مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمىنىڭ بەيرەسمي سامميتىندەگى سويلەگەن سوزىندە بيىل ۇلىستىڭ ۇلى كۇنىندە وسى كيەلى تۇركىستان جەرىندە «Qoja Ahmet Yasaui» وردەنىن تاعايىنداۋ تۋرالى شەشىم قابىلداعانىن اتاپ ءوتتى, دەپ حابارلايدى Egemen.kz.
پرەزيدەنت وسىعان وراي ءتيىستى زاڭ قابىلدانعانىن, ارنايى جارلىققا قول قويعانىن تىلگە تيەك ەتتى.
«بۇل كۇللى تۇركى دۇنيەسى ءۇشىن ءمان-ماعىناسى ايرىقشا ماراپات دەپ ايتۋعا بولادى. سول سەبەپتى كەشە العاشقى مارتەبەلى ناگرادانى اسا قۇرمەتتى پرەزيدەنت رەجەپ تايپ ەردوعانعا سالتاناتتى تۇردە تابىستادىم.
وسىلايشا, ءبىز تۇركى رۋحانياتىنىڭ تەمىرقازىعى – ياساۋي تۇلعاسىن دارىپتەي وتىرىپ, حالىقتارىمىزدىڭ اراسىنداعى مىزعىماس باۋىرلاستىق تامىرىن نىعايتا بەرەمىز دەپ سەنەمىن», دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, بۇگىندە تۇركىستان – كونە مەن كەلەشەكتى توعىستىرعان شىرايلى شاھار.
«ايماقتىڭ ەكونوميكالىق الەۋەتى جىل وتكەن سايىن ارتىپ كەلەدى. بىلتىر وبلىستىڭ ەكونوميكاسى 9,3 پايىزعا ءوستى, ونىڭ كولەمى 10 ميلليارد دوللاردان استى. ايماققا 3,5 ميلليارد دوللار ينۆەستيتسيا تارتىلدى», دەدى پرەزيدەنت.
قاسىم-جومارت توقاەۆتىڭ ايتۋىنشا, القالى جيىندى وسىندا وتكىزۋدىڭ ماقساتى – اتاجۇرتتا باۋىرلاس ەلدەردىڭ كوشباسشىلارىمەن جۇزدەسۋ, قايتا تۇلەگەن تۇركىستاندى تورتكۇل دۇنيەگە تانىتۋ.
ء«بىز كيەلى وردانىڭ تاريحى قانداي تەرەڭ بولسا, بولاشاعى دا سونداي جارقىن بولارىنا نىق سەنىممەن قارايمىز. وسى مۇمكىندىكتى پايدالانىپ, بۇگىن تۇركىستاندا وزبەكستاننىڭ قولداۋىمەن جاڭا ءزاۋلىم مەشىت اشىلعانىن ۇلكەن ريزاشىلىقپەن اتاپ وتكىم كەلەدى.
ەرەكشە تارتۋ جاساعانى ءۇشىن وزبەكستان پرەزيدەنتى, اسا قادىرلى شاۆكات ميرومون ۇلى ميرزيوەۆكە جانە وزبەك حالقىنا العىسىمدى بىلدىرەمىن.
ەلدەرىمىزدىڭ رۋحانياتىنداعى وسى مەشىتتىڭ ورنى ەرەكشە بولماق. بۇل – قازاق-وزبەك حالىقتارى ىنتىماعىنىڭ تاريحي سيمۆولى», دەدى قاسىم-جومارت توقاەۆ.
مەملەكەت باسشىسى الماعايىپ كەزەڭدە تۇركى مەملەكەتتەرىنىڭ اۋىزبىرشىلىكتە بولۋى – وتە ماڭىزدى ەكەنىن اتاپ ءوتتى.
ء«بىز حالىقارالىق گەوساياسي احۋال اسا كۇردەلى جانە قۇبىلمالى ءداۋىردى باستان وتكەرۋدەمىز. الەمدىك جانە ايماقتىق دەڭگەيدەگى باسەكە كۇشەيىپ بارادى. قارۋلى قاقتىعىستار, سوعىستار تولاستار ەمەس. مۇنىڭ ءبارى الەم ەكونوميكاسىنا كەرى اسەر ەتىپ جاتقانىن ءبارىمىز كورىپ وتىرمىز. تاياۋ شىعىستاعى جاعدايدىڭ سالدارىن كورشىلەس ايماق ەلدەرى دە سەزىنە باستادى. وسىنداي الماعايىپ كەزەڭدە تۇركى مەملەكەتتەرىنىڭ اۋىزبىرشىلىكتە بولۋى – وتە ماڭىزدى. سەبەبى حالىقتارىمىزعا ورتاق سان عاسىرلىق شەجىرەمىز بار. قازىرگى تاڭدا تۇركى ەلدەرى زامان تالابىن ەسكەرىپ, ەكونوميكا جانە ينۆەستيتسيا سالاسىنداعى ىقپالداستىقتى نىعايتۋى كەرەك, ورتاق مۇددە جولىندا كۇش جۇمىلدىرۋعا ءتيىس دەپ سانايمىن», دەدى پرەزيدەنت.
ەسكە سالا كەتەيىك, مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمىنىڭ بەيرەسمي سامميتىندە ءسوز سويلەپ, جاساندى ينتەللەكت ورتالىقتارىنىڭ جەلىسىن قۇرۋدى ۇسىندى.