تالىمباقتار تاپشىلىعى

ەرتىس-بايان وڭىرىندەگى مەملە­كەت­تىك ورمان قورى – 478,7 مىڭ گەكتار. ونىڭ 312,1 مىڭ گەكتارى ورمانمەن كومكەرىلگەن. ورمان شا­ر­ۋاشىلىعى سالاسىندا وبلىس اكىمدىگىنە قاراستى ءۇش ورمان قور­عاۋ مەكەمەسى جۇمىس ىس­تەيدى. سونىمەن قاتار وڭىردە ەكى رەس­پۋبليكالىق تابيعات قور­عاۋ مەكە­مە­سى بار: «ەرتىس ورمانى» رەزەرۆاتى جانە باياناۋىل مەم­لە­كەت­تىك ۇلتتىق تابيعي پاركى.

– ءوڭىر ورماندارىندا نەگىزىنەن قاراعاي, قايىڭ, كوكتەرەك, تەرەك, تال, جوكە اعاشتارى كەڭ تارالعان. اسىرەسە ەرتىس بويىنداعى قارا­عاي­لى القاپتار ايماق­تىڭ تابي­عي بايلىعى سانالادى. تابيعات قورعاۋ مەكەمە­لە­رىندە ءتورت تالىمباق بار. ونىڭ ۇشەۋى – «ەرتىس ورمانى» اۋماعىندا, بىرەۋى باياناۋىل ۇلتتىق پاركىندە ورنا­لاسقان. الايدا ولار وبلىستىڭ كوشەتتەرگە دەگەن جىلدىق سۇرانىسىن تو­لىق قامتاماسىز ەتە المايدى. سون­دىقتان قاجەتتى كوشەتتەر سىرتتان ساتىپ الۋ جانە ۋا­قىتشا تالىمباقتار ۇيىمداستىرۋ ارقى­لى قام­تاما­سىز ەتىلەدى, – دەيدى پاۆ­لودار وبلىسىنىڭ جەر قوي­­ناۋىن پايدالانۋ, قورشاعان ورتا جانە سۋ رەسۋرستارى باس­قار­ما­سىنىڭ باسشىسى ساعىن تولەۋتاەۆ.

مامانداردىڭ ايتۋىنشا, بيىل جالپى اۋماعى 1 250 گەكتار جەرگە 7,8 ميلليون كوشەت وتىر­عى­زۋ كوزدەلگەن. ونىڭ باسىم بولىگى – قىلقان جاپىراقتى قاراعاي مەن قاتتى اعاش تۇقىمداس قاراعاش. قازىر كوكتەمگى ورمان وتىرعىزۋ ناۋقانىنا دايىندىق ءجۇرىپ جاتىر.

– مەملەكەت باسشىسىنىڭ تاپ­سىرماسى مەن ورمانداردى مولىق­تىرۋ بويىنشا بەكىتىلگەن كەشەندى جوسپار شەڭبەرىندە 2021 جىلدان باستاپ مەملەكەتتىك ورمان قورى ايتارلىقتاي ۇلعايىپ كەلەدى. تەك بىلتىر وڭىردە 1 150 مىڭ گەكتار القاپقا قىلقان جاپىراقتى جانە جاپىراقتى تۇقىمدىلاردىڭ 6,5 ملن كوشەتى وتىرعىزىلعان, – دەپ قوستى س.تولەۋتاەۆ.

ورمانداردى ساقتاۋ اعاش وتىر­عىزۋمەن شەكتەل­­­­­مەي­دى. اۋرۋعا شالدىققان, زاقىمدانعان نە­مەسە قۋرا­عان اعاشتاردى ۋاق­تى­لى انىقتاپ, سانيتارلىق كەسۋ جۇ­­مىستارىن جۇرگىزۋ – ورمان­نىڭ ەكولوگيالىق تەپە-تەڭدىگىن ساقتاۋدىڭ ماڭىزدى بولىگى. وب­لىستا ىرىك­تەپ جانە جاپپاي ساني­تارلىق كەسۋ جۇمىستارى تۇ­راق­تى تۇردە جۇرگىزىلەدى. ماماندار ورمان ورتتەرى مەن زاڭسىز اعاش كەسۋ دەرەكتەرى نەگىزگى ماسەلە بولىپ وتىر­­عانىن ايتادى. اسىرەسە قۇر­عاقشىلىق جىلدارى ءورت قاۋپى كۇشەيەدى. وسىعان بايلا­نىستى الدىن الۋ شارالارى كۇ­شەي­تىلگەن. كەيىنگى جىلدارى ورمان شارۋا­شى­لىقتارىنىڭ ماتەريال­دىق-تەحنيكالىق بازاسى دا ەداۋىر نىعاي­عان. 2022–2025 جىلدارى 5 ءورت اۆتوتسيستەرناسى, 8 تراكتور, 10 شاعىن ءورت كەشەنى, 33 موتوتسيكل جانە وزگە دە ارنايى تەحنيكا ساتىپ الىنعان. بيىل تاعى 47 تەحنيكا الۋ جوسپارلانىپ وتىر. سونىمەن قاتار 2022 جىلدان باستاپ ورمان شارۋاشىلىعى مامان­دا­رى­نىڭ جالاقىسى كەزەڭ-كەزەڭىمەن ءوسىپ كەلەدى. بۇل – سالاداعى كادر تاپشىلىعىن ازاي­تۋ­عا, مامانداردى ۇستاپ قالۋعا باعىتتالعان شارا.

پاۆلودار وبلىسى