى. بۇعان دەيىن استانادا بۇل باعىتتا ارنايى ستاتسيونار بولىمشە بولماعان.
ورتالىق باسشىسى اننا تسەپكەنىڭ ايتۋىنشا, جاڭا بولىمشەنىڭ ىسكە قوسىلۋى – قالالىق دەنساۋلىق ساقتاۋ جۇيەسىن دامىتۋداعى ماڭىزدى قادام.
«ەندى بۋىن اۋرۋلارىنا شالدىققان ناۋقاستارعا مەديتسينالىق كومەك الدەقايدا قولجەتىمدى بولادى. كۇتۋ مەرزىمى قىسقارىپ, زاماناۋي ەم-دوم تاسىلدەرى كەڭىنەن قولدانىلادى», دەدى ول.
بۇعان دەيىن پاتسيەنتتەر اۋرۋحاناعا جاتۋ ءۇشىن 6-7 ايعا دەيىن كەزەك كۇتۋگە ءماجبۇر بولعان. سونىڭ سالدارىنان كوپ جاعدايدا ناۋقاستار تەك شۇعىل جاعدايدا عانا ستاتسيونارعا ءتۇسىپ, بازيستىك جانە گەندىك-ينجەنەرلىك بيولوگيالىق تەراپيانى دەر كەزىندە الۋ مۇمكىندىگى شەكتەلگەن.
وتاندىق ماماندار رەۆماتولوگيالىق اۋرۋلاردى انىقتاۋ مەن ەمدەۋ ماسەلەلەرىن تالقىلادى
قالالىق قوعامدىق دەنساۋلىق ساقتاۋ باسقارماسى وكىلدەرىنىڭ مالىمەتىنشە, ەمدەۋدى ۇزاق كۇتۋ اۋرۋدىڭ اسقىنۋىنا جانە مۇگەدەكتىك دەڭگەيىنىڭ ارتۋىنا اكەلۋى مۇمكىن. جاڭا ورتالىق وسى تۇيتكىلدەردى جۇيەلى تۇردە شەشۋگە باعىتتالعان.
ورتالىقتىڭ اشىلۋى مامانداندىرىلعان كومەكتىڭ قولجەتىمدىلىگىن ارتتىرىپ, اۋرۋحاناعا جاتۋ جانە كەڭەس الۋ ۋاقىتىن قىسقارتادى, سونداي-اق زاماناۋي ەمدى دەر كەزىندە تاعايىنداۋعا مۇمكىندىك بەرەدى. سونىمەن قاتار اۋرۋدىڭ اسقىنعان تۇرلەرىن ازايتىپ, دارىگەرلەردىڭ مۋلتيديستسيپلينارلىق ءتاسىلدى قولدانۋىنا جول اشادى. بۇل ءوز كەزەگىندە ناۋقاستاردىڭ ءومىر ءسۇرۋ ساپاسىن جاقسارتۋعا ىقپال ەتەدى.
رەۆماتولوگيالىق اۋرۋلار – بۋىن مەن بۇلشىق ەتتى زاقىمدايتىن سوزىلمالى دەرت. مۇنداي سىرقاتتاردى ءتيىمدى ەمدەۋ ءۇشىن ەرتە دياگنوستيكا, تۇراقتى باقىلاۋ جانە زاماناۋي تەراپيانى ۋاقىتىلى قولدانۋ اسا ماڭىزدى.
وسكەمەندەگى جارىلىس: استانادان دارىگەرلەر كومەككە بارادى