جاساندى ينتەللەكتىنى ورتا ءبىلىم سالاسىندا ەنگىزۋدىڭ ۇلتتىق مودەلى رەتىندە ىسكە قوسىلعان «TopIQ: Smart Class 2.0» كۇللى ءبىر سىنىپتىڭ ۇلگەرىمىن 32%-عا دەيىن كوتەردى. استانانىڭ №99 ورتا مەكتەبىنە بيىلعى ساۋىردە ورناتىلعان تسيفرلىق پارتالارعا ەندى باسقا دا سىنىپ وقۋشىلارى قىزىعا باستادى, دەپ حابارلايدى Egemen.kz.
بولاشاقتىڭ ينتەللەكتۋالدىق سىنىبى – Smart Class جوباسىن TopIQ IT كومپانياسى مەن «الماتىكىتاپ باسپاسى» بىرلەسىپ جۇزەگە اسىردى. 2026 جىلعى ساۋىردە قازاقستاندا تۇڭعىش رەت – استانا قالاسىنىڭ ءبىلىم باسقارماسى جانە اكىمدىگى ىرىكتەگەن № 99 ورتا مەكتەبىندە ۇستازدىڭ جۇمىس پانەلى مەن وقۋشىنىڭ جەكە پارتاسىن ءبىر جۇيەگە توعىستىراتىن تەڭدەسى جوق تسيفرلىق سىنىپتىڭ جەمىسى بىرنەشە ماسەلەنى بىردەن شەشەتىنىن كورسەتتى. اتاپ ايتساق, Smart Class مەملەكەت باسشىسى قاسىم-جومارت كەمەل ۇلىنىڭ 2026-2029 جىلدارعا ارنالعان ورتا ءبىلىم سالاسىنا جي-ءدى كەڭىنەن ەنگىزۋ تۋرالى تاپسىرماسىنداعى بالاعا جەكە ءبىلىم الۋ مەحانيزمىن قۇرۋ, جەكە باس دەرەگىنىڭ قاۋىپسىزدىگىن قامتاماسىز ەتۋ جانە بالا دەنساۋلىعىنا زيان كەلتىرمەۋ سياقتى «كەشەندى جوسپارداعى» ماڭىزدى تالاپتاردى قامتيدى. «TopIQ: Smart Class 2.0» جوباسىنىڭ يدەيا اۆتورى ءارى جەتەكشىسى – «الماتىكىتاپ باسپاسى» ديرەكتورلار كەڭەسىنىڭ ءتورايىمى ەلەونورا باتالوۆا.
«TopIQ: Smart Class 2.0» – قازاقستاندا مەملەكەتتىك ءبىلىم الۋ پروتسەسىنە تولىققاندى ينتەگراتسيالانعان تەڭدەسى جوق تسيفرلىق ورتا. جاساندى ينتەللەكتىنى ورتا ءبىلىم سالاسىنا ەتەنە ەنگىزەتىن يننوۆاتسيالىق بۇل سىنىپ دۇنيە جۇزىندە سينگاپۋر, قىتاي, وڭتۇستىك كورەيا سياقتى وزىق تەحنولوگيانى ورتا ءبىلىم جۇيەسىنە الدەقاشان قولدانعان ەلدەردىڭ مەكتەپتەرىندە جۇمىس ىستەپ تۇر. ءبىرىنشى كەزەكتە وقۋ-اعارتۋ سالاسىنداعى ينكليۋزيا ماسەلەسىن شەشەتىن Smart Class بارلىق بالانىڭ مەملەكەتتەن ءبىلىم الۋىنا تەڭدەي جاعداي جاسايدى, ياعني ساباق بارىسىندا ينتەللەكتۋالدى ترانسفورمەردى ەرەكشە كوڭىل بولۋگە مۇقتاج بالا دا, باسقا بالا دا بىردەي قولدانا الادى», دەيدى «الماتىكىتاپ باسپاسىنىڭ پرەزيدەنتى گاۋھار سايماساەۆا.
ءبىر قاراعاندا وتىرىپ ساباق وقۋعا ارنالعان ادەتتەگى پارتانى اينالدىرىپ جىبەرسە, الدىڭىزدا TopIQ وقۋ پلاتفورماسى مەن Qamqor اتتى جي كومەكشى بىرىككەن ينتەراكتيۆتى تسيفرلىق ءبىلىم بەرۋشى ترانسفورمەر شىعا كەلەدى. وزىق جۇيەدە ۇستازدىڭ ءوز سمارتپانەلى جانە سمارت تاقتاسى بار. وقۋشىنىڭ جەكە سمارت پارتاسى وزىنە ساي يكەمدەلەدى: بالانىڭ وقۋ جانە جازۋ قارقىنىن, ساباققا قىزىعۋ دەڭگەيى مەن شارشاۋ بەلگىلەرىن ساراپتايدى. ءۇي تاپسىرماسىن ورىنداۋ نەمەسە قاشىقتان وقۋ پروتسەسى دە TopIQ پلاتفورماسىنىڭ ەنشىسىندە, ياعني Smart Class ەلىمىزدىڭ الىس-جاقىن ايماعىنداعى مەكتەپتەر مەن شاعىن جيناقتالعان ءبىلىم وشاقتارىنىڭ دا سۇرانىسىن قامتيدى. ەندى استانا قالاسىنىڭ №99 ورتا مەكتەبىنىڭ سىناقتان ءوتىپ جاتقان 3-سىنىبىنا باسقا وقۋشىلار قىزىعىپ جۇرگەنىن ۇستازدار جاسىرعان جوق.
«مەكتەبىمىزگە Smart Class ورناتىلعالى سىناققا قاتىسقان 3-سىنىپتىڭ 25 وقۋشىسىنىڭ ساباققا دەگەن ىنتاسى ارتتى. جالپى سىنىپتىڭ ۇلگەرىمى ورتاشا ەسەپپەن العاندا 32%-عا دەيىن جاقساردى. بارىنەن دە وقۋشىلارىمنىڭ ىشىندە ەرەكشە كوڭىل ءبولۋدى قاجەت ەتەتىن ەكى بالا بار, سونىڭ بىرەۋى قاشىقتان وقۋدان باس تارتىپ, Smart Class اشىلعالى مەكتەپكە كەلىپ وقىدى, كۇندە ساباقتان قالمادى. بۇعان تاڭعالعان بالانىڭ اناسى, مەنىڭ بالاما نە ىستەپ قويدىڭدار دەپ قۋانعاننان كۇلگەن ەدى. ءبىز ءار وقۋشىنىڭ قالاي وزگەرەتىنىنە مۇقيات ءمان بەرەمىز: مىسالى ەرەكشە وقۋشىمنىڭ بىرەۋى بۇرىن سۋرەت سالعاندا كۇڭگىرت تۇستەردى عانا قولداناتىن. قازىر بالانىڭ سۋرەتى ءومىردىڭ اشىق جارقىن تۇستەرىمەن الماستى. جاسىراتىنى جوق, تسيفرلىق ءبىلىم بەرۋ جۇيەسىنىڭ بالاعا وسىنشا اسەر ەتەتىنىنە تۋعان بالاڭا قۋانعانداي بولاسىڭ», دەيدى №99 ورتا مەكتەپتىڭ باستاۋىش سىنىپ مۇعالىمى جانات نايمانعازينوۆا.
ءداستۇرلى ءھام تسيفرلىق فورماتتا ءبىلىم الۋدى بىرىكتىرەتىن Smart Class كورسەتكەن ناتيجەنى تۇيىندەۋ ءۇشىن, TopIQ IT كومپانياسى مەن «الماتىكىتاپ باسپاسى» وقۋ جىلىنىڭ اياقتالۋىن كۇتتى. حالىقارالىق بالا قۇقىعىن قورعاۋ كۇنىمەن تۇسپا-تۇس كەلگەن قورىتىندى ءبىلىم سالاسىنداعى وزەكتى ماسەلەلەر – بارلىق بالاعا ءبىلىم الۋعا تەڭدەي جاعداي جاساۋ, ەرەكشە بالالاردىڭ قوعاممەن ەتەنە ارالاسۋى جانە وقۋشىلاردىڭ جاساندى ينتەللەكتىنى قولدانۋ بارىسىندا جەكە دەرەگىن قورعاۋ, ومىرتقاسى قيسايىپ كەتپەۋىن, جۇيكە جۇيەسى مەن كوزىنە زيان كەلمەۋىن قاداعالاۋ ماسەلەلەرى شەشىلەتىنىن كورسەتتى.
جازعى دەمالىستا بالالارعا ارنالعان 11 مىڭنان اسا ورتالىق جۇمىس ىستەيدى
ەكى ايداعى سىناقتىڭ جاعىمدى جاڭالىعىن اتا-اناعا, جالپى قوعامعا ءبولىسۋ ماقساتىندا سمارت سىنىپقا قازاقستاننىڭ تانىمال ءجۋرناليسى گۇلبانۋ انياتقىزى جانە ونىڭ ءان سالعاندى جاقسى كورەتىن ەرەكشە بالاسى ايتۇمار سارسەنبەك ارنايى قوناققا شاقىرىلدى. Smart Class پەداگوگى ايتۇماردىڭ دياگنوزىنا ساي باعدارلاما دايىنداپ, ونەرلى قىزعا مەكتەپ وقۋشىلارىمەن بىرگە ساباق وتكىزدى.
ەسكە سالا كەتەيىك, بۇعان دەيىن ەكىباستۇز قالاسىنداعى 5 000-عا جۋىق بالانى تەگىن وقىتاتىن «سامعاۋ» ورتالىعى تۋرالى جازعان بولاتىنبىز.