بەس بىردەي قازاق بوكسشىسى الەمدىك رەيتينگتە كوش باستادى

قازاقستان قۇراماسى الەمدىك اۋەسقوي بوكستاعى جوعارى دەڭگەيىن تاعى ءبىر مارتە دالەلدەدى. قازىرگى تاڭدا بىردەن بەس سپورتشى ءوز سالماق دارەجەسىندە الەم رەيتينگىنىڭ كوشىن باستاپ تۇر.

جاڭارتىلعان رەيتينگتە سانجار تاشكەنباي (50 كەلىگە دەيىن), ماحمۇد سابىرحان (55 كەلىگە دەيىن), تورەحان سابىرحان (70 كەلىگە دەيىن), ايبەك ورالباي (90 كەلىدەن جوعارى) جانە ناتاليا بوگدانوۆا (70 كەلىگە دەيىن) ءبىرىنشى ورىنعا جايعاستى.

سونىمەن قاتار تاعى بىرنەشە بوكسشىمىز الەم رەيتينگىندە ەكىنشى ورىنعا كوتەرىلدى. ولاردىڭ قاتارىندا نازىم قىزايباي (48 كەلىگە دەيىن), ايدا ابىكەەۆا (65 كەلىگە دەيىن) جانە نۇربەك ورالباي (80 كەلىگە دەيىن) بار.

الەمنىڭ ۇزدىك بوكسشىلارى قاتارىنا الۋا بالقىباەۆا (51 كەلىگە دەيىن), نادەجدا ريابەتس (80 كەلىگە دەيىن), دينا يسلامبەكوۆا (80 كەلىدەن جوعارى), ورازبەك اسىلقۇلوۆ (60 كەلىگە دەيىن), سابىرجان اققالىقوۆ (75 كەلىگە دەيىن) جانە نۇربەك ورالباي (85 كەلىگە دەيىن) ەندى.

قازىرگى تاڭدا قازاقستان قۇراماسى وقۋ-جاتتىعۋ جيىنىن وتكىزىپ جاتىر. كەلەسى ءىرى جارىس قىتايدىڭ گۋيان قالاسىندا وتەتىن الەم كۋبوگىنىڭ كەزەڭى بولماق. تۋرنير 15-21 ماۋسىم ارالىعىندا بولادى.